JOHANE 18

1Jesu ngako a di gwitile kuwomba mapswi awa, a to khukha ni vagondiswa vakwe, ve ya mtxhatuko ka lidhonga la Kedroni, ahawa ku nga ti ni thembwe ya siluva, se Jesu a to wulela konemo ni vagondiswa vakwe. 2Judhasi awu a nga ti lava ku mu ningela, a ti wu ziva wukhalo wule, ngukusa Jesu a txi talisa kuya tshangana kona hale sikhati so tala ni vagondiswa vakwe. 3Senikoko, Judhasi a to teka mtxawa wa masotxhwa ni simwane sithumi sa vaphaxeli va hombe ni vafarisi, e tsula navo koneyo, na va di xomile malambu, ni misanje ni matxhari. 4Jesu, ngu kuziva atiya ti nga ti lava ku mu humelela, a to va tshuketela hafuhi, a txi khene kwawe: “Mi lava mani kani?” 5Vona va to xamula, va txi: “Hi lava Jesu wa Nazareta.” Se Jesu a to va gela, a txi khene: “Ngani wuwa.” Se Judhasi muwongi, a ti navo. 6Mbimo yi Jesu a nga va gela a txi khene: “Ngani wuwa”, va to xexa ve wa ngu nyatxisane. 7Se ene a to va wotisa kambe, a txi khene: “Mi lava mani?” Vona va to khona: “Hi lava Jesu wa Nazareta.” 8Se Jesu a to xamula, a txi khene: “Ni mi gete kale ti to khani: ‘Ngani wuwa; ngako i di ditshuri ti to mi lava ani, lekani avava ve tsula.’ ” 9Ti mahekile tiya kasi kutatiseka dipswi di Jesu a nga di womba, a txi khene: “Ka vale u nga ni ninga, a walo ni wammweyo ni nga mwalalelwa ngene.” 10Simoni Pedro a nga ti ni ditxhari, a to di swomola e peka ngu dona mmweyo wa txithumi txa mphaxeli wa hombe, e txi bukuruta nzeve ya txinene. Txithumi txiya txi ti dhanwa ku i Malkusi. 11Aniko Jesu a to gela Pedro, a txi khene: “Txhomeka ditxhari dako msavani ka dona. Kha ni na mbi sela digombe da sixaniso di ni nga ningwa ngu Tate kani?” 12Se mtxawa wa masotxhwa ni nduna ya ona ni maphoyisa a Vajudha, va to ñola Jesu, ve mu sunga, 13ve mu yisa, kuthanga, ka Anasi, tate wa msikati wa Kayifasi, i nga ti Mphaxeli wa hombe wa dilembedo. 14Kayifasi wuwa, ngu wule a nga womba dipswi da wusungukati ka Vajudha, a txi khene: “Ti ni fanelo mthu mmweyo a txi fela votshe vathu.” 15Simoni Pedro a ti londetela Jesu ngu msana, a di kumweko ni mmwane mgondiswa. Mgondiswa wuwa a titi ziwa ngu mphaxeli wa hombe. Se e wulela kumweko ni Jesu mtendelani ka Mphaxeli wa hombe. 16Se Pedro a to ema ha txikeni ngu hahanze. Se awule mmwane mgondiswa, a nga ti ziwa ngu Mphaxeli wa hombe, a to huma e ya wombawomba ni wamsikati i nga ti muwoneleti wa ha txikeni: ene a to wuleta Pedro. 17Se awule wamsikati, i nga ti muwoneleti wa ha txikeni a to gela Pedro, a txi khene: “Ina awe khu nga mmweyo wa vagondiswa va ene wule kani?” Aniko ene a to xamula, a txi khene: “Kha ni nga ene ani!” 18Se si titi ho konaho sithumi ni maphoyisa, va nga ti dhivete mndilo wa makala ve wora, nguko ku ti ni pheho ngutu. Pedro nene a ti navo, a txi wora mndilo. 19Senikoko, Mphaxeli wa hombe a to wotisa Jesu ngu mhaka ya vagondiswa ni kugondisa kwakwe. 20Jesu a to mu xamula a txi khene: “Mahungu angu ni ma wombete ha kubasani, ditikoni muwa. Ni khala ni txi gondisa yotshe mbimo masinagogani ni Dithepeleni, ahawa va tshanganelako kona votshe Vajudha, txi walo ni txa tximwetxo ni nga womba ngu malengo. 21Se u ni wotisela txani? Wotisa avale va nga engisa ati ni nga va gondisa; vona va ti zivisisa ati ni khalako ni txi womba.” 22Kambe, neti Jesu a nga gwita kuwomba tiya, mmweyo wa diphoyisa, a nga ti emile konaho ato mu yamasa ngu mpama, a txi khene: “Ngu toneto u angulisako tona Mphaxeli wa hombe kani?” 23Se Jesu a to xamula, a txi khene: “Ngako ni di sindilwe kuwomba, ni kombe txihoxo txangu, se ngako ni sa sindwa, u ni pekela txani?” 24Msana keto, Anasi a to rumela Jesu, a di sungilwe, ka Mphaxeli wa hombe Kayifasi. 25Seni Simoni Pedro a titi ho kona hale, a txi wora mndilo. Se ve mu wotisa, va txi: “Ina kasi awe khu nga mmweyo wa vagondiswa vakwe?” Kambe ene a kanetile, a txi khene: “Kha ni nga mmweyo wawe ani!” 26Se mmweyo i nga ti txithumi txa Mphaxeli wa hombe, dixaka da wule a nga wilwa nzeve, a to khene: “Ina txima kha na ku wona awe thembweni niya ka siluva kumweko nayo kani?” 27Pedro a to kaneta kambe. Se kunukunuko mkuku wu nje kuemba. 28Seni vona va to teka Jesu ve khukha nayo mtini ka Kayifasi, ve mu heleketa nyumbani ka wukoma. I ti mixo. Vona kha va wulela nyumbani mule ka wukoma ngu kuthava ku ti nyenyezisa, kasi va txi na mana kudya Pasika. 29Pilato a to huma hahanze, a txi va tshuketela hafuhi, a txi khene kwawe: “Mi mangalela mthu wuwa ngu mhaka muni?” 30Vona va to mu xamula, va txi: “Idiku wo va a singa ni mnandu, nga hi sa mu tisa hawa kwako.” 31Pilato a to va gela, a txi khene: “Mu tekeni anu mi txi mu thethisa nga ti mlayo wanu wu wombisako tona.” Vajudha va to angula, va txi khona: “Kha hi tumelelwi kudaya mthu.” 32Atiya ti mahekile kufela kutatiseka dipswi di Jesu a nga di womba ngu ti a no fisa tona. 33Pilato a to tshumela e wulela nyumbani ka wukoma, e dhana Jesu, a txi khene kwakwe: “Ina awe u mfumeli wa Vajudha, kani?” 34Jesu a to mu xamula, a txi khene: “U womba eto ti txi khukhela ha msungo kwako, mwendo i mmwane mthu a nga ku bhulela mhaka yangu kani?” 35Pilato a to xamula, a txi khene: “No va ni di Mujudha ani kani? Ditiko dako ni vaphaxeli va hombe ngu vona va nga ku ningela manzani kwangu. Nji txani u nga maha kani?” 36Jesu a to xamula, a txi khene: “Wukoma wangu hi nga wa ditikoni muwa. Idiku wukoma wangu mbwa ditikoni muwa, nga mahalamu angu ma txi ni lwela, kasiku ani ni si ningelwi manzani ka Vajudha. Se ngu toneto, wukoma wangu hi nga wa muwa.” 37Pilato a to mu xamula, a txi khene: “Kepa awe u mfumeli?” Jesu a to xamula, a txi khene: “Ngawe u wombako ti to ani ni mfumeli! Ni velekilwe kambe ni tile ditikoni muwa, kasiku ni ta maha fakazi ya ditshuri; wuhi ni wuhi i ku wa ditshuri wa engisa dipswi dangu.” 38Se Pilato a to khene: “Ditshuri ngu txani?” Se a di wombile tiya, a to huma kambe e tsula ka Vajudha, a txi ya khene kwawe: “Ani kha ni mani mnandu ni wa wumwewo ka mthu wuwa. 39Ngu mbimo ya Pasika, mi ni tolovelo ya kukombela ni thukunyula mmweyo ka va va sibotxhwa. Se ma ti lava ni thukunyula mfumeli wa Vajudha kani?” 40Vona va to kwangula, va txi khona: “U nga thuse eyo, thusa Bharabhasi!” Kasi Bharabhasi wuwa i ti mbafa.

will be added

X\