JOHANE 2

1Ngu ditshiku da wuraru, ku mahilwe mtxhadho Kana ka Galileya. Se a titi ho koneyo Mame wa Jesu. 2Jesu nene a ti rambilwe kona mtxhadhoniyo kumweko ni vagondiswa vakwe. 3Kutingako vhinya yi di gumile, Mame wa Jesu a to mu gela ku khene: “Kha va nga ni vhinya.” 4Aniko Jesu a ti khene kwakwe: “Wamsikati, mhaka yako ni nani ngu yihi kani? Txikhati txangu kha txi nzi kuhoka.” 5Se Mame wakwe a to gela sithumi, a txi khene: “Mahani totshe ti a no mi gela.” 6Ti ti tsikaretilwe konaho mtxhanu wa tifuko ni yimweyo, ta mraka, ngu mhaka ya kusamba, mayelano ni kuruma ka mlayo wa Vajudha. Yimwane ni yimwane ka tona yi ti tatwa ngu mipimo mimbidi mwendo miraru ya so thelwa. 7Jesu a to va gela ku khene: “Ti tateni ngu mati.” Se vona va ti tatile ti txi fi. 8Msana keto, a ti khene kwawe: “Konkuwa, rekani mi txi ya ninga mthangeli wa m'buso.” Se vona ve ma yisa kwakwe. 9Mbimo yi mthangeli wa m'buso, a nga tshurumba mati ale ma nga hindulwa me mahwa vhinya, ene a si ti zivi ti to vhinya yiya yi ta ngu hani; aniko ti txi ziwa tsena ngu sithumi, si si nga reka mati. Konaho mthangeli a to dhana mteki, 10a txi mu gela ku khene: “Votshe vathu va thanga ngu vhinya ya yinene ve yi humisa, se ngako va di sete tatinene ava va nga rambwa, ngu kona va humisako yo va i singa ya yinene ngutu. Kambe awe u veketile vhinya ya yinene kala ayi mbimo!” 11Makhato awa a sidiwukiso, Jesu a ma mahete Kana ka Galileya, e komba wudhumo wakwe, se vagondiswa vakwe va to kholwa kwakwe. 12Msana ka tiya, Jesu a to relela e ya Kapernawume, ene ni mame wakwe ni vanawe ni vagondiswa vakwe. Va ti ya zumba kona masiku madotho. 13Pasika ya Vajudha yi ti hafuhi, se Jesu a to kwela Jerusalema. 14Dithepeleni, a to ya mana vathu va va xavisako tihomu ni tinvuta ni situvane, ni va va txitxako timale va di zumbile konamo. 15Kutingako a di mahile txisepu ngu tingoti, a to va tovela votshe Dithepeleni, ni tinvuta ni tihomu; a txi hangalasa ni male ya vale va bhindulako, e retha ni timeza tawe ti wela. 16A txi gela va va xavisako situvane a txi khene: “Thavisani sotshe siya hawa; mi nga tekeni nyumba ya Tate wangu mi yi maha nyumba ya mabhindu.” 17Se vagondiswa vakwe va to alakanya ati ti nga ti bhatwe, taku: “Kupandisekela nyumba yako ku na ni dya.” 18Se Vajudha va to wombawomba, va txi khona kwakwe: “Njikombiso muni u hi kombisako ngu txona ti to u na ni mtamo wa kumaha toneto kani?” 19Jesu a to xamula a txi khene: “Khundumusani Dithepele diya, ani ni na di wusa ngu masiku mararu.” 20Se Vajudha va txi khona: “Dithepele diya di akilwe ngu mune wa makumi a malembe ni mtxhanu ni dimwedo, se awe u khawe u na di wusa ngu masiku mararu kani?” 21Aniko ene a titi womba ngu dithepele da mmidi wakwe. 22Ngu toneto, mbimo yi a nga wuka ngu ka vakufa, vagondiswa vakwe va to khumbula ti to a va gete mhaka yiya; se ve kholwa ka Mibhalo ni ka dipswi di di nga wombwa ngu Jesu. 23Ene a di ngadi Jerusalema, ngu mbimo ya m'buso wa Pasika, vathu va vangi va to kholwa ditinani kwakwe, ngako va nga txi wona sixamaliso si a nga txi si maha. 24Kambe Jesu kha va themba, nguko a ti va ziva votshe, 25i ti singa wo lava kumaha ngu kugelwa ta mthu, ngukuva ene a txi ti ziva ti ti ku timbiluni ka vathu.

will be added

X\