JOHANE 21

1Msana keto, Jesu a ti wonekisile kambe ka vagondiswa, hafuhi ka Digova da Tiberiyadhe. A ti wonekisisile tiya: 2Va ti ka wukhalo wumwewo Simoni Pedro, Tomasi, awu a dhanwako ku i Dhidhimo, ni Nataniyeli, awule i nga ti wa Kana ka Galileya, kumweko ni vanana va Zebhedhewu ni vamwane vagondiswa vakwe va vambidi. 3Simoni Pedro a to va gela a txi khene: “Na nga ya kukokani.” Vona va to xamula va txi khona: “Nanathu hi na tsula kumweko ni nawe.” Se va to huma ve ya bela mu ngalavani, aniko ka wule wusiku kha va mana txilo. 4Mbimo yi di nga txa, Jesu a to ti wonekisa kwawe, likasani ka linene, aniko vagondiswa kha va ti ziva ti to ngene. 5Senikoko Jesu a va gete, a txi khene: “Vanangu, mina ni sihaka kani?” Vona va to xamula, va txi khona: “Ahim-him.” 6Ene a to va gela ku khene: “Betani likoka ka ditshelo da txinene ka ngalava, mi na si mana.” Vona va to beta likoka, se ve tandeka ni ku li ndinda, ngu kutala ngutu ngu sihaka. 7Konaho mgondiswa wule wo randeka a to womba, a txi khene: “Ngene Mkoma!” Se mbimo yi Simoni Pedro a nga engisa ti to i Mkoma, a to ambala dibhaji, nguko a ti sa ambala txilo, se a txi pumula lineneni. 8Vamwane vagondiswa va nga ti kulenyana, ka mpimo wa mazana mambidi a makando, va to wuya ni ngalava, na va txi ndinda likoka, li li nga ti tate ngu sihaka. 9Va di humile hahanze, va to wona konaho makala a mndilo ni sihaka txitimwi ka ona ni dipawu. 10Jesu a to va gela, a txi khene: “Wuyisani sihaka si mi nga koka konkuwa.” 11Simoni Pedro a to bela mu ngalavani, a txi ndinda likoka, a txi li humisa hahanze, ali li nga tala ni sihaka sa hombe sa dizana ni mtxhanu wa makumi ni sihaka siraru. Hambiko i nga ti sa singi, likoka kha la vharuka. 12Jesu a va gete, a txi khene: “Ngonani, mi ta susula.” Ni mmweyo wa vagondiswa kha tsana ku mu wotisa, a txi khene: “Ngawe mani?”, nguko va ti zivile ti taku ngene Mkoma. 13Senikoko Jesu a to tshuketa hafuhi, a txi teka dipawu a txi va ninga; a txi mahisa toneto kambe ngu sihaka. 14Atxiya txikhati nja wuraru, Jesu a nga ti wonekisa ngu txona ka vagondiswa vakwe, msana ka kuva a di wukile ngu ka vafi. 15Ngako va di gwitile kudya, Jesu a to wotisa ka Simoni Pedro, a txi khene: “Simoni, mwana Johane, awe wa ni randa kupinda vava kani?” Ene a xamute, a txi khene: “Mkoma, wa ti ziva ti to ani na ku randa.” Jesu a to mu gela, a txi khene: “Risa tinvuta tangu.” 16A to engeta da wumbidi, a txi khene: “Simoni, mwana Johane, awe wa ni randa kani?” Ene a xamute, a txi khene: “Inna, Mkoma, awe wa ti ziva ti to ani na ku randa.” Jesu a mu gete, a txi khene: “Risa tinvuta tangu.” 17A to mu wotisa da wuraru, a txi khene: “Simoni, mwana Johane, awe wa ni randa kani?” Pedro a to thelwa dikhodho nguko Jesu a nga mu wotisa ka wuraru, a txi khene: “Awe wa ni randa kani?” Se a mu xamute, a txi khene: “Mkoma, awe wa ti ziva totshe. Awe wa ti ziva tatinene ti to ani na ku randa.” Jesu a mu gete, a txi khene: “Risa tinvuta tangu. 18Ngu ditshuri, ngu ditshuri na ku gela ku khani: Mbimo yi u nga ti mfana, ngawe upune u nga txi ti sunga libhande txiwununi, u txi ya muwa u nga txi ku lava, aniko mbimo yi u no kumba, u na nawuluta manza ako, se mmwane ngene a no ku sunga libhande, a txi ku yisa ni mu awe u si ku laviko.” 19Ene a wombile tiya, kasi kukombisa mxowo wa lifo li Pedro a no dhumisa ngu lona Txizimu. Msana ka mapswi awa, a to mu gela ku khene: “Ni londise!” 20Pedro ngako a txi tshembereka, a to wona mgondiswa wu a randwako ngu Jesu, na a txi va londisa. I ti wule a nga txi tshikila ha khana kwakwe Jesu txilaleloni, a txi mu wotisa ku khene: “Mkoma, i mani wu a no ku ningela kani?” 21Se Pedro a di mu woni, a to womba ka Jesu, a txi khene: “Mkoma awuwa-ko, nji txani txi no maheka kwakwe kani?” 22Jesu a to khene kwakwe: “Ngako ni txi lava ku a na zumbe kala ni wuya, ku nga va i di txani kwako kani? Awe ni londise!” 23Ngu konaho mhaka yiya yi to hangalaka hagari ka vanawe, ti to mgondiswa wule kha na mbi fa. Kambe Jesu kha womba tona taku khene kha na mbi fa; aniko a ti khene: “Ngako ni txi lava ku a na zumbe kala ni wuya, ku nga va i di txani kwako kani?” 24Mgondiswa wuwa ngene a fakazako timhaka tiya, ngene kambe a nga ti bhala. Kambe ha ti ziva ti to wufakazi wakwe mbwa ditshuri. 25Ti ngadi ho timwane timhaka to tala, ati Jesu a nga ti maha. Se idiku ti ti bhatwe yimweyo ngu yimweyo, kha ni thembi ti to ditiko dotshe di nga dingana mabhuku awa ma ndino bhalwa.

will be added

X\