JOHANE 20

1Ka ditshiku do khata ka divhiki, ku di ngadi phum, Maria, wa Magdhala, a to vindukela a txi ya diyivani, se a txi ya mana dirigwi di di thavisilwe ha diyivani. 2Se e tutuma a txi ya gela Pedro ni mmwane mgondiswa wu Jesu a nga ti mu dhunda, a txi khene kwawe: “Va thavisile Mkoma diyivani, se kha ni ku zivi amu va nga mu veka kona.” 3Pedro a to khukha kumweko ni mmwane mgondiswa, ve tsula diyivani. 4Va ti tutuma votshe ngu wumbidi wawe, kambe mgondiswa wule mmwane, i nga ti wa livilo kupinda Pedro, a to mu siya msana, a txi thanga ene a txi hoka diyivani. 5Se ngako ene a di namile e solela, a to wona tinguwo to basa ti di vekilwe hahatshi, kambe kha wulela. 6Se Simoni Pedro, a nga txi londeta ngu msana, a to bwaka nene, se e wulela diyivani a txi wona tinguwo ti di vekilwe hahatshi, 7Kambe nguwo yi va nga ti mu phutete ngu yona msungo yi ti sa vekwa wukhalo wumwewo ni timwane, aniko yi ti petetwe yi vekwa ngu phuho, yona yokha. 8Mgondiswa wule mmwane a nga thanga ene a txi hoka ha diyivani, nene a wulete, a txi ti wona, se a txi kholwa. 9Nguko kha ditshuri va ti sa nzi ku ti manisisa ti to Ene a ti fanela kuwuka ngu ka vakufa, madingano ni kuwomba ka Mibhalo. 10Se vagondiswa va to tshumela ve tsula mwani. 11Maria a ti emile hahanze, hafuhi ni diyiva, a txi dila. Se a di ngadi a txi dila, a to nama e solela diyivani, 12e wona tingelozi timbidi, ti di ambate so basa, na ti di khalahatshile ka wukhalo wuwa txirumbi txa Jesu txi nga ti otelisilwe kona, yimweyo yi di ngu misungoni, yimwane yi di ngu minengeni. 13Ti wombile kwakwe ti txi: “Wamsikati, u dilela txani?” Ene a to khene ka tona: “Ngukusa va thavisile Mkoma wangu, se kha ni ku zivi amu va nga mu veka kona.” 14Kutingako a di wombile eto, a to tshembereka a txi wona Jesu a di emile, kambe a si mu zivi ti to i Jesu. 15Jesu a txi khene kwakwe: “Wamsikati, u dilela txani kani? U lava mani kani?” Ene, ngu kupimisa ti to i mxayisi wa thembwe ya siluva, a to khene kwakwe: “Mkoma, ngako i di awe u nga mu thavisa, ni gele ahawa u nga mu veka kona, ni na ya mu teka.” 16Jesu a to mu gela ku khene: “Maria!”, ene a to tshembereka, a txi womba ngu Txihebheru, a txi khene: “Rabbuni!” ati ti wombako ku “Mgondisi.” 17Jesu a to khene kwakwe: “U nga ni gwese, ngukusa kha ni nzi kuya ka Tata. Aniko tsula ka vanathu, u txi ya va gela, u txi khawe: Na kwela, ni ya ka Tate wangu, i ku Tate wanu; ka Txizimu txangu, i ku Txizimu txanu.” 18Maria wa Magdhala a to ya gela vagondiswa, a txi khene: “Ni woni Mkoma, ngene a nga ni gela tiya.” 19Minovani ka ditshiku dile, i ku ditshiku do khata ka divhiki, vagondiswa va ti maneka va di tshanganile ka wukhalo wo kari, va txi ti sekela matimba, ngu kuthava Vajudha. Se Jesu e wulela, a txi ema hagari kwawe, a txi va losa ngu mapswi awa: “Kudikha ku na ve ni nanu!” 20A di wombile toneto, a to va komba manza ni didhawa dakwe. Vagondiswa va to tsaka ngu kuwona Mkoma. 21Ene a to engeta a txi khene: “Kudikha ku na ve nanu! Nga ti Tate a nga ni ruma, nanani na mi ruma.” 22A di wombile tiya, a to va futetela, na a txi khene: “Amukelani Moya wo Sawuleka. 23Ka vale mi no va divalela siwonho, va na divalelwa; ani vale mi no mbi va divalela siwonho, kha va na mbi divalelwa.” 24Tomasi, mmweyo wa vale va Digumi ni Vambidi, awule a dhanwako ku i Dhidhimo, a ti singa ho navo, mbimo yi a nga ta Jesu. 25Vamwane vagondiswa va mu gete, va txi khona: “Hi woni Mkoma!” Aniko ene a to khene kwawe: “Ani ngako ni si woni mu ka manza akwe timbowo ta sipikiri, ngako kambe ni si wuleti litiho langu mu ka timbowo ta sipikiri, ni ku veka dianza dangu ha didhawani kwakwe, kha ni na mbi kholwa.” 26Ku di pindile mtxhanu wa masiku ni mararu, va to tshangana kambe vagondiswa nyumbani, se Tomasi a titi ho nene. Ku di sekilwe matimba, a to ta Jesu, a ta ema hagari kwawe, na a txi va losa kambe ngu mapswi awa: “Kudikha ku na ve ni nanu!” 27Ngu msana a to gela Tomasi, a txi khene: “Tisa litiho lako ahawa, u txi wona manza angu; tshuketisa dianza dako, u txi di beta ha didhawani kwangu, u nga swe kambe u txi ti maha mkaneti, aniko kholwa.” 28Se Tomasi a to khene: “Mkoma wangu ni Txizimu txangu!” 29Jesu e tshumela a txi khene kwakwe: “Akuwa u nga ni wona, wa kholwa. Va katekile avale va kholwako, hambi va sa wona!” 30Simwane sidiwukiso sa singi a si mahile Jesu masoni ka vagondiswa, asiya si nga mbi bhalwa ka dibhuku diya. 31Kambe timhaka tiya ti nga bhalwa, ti bhaletwe ku mi txi kholwa ti to Jesu ngene Kristu Mwanana wa Txizimu, ni ti to, ngu kukholwa kuwa, mi na mana kuhanyiswa ngu ditina dakwe.


Copyright
Learn More

will be added

X\