JOHANE 17

1Jesu ngako a di wombile timhaka tiya, a to gula maso a txi wona nzumani, a txi khene: “Tata, txi hokile txikhati. Dhumisa Mwanana wako, kufela ku nene Mwanana wako e ku dhumisa, 2nguko u mu ningile mtamo txitimwi ka votshe vathu, kasiku e ninga wutomi wo mbi guma ka votshe vale u nga va ningela kwakwe. 3Se wutomi wo mbi guma ngu kuva va txi ku ziva, awe, u ku Txizimu txa tximwetxo txa ditshuri, ni Jesu Kristu, awu u nga mu ruma. 4“Ani ni ku dhumisile ha ditikoni, ngu kuhetisa mthumo wu u nga ni sikela wona ti to ni wu maha. 5Se konkuwa, ni dhumise, awe Tata, masoni kwako, ngu wudhumo wule ni nga ti nawo, kumweko ni nawe, na ditiko di sa nzi kumahwa. 6“Ni wonekisile ditina dako ka vathu va ditiko, avale u nga ni ninga. Vona i ti vako, aniko awe u ni ningile, vona va veketile dipswi dako. 7Akuwa, va ti ziva ti to sotshe si u nga ni ninga si ta ngu kwako; 8Nguko ni va ningile mapswi awa awe u nga ni ninga, se vona va ma amukete; va ti ziva ngu ditshuri ti to ni ta ngu kwako, kambe va tumela ti to ngawe u nga ni ruma. 9Ani na va khongelela, kha ni khongeleli ditiko, aniko ni khongelela va u nga ni ninga, ngukusa mbako. 10Sotshe si i ku sangu nzako, ni sotshe si i ku sako nzangu; ngu toneto na dhumiswa ngu vona. 11Ani kha ni nga ngadi ha ditikoni, kambe vona va ngadi sate ha ditikoni, se ani ni ta kwako. Tate wa kusawuleka, va xayise ditinani kwako, ava u nga ni ninga, kasiku va na maha mmweyo, nga athu hi ku mmweyo. 12Ni di ngadi navo ha mafuni, ni ti va xayisa ditinani kwako. Ni va xayisile ava u nga ni ninga; se kha ku nga ho ni wammweyo a nga lova, i singa ene mwanana wa kulova, kufela ku Mibhalo yi tatiseka. 13Se konkuwa ni ta kwako, aniko ni womba timhaka tiya ni di ngadi ha mafuni, kasiku, kutsaka kwangu ku va kwawe ngu kutatiseka. 14Ni va ningile dipswi dako, se ditiko da va vengela, nguko hi nga va dona ditiko, nga ani ni ku singa wa ditiko. 15Kha ni ku kombeli ti to u va thavisa ha ditikoni, aniko ngu ti to u txi va vhikela ka M'bihi. 16Hi nga va ditiko nga ani ni ku singa wa ditiko. 17Va sawulekise ngu ditshuri. Dipswi dako ngu dona ditshuri. 18Ngako u nga ni ruma ha ditikoni, nanani ni va rumile ha ditikoni. 19Se ni sawulekisele vona, ti to nivona ve sawulekiswa ditshurini. 20“Kha ni khongeleli vona dwe, kambe ni khongelela nivona va va no kholwa kwangu ngu dipswi dawe. 21Votshe va na ve mmweyo, nga ku awe, Tata, u ku kwangu, ni nani ni ku kwako, nivona va na ve kwathu, kasiku ditiko di txi kholwa ti to u ni rumile. 22Ni va ningile kuphatima kuwa awe u nga ni ninga, kasiku va txi va i di mmweyo, nga athu hi ku mmweyo: 23Ani kwako ni nawe kwangu, kasiku va txi va i di va kutatiseka amu ka wumwewo, ni ti to ditiko di txi ti ziva taku awe u ni rumile, ni ti kambe taku awe u va randile, nga ti u nga ni randisa tona ani. 24Tata, ni dhunda ti taku avale u nga ni ninga, ve va ni nani, ahawa ani ni ku kona, kasiku ve wona kuphatima kwangu, kuphatima kuwa u nga ni ninga awe; nguko awe u ni randile u sa nzi kuvanga ditiko. 25Tate wa kululama, hambi ditiko di sa ku ziva, ani ni ku zivile, nivona va ti zivile ti taku u ni rumile. 26Ni va ningile kuziva ditina dako, kambe ni ngadi ni txi na va ninga ku di ziva, kasiku lirando li u nga ni randa ngu lona, li va li di kwawe, ni nani ni va ni di kwawe.”

will be added

X\