JOHANE 13

1Na ku sa nzi kuhoka M'buso wa Pasika, Jesu, ngu kuziva ti to txi hokile txikhati txakwe, txa kupinda ka ditiko diya e tsula ka Tate, Ene a nga titi va randa vathu vakwe, va ku ha mafuni, a va kombile lirando kala kuhoka magwito. 2Se hagari ka kulalela, ngako Sathane a nga ti wulete mapimoni ka Judhasi Iskariyoti, mwanana wa Simoni, kufela ku ene e ningela Jesu; 3Se, kota nga ti Ene Jesu a nga txi ti ziva ti to Tate a mu ningile sotshe manzani kwakwe, ni kuziva ti to Ene a ta ngu ka Txizimu, kambe a na tshumela e tsula ka txona Txizimu, 4a to khukha e leka sakudya e thavisa nguwo, a txi teka dithawula e di sunga txiwununi. 5Msana keto, a to thela mati mu ka mkamba, e khata kusambisa mikondo ya vagondiswa e yi bahulela ngu dithawula di a nga ti di sungile txiwununi. 6Mbimo yi a nga hokela Simoni Pedro, ene Pedro a to angula, a txi khene: `“Mkoma, u lava ku ni kuwula mikondo awe?” 7Jesu a to mu xamula, a txi khene: “Ati ni ti mahako khu na ku ti ziva konkuwa. U na ti manisisa msana ka mbimo.” 8Kambe Pedro a to khene: “Ani txima khu na mbi ni sambisa mikondo.” Konaho Jesu a to khene: “Ngako ni si ku sambisi mikondo, khu si koti kuva ni txiavelo ni nani.” 9Se Simoni Pedro a to khene: “Mkoma, u nga sambise mikondo basi, aniko ni sambise niona manza ni msungo.” 10Se Jesu a to khene: “Awu a nga samba, kha nga ni fanelo ya kusambiswa kambe, hahanze ka mikondo basi, nguko wotshe mmidi wakwe wu basile: Se nananu mi basile, kambe hi nga anu motshe.” 11Nguko ene a ti mu ziva awu a no mu ningela. Ngu kota yeto, a wombile a txi khene: “Hi nga anu motshe mi nga basa.” 12Msana ka kuva a di va sambisile mikondo, a to tshumela a txi ambala siambalo sakwe, a txi ya khalahatsha kambe ha sakudyani, a txi khene: “Ma ti mana ati ni nga ti maha kwanu kani? 13Anu mi ni dhana ngu ditina da ku ni Mgondisi ni Mkoma; inna, mi womba tona, nguko hakunene, ngani. 14Se ngako ani ni ku Mgondisi ni Mkoma, ni nga mi sambisa mikondo, nananu mi fanela kusambisana mikondo ngu txanu. 15Ani ni mi mahete txikombiso, kufela ku, ati ni nga mahisa tona kwanu, nananu mi na mahisa toneto. 16Ngu ditshuri, ngu ditshuri na mi gela ku khani: Txithumi hi nga txa hombe ka mkoma wa txona; ni txirumwa hi nga txa hombe ka wule a nga txi ruma. 17Ngako mi txi ti ziva tiya ni ku ti thuma, mi katekile. 18“kha ni wombi ngu nganu motshe; na va ziva ava ni nga va sawula. Aniko ta laveka ti to Mibhalo yi tatiseka, ayi yi ku: ‘Awu a dyako mndiwo ni nani, a ni wukete a txi ni ganyata ngu txizenende txakwe.’ 19Na mi gela mhaka yiya, yi si nzi kumaheka, kasiku, ditshiku di yi humelelako, mi na kholwa ti to ‘Ani Ngani.’ 20Ngu ditshuri, ngu ditshuri, na mi gela ku khani: Awule a amukelako wuhi ni wuhi ni no mu ruma, a amukela ani nipune; awule a ni amukelako, a amukela awu a nga ni ruma.” 21Kutingako Jesu a di wombile timhaka tiya, a to pandiseka moyani, e tsanisa a txi khene: “Ngu ditshuri, ngu ditshuri, na mi gela ku khani: Mmweyo wanu a na ni ningela.” 22Konaho vagondiswa va to wonana ngu txawe va si ti zivi ti to a wombawomba ngu mani. 23Kambe mmwane wa vagondiswa vakwe, awuwa Jesu a mu randako, a ti khigetete ha khana ka Jesu. 24Se Simoni a to mu kweseta a txi: “Mu wotise ti to a womba mani.” 25Ene, kutingako a di wekelete ha khana ka Jesu, a to mu wotisa, a txi khene: “Mkoma, i mani kani?” 26Jesu, a to mu xamula a txi khene: “Ngu wule ni no mu ninga txikhwemu txi ni no thanga ngu ku txi beta.” Kutingako a di txi betile, a to txi ninga Judhasi Iskariyoti, mwana Simoni. 27Kutingako ene a di amukete txikhwemu, Sathane a to mu wulelela. Se Jesu a txi khene kwakwe: “Ati u ti mahako, kuluveta u txi ti maha.” 28Kambe ku ti singa ni wammweyo ka vale va nga titi ho koneho, a nga ti manisisa ti to a wombela txani mapswiyo. 29Ngako Judhasi i nga ti ene mñoli wa msava wa male, vamwane va to alakanya ti to Jesu a mu gela ku a na xave asi si lavekako m'busoni, mwendo kuya ninga somaha ka sisiwana. 30Kutingako a di tekile txikhwemu txile, Judhasi a to huma kunukunuko. I ti wusiku. 31Msana ka kuva ene Judhasi a di humile, Jesu a to womba a txi khene: “Konkuwa se a pfalisilwe Mwanana wa Mthu. Txizimu ni txona txi pfalisilwe kwakwe. 32Ngako Txizimu txi di pfalisilwe kwakwe Mwanana, ni txona Txizimu txi na mu pfalisa kunukunuko. 33Vanangu: Ani ni ngadi ni nanu txikhatianyana txidotho. Mi na ni lava, aniko, nga ti ni nga wombisa tona ka Vajudha, nananu konkuwa na mi gela ku khani: ‘Ahawa ani ni yako kona, anu kha mi si koti kuta kona.’ 34Na mi ninga mlayo wa wuphya: Randanani! Nga ti ani ni nga mi randa, nananu mi fanete kurandana. 35Ngu toneto va no mi zivisa tona ti taku mi vagondiswa vangu: Ngako mi txi randana.” 36Simoni Pedro a txi khene kwakwe: “Mkoma, u ya hani kani?” Jesu a to mu xamula, a txi khene: “Ahawa ani ni yako kona, awe khu na ku ni londisa konkuwa. Aniko ngu msana, u na ni londisa.” 37Pedro a to khene kwakwe: “Mkoma, ni nga tandekisa ku txani ku ku londisa konkuwa kani? Ni na ningela wutomi wangu ngu kota yako.” 38Jesu a to mu xamula a txi khene: “U khawe u na ningela wutomi wako ngu kota yangu? Ngu ditshuri, ngu ditshuri, na ku gela ku khani: Mkuku wu si nzi kuemba, awe u na va u di ni lambile kararu.


Copyright
Learn More

will be added

X\