JOHANE 4

1Jesu a ti zivile ti to Vafarisi va engisile vathu va txi womba ku ene wa pala Johane kumana vagondiswa ni kubhabhatisa vathu. 2Kambe i ti singa ene Jesu apune a bhabhatisako, aniko i ti vagondiswa vakwe. 3Konaho Jesu a to khukha Judheya a tshumelela Galileya. 4Kambe a ti fanela kutshawunyeta ngu Samariya. 5Se a to hoka ka m'ti wumwane wa Samariya, awu wu dhanwako ku i Sikari, hafuhi ni thembwe yi Jakobe a nga ninga Josefa, mwanana wakwe. Konaho ku ti ni txisima txa Jakobe. 6A di karate ngu kutsimbila, Jesu a to khalahatsha hafuhi ni txisima txa Jakobe. I ti txikhati txa wutxhanu ni tximwetxo. 7A to bwaka wamsikati wa Samariya, kuta reka mati. Se Jesu a to womba kwakwe a txi khene: “Hinga ni ha mati o sela.” 8Kasi vagondiswa vakwe va ti tsute didhoropani kuya xava sakudya. 9Wamsikati wule wa Musamariya a to mu xamula a txi khene: “Ti nga mahisa ku txani awe u ku Mujudha kukombela mati kwangu ni ku Musamariya kani?” Nguko Vajudha kha va tolovelani ni Vasamariya. 10Se Jesu a to xamula a txi khene: “Idiku wo txi ziva txihiwa txa Txizimu, ni ti to i mani wule a ku khene: ‘Hinga ni ha mati o sela,’ nga i di awe u mu kombelako ti to ene e ku ninga mati a kuhanya.” 11Wamsikati a to khene: “Mkoma, khu nga ni txo reka ngu txona mati txisimani, kambe nitxona txisima txi hokomile, se u na ma mana hani mati a kuhanya kani? 12U nga va u di wa hombe awe kupinda tate wathu Jakobe, a nga hi ninga txisima txiya, atxiya nene a nga sela ka txona, kumweko ni vanana vakwe, ni sifuyo sakwe kani?” 13Jesu a to engeta e xamula a txi khene: “Awule a selako yawa mati a na tshumela kambe a txi pfa ditora; 14Aniko awule a selako mati yawa ni no mu ninga ani, kha na mbi swa a txi pfa ditora; kambe mati yawa ni no mu ninga, ma na hinduka mndani kwakwe ma txi maha txisima txa mati yawa ma mu ningako wutomi wo mbi guma.” 15Se wamsikati a to khene kwakwe: “Mkoma, ni he matiyo, kasiku ni si swi ni txi pfa ditora, ni ti to ni si swi kambe ni ta hawa ni ta reka.” 16Jesu a txi khene kwakwe: “Tsula u txi ya dhana mwamna wako, u tshumela u wuya.” 17Wamsikati a txi mu angula, a txi khene: “Kha ni nga ni mwamna.” Seni Jesu a to xamula a txi khene: “U wombile ditshuri, u txi khawe: ‘Kha ni nga ni mwamna.’ 18Nguko u zumbile ni mtxhanu wa vavamna, se awu u ku nayo konkuwa, hi nga wako. Ngu toneto u wombile ditshuri.” 19Wamsikati a to khene: “Mkoma, na ti wona ti to kasi u Mprofeti: 20Vatate vathu va titi khozela ka mmango wuwa, se awe u khawe Jerusalema ngu kona va fanelako kuya khozela kona.” 21Jesu a to khene: “Wamsikati, tumela ti ni ku gelako: Ya ta mbimo yi mi no mbi swa mi txi khozela ka mmango wuwa, hambi ni Jerusalema. 22Anu mi khozela txa ku ambi txi ziva, athu hi khozela txi hi txi zivako, nguko kuhanyiswa ku ta ngu ka Vajudha. 23Aniko txi na hoka txikhati, kambe txi hokile, atxi vakhozeli va ditshuri va no khozela Tate ngu moya ni ditshuri, nguko ngu vonevo vakhozeli vava Tate a va dhundako. 24Txizimu i Moya, se vakhozeli va txona va fanela ku txi khozela ngu moya ni ditshuri.” 25Wamsikati a to engeta a txi khene: “Na ti ziva ti to wa ta Mesiya, awu a dhanwako ku i Kristu, se a di tile, Ene a na ta hi gondisa totshe.” 26Jesu a nje khene kwakwe: “Ngani ni wombawombako ni nawe.” 27Kunukunuko va to bwaka vagondiswa vakwe, se nivona va to xamala ngu kuwa Ene a nga txi wombawomba ni wamsikati. Hambi keto, ku walo ni wammweyo wa vagondiswa, a nga mu wotisa ti to “U lava txani?”, mwendo ku: “Nji txani u bhulako nayo?” 28Konaho wamsikati a to leka lidhuwa, e tsula didhoropani e ya gela vathu, a txi khene: 29“Ngonani mi ta wona mthu wu a nga ni gela totshe ti ni nga ti maha. Ina hi nga ene Mesiya kani?” 30Vona va to huma ngu didhoropani, ve tsula kuya wonana ni Jesu. 31Ka txonetxo txikhati vagondiswa va to mu khongotela, va txi khona: “Dyana, Mgondisi!” 32Aniko Ene a to va xamula a txi khene: “Ani nina ni sakudya, asi anu mi si si ziviko.” 33Vagondiswa va to wotisana, va txi khona: “A nga va a di ho a nga mu tisela sakudya kani?” 34Se Jesu a nje khene kwawe: “Sakudya sangu ngu kumaha kuranda ka wule a nga ni ruma ni kuhetisa mthumo wakwe. 35Kasi kha mi wombi anu, ti to: ‘Ku sate mune wa mitxima, se yi na hoka mbimo ya kuelula’, kani? Kha ditshuri na mi gela ni khani: Gulani maso mi txi wona: Tithembwe ti nga bhilivila, ti lavako kuelulwa. 36Awule a elulako wa amukela hakhelo, e sengeleta mihando ya wutomi wo mbi guma. Se ti di mahile eto, awu a phayako wa tsaka kumweko ni wu a elulako. 37Ngu toneto, dina ni ditshuri dipswi di di ku: ‘Mmwane wa phaya, mmwane wa elula.’ 38Ni mi rumete kuya elula asi anu mi nga mbi si thumela; vamwane va thumile se anu ma londola mithumo yawe.” 39Vasamariya va vangi va didhoropa dile va to kholwa kwakwe, ngu mhaka ya wule wamsikati, a nga fakaza a txi khene: “Ene a ni gete totshe ti ni nga ti maha.” 40Ngu toneto, mbimo yi va nga mu yela Jesu, va mu kombete ti to e zumba navo, se ene a zumbile navo masiku mambidi. 41Vamwane kambe va vangi va to kholwa ngu kuengisa kuwombawomba kwakwe. 42Se va to womba ka wule wamsikati va txi khona: “Se athu hi nga ngadi i di mapswi ako, ma hi ningako kukholwa, aniko ngathu hipune hi ti engisako ni ku ti ziva ti to Ene ngene Muhanyisi wa Ditiko.” 43Ngako ma di pindile masiku mambidi, a to khukha hale, e tsula Galileya. 44Ene Jesu apune a ti wombile a txi khene: “Mprofeti kha dhundwi ditikoni kwawe.” 45Kutingako a di hokile Galileya, vaGalileya va to mu amukela kwati, ngukuva va ti woni totshe ti a nga ti maha Jerusalema ngu ditshiku da m'buso, ngako nivona va nga ti yite m'busoni. 46Se Jesu a to tshumela e ya Kana ka Galileya, ahawa a nga phindula mati me maha vhinya. Yi titi ho nduna yo kari, yi nga ti lwalelwa ngu mwanana, a nga ti Kapernawume. 47Nduna yiya, ngako yi di engisile ti to Jesu wa ta Galileya ngu Judheya, yi to mu yela yi ya mu kombela ku e tsula nayo mtini ka yona, a txi ya hanyisa mwanana wa yona, a nga ti hafuhi ni kufa. 48Jesu a to womba a txi khene kwakwe: “Anu, ngako mi si woni sixamaliso ni sidiwukiso, kha mi kholwi.” 49Awule wa nduna a to khene: “Mkoma, kuluveta u txi ta, a si nzi kufa mwanana wangu.” 50Jesu a to mu angula a txi khene: “Tsula, mwanana wako a hanyile.” Mthu wuwa a to kholwa ka mapswi a Jesu e tsula. 51Se mbimo yi a nga txi tsula mtini kwakwe, si to mu hingeta sithumi sakwe, si txi ya mu gela ku mwanana wa hanya. 52Ene a va wotisile mbimo yi a nga kalamuka ngu yona. Va txi mu gela ku khona: “Nyamnova, ngu txikhati txa wutxhanu ni simbidi, txindeyandeya txi mu lekile.” 53Se ngu konaho tate wa mwanana a nga ti ziva ti to ngu yona yile mbimo Jesu a nga khene: “Mwanana wako a hanyile,” Se ene ni yotshe ngamu yakwe va to kholwa ka Jesu. 54Ngu txona txidiwukiso txa wumbidi, atxi Jesu a nga txi maha, ngako a di hokile Galileya, a txi ta ngu Judheya.

will be added

X\