JOHANE 12

1Ngako ku di ngadi sate mtxhanu wa masiku ni dimwedo kasi ku na va Pasika, Jesu a to hoka Bhetaniya, ahawa a nga ti zumba kona Lazaro, awu a nga wuswa kufani ngu Jesu. 2Va to mu mahela txilalelo koneyo. Marta a titi va thumela, se Lazaro i ti mmweyo wa vale va nga ti nayo ha sakudyani. 3Se Maria a to teka mafura o bhumula, a nardhu, o mbi patelwa ni txilo, o dhula ngutu, e tota mikondo ya Jesu, se e mu bahulela mikondo ngu misisi yakwe. Nyumba yi txi tala ngu kubhumula ka mafura. 4Se Judhasi Iskariyoti, mmweyo wa vagondiswa vakwe, awu a no mu ningela, a txi khene: 5“Ngu ku txani mafura awa ma nga mbi xaviswa ngu mazana mararu a madhenari, me ningwa sikulungu, kani?” 6Ene a wombisile eto, i singa ngu kuthela kota ngu sikulungu, aniko nguko i nga ti dikhamba da kupa asi si nga txi vekwa msavani, nguko i ti ene, i nga ti mñoli wa wona. 7Jesu a to xamula a txi khene: “Mu lekeni, ene a ma xayisela ditshiku da kutshotshwa kwangu. 8Nguko sikulungu si ni nanu otshe masiku, aniko ani kha mi nga ni nani otshe masiku.” 9Se Vajudha va vangi, ngako va di engisile ti to Jesu wa ho konaho, va to ya, na i singa kuyela kuya wona Jesu dwe, aniko i ti kuyela kuya wona Lazaro nene, awu ene a nga ti mu wusile ka vafi. 10Se vaphaxeli va hombe va to maha txikungo txa kudaya nene Lazaro. 11Ngukusa Vajudha vavangi va ti va tshuralela ngu mhaka yakwe, ve kholwa ka Jesu. 12Mangwanani ka kona, dibutho da hombe di nga ti tile M'busoni, ngako va di engisile ti taku Jesu wa ta Jerusalema, 13va to teka mahanga a mitxhese, ve mu hingeta, na va txi kwangula, va txi: “Hozana! A na dhumiswe awu a tako ngu ditina da Mkoma, Mfumeli wa Israyeli!” 14Kutingako Jesu a di mani tximbongolana, a to txi gadha, madingano ni ti ti nga bhalwa, va txi: 15“U nga thave, dihorana da Siyoni. Ndiyo wa ta Mkoma wako, a di gadhile mwanana wa mbongola.” 16Kukhatani, vagondiswa vakwe kha va ti engisisa khakwati timhaka tiya. Tsena mbimo yi Jesu a nga pfaliswa, ngu kona va nga khumbula mibhalo yi yi nga ti bhaletwe Ene, ni kuziva ti to ngu toneto va nga mu mahela tona. 17Votshe va va nga ti nayo va ti mu fakazela ti to ene a dhani Lazaro ngu dithowoni e mu wusa kufani. 18Ngu toneto, dibhuto di humile di txi mu hingeta, nguko va ti engisile ti to a mahile txidiwukiso txonetxo. 19Vafarisi va to gelana, va txi: “Hingani wona! Athu kha hi na mbi kota txilo. Ma ti wona ti to ditiko dotshe di londetela ene.” 20Hagari ka vale va nga ti tile M'busoni, kuta khozela, ku titi ho Vagriki. 21Vona va to ya ka Filipi, i nga ti wa Bhetsayidha ka Galileya, va txi ya kombela va txi khona: “Mkoma, hi lava kuwona Jesu.” 22Se Filipi a to ya gela Andrewu, senikoko Andrewu ni Filipi ve ya gela Jesu. 23Se ene a to va xamula a txi khene: “Txi hokile txikhati txa kupfaliswa ka Mwanana wa Mthu. 24Ngu ditshuri, ngu ditshuri, na mi gela: Ngako nyengi ya fulaho, yi yi wako mafuni, yi si fi, yi na zumba yokha. Aniko, ngako yi txi fa, yi ninga mihando ya yingi. 25Awule a dhundako wutomi wakwe a na mwalalelwa ngu wona, ani wule a vengelako wutomi wakwe ditikoni muwa, a na wu veketa kala kuhanyani ka wutomi wo mbi guma. 26Ngako mthu a txi lava ku ni thumela, a na ni londise, se ahawa ani ni ku kona, nene wule a ni thumelako a na va a di konaho. Se ngako mthu a txi ni thumela, Tate wangu a na mu dhumisa. 27“Se konkuwa, moya wangu wa pandiseka. Aniko, ni na womba txani? Ina ni na khani: Tata, ni hulukise ka txikhati txiya kani? Aniko ngu txona txiya txikhati ni nga tela txona. 28Tata dhumisa ditina dako.” Ti di mahile eto, ku to ta dipswi ngu nzumani, adi di nga womba ku khene: “Ani ni di dhumisile, kambe ni na engeta ni di dhumisa!” 29Dibutho da vathu va va nga ti konaho, va di pfite toneto, va to khona: “Txingwalangwanda.” Vamwanyane va txi khona: “I ngelozi, yi nga bwabwata nayo.” 30Jesu a to womba a txi khene: “Dipswi diya kha da humelela ngu mhaka yangu, aniko di humelete ngu mhaka yanu. 31Se ngu yona yiya mbimo ya kulamulwa ka ditiko. Ngu kona a no tovelwa mfumi wa mafu awa. 32Se nani, mbimo yi ni no va ni di guletilwe txitimwi ka mafu, ni na ndindela votshe vathu va txi ta kwangu.” 33Ene a wombisile tiya ngu kudinganisa ati a no fisa tona. 34Vathu va dibhuto va to xamula va txi khona: “Hi ti engisile amu ka Mlayo ti to Mesiya a na va ho kala kupinduka. Se u wombisa ku txani awe ti to Mwanana wa Mthu a fanete kuguletwa, kani? Mwanana wa Mthu wuwa ngu mani kani?” 35Se Jesu a to va xamula a txi khene: “Liwoningo li ngadi ni nanu ngu mbimoanyana. Tsimbilani mi di ngadi ni liwoningo, kasiku txidema txi si mi mani, nguko awu a tsimbilako txidemani, kha ku zivi amu a yako kona. 36Ngako mi di ngadi ni liwoningo, kholwani ka liwoningo, mi na phinduka mi va vanana va liwoningo.” Msana ka kuwomba timhaka tiya, Jesu a to khukha kwawe, e ya sisala. 37Hambiko a nga maha sidiwukiso so tala masoni kwawe, kha va kholwa kwakwe, 38kasi kutatiseka dipswi da mprofeti Isaya, a nga khene: “Mkoma i mani a nga kholwa ka mapswi athu, kani? Diwoko da Mkoma di wonekisilwe ka mani kani?” 39Ngu konaho, va tandekile kukholwa, ngukusa Isaya a tshumete a txi khene: 40“A phumisile maso awe e bangisa timbilu tawe, kasiku va si woni ngu maso, ni ku va si pimi ngu timbilu tawe, kufela ku va si hunduluki, nani ni si va hanyisi.” 41Isaya a wombile mapswi awa, nguko a woni kuphatima kwakwe, se e wombawomba ngu ngene. 42Hambi keto, vavangi hagari ka tinduna, va titi kholwa kwakwe; aniko, ngu mhaka ya kuthava Vafarisi, va si ti wombi ha kubasani, kasiku va si tovelwi disinagogani, 43ngukusa va randile kudhumiswa ngu vathu, kupinda kudhumiswa ngu Txizimu. 44Se Jesu a to kwangula a txi khene: “Awu a kholwako kwangu, kha kholwi kwangu, aniko a kholwa ka wule a nga ni ruma; 45Se awule a ni wonako, a wona ni wu a nga ni ruma. 46Ani ni liwoningo, ni tile ha mafuni, kasiku wuhi ni wuhi a kholwako kwangu, a si thuki e zumba txidemani. 47Ngako mthu a di engisile mapswi angu, a si ma veketi, hi nga ani ni mu abanisako, inkusa kha na tela kuta abanisa mafu, aniko ni tete kuta hanyisa mafu. 48Awu a ni lambako ni ku ambi amukela mapswi angu, a nayo muabanisi wakwe: Dipswi di ni nga di womba, ngu dona di no mu abanisa ngu ditshiku da magwito. 49Nguko kha na wombawomba ngu ta kukhukhela kwangu; aniko Tate wu a nga ni ruma, ngene a nga ni leleta ati ni fanelako ku ti womba ni ku ti zivisa. 50Kambe na ti ziva ti to mlayo wakwe mbutomi wo mbi guma; se ati ni ti wombako, ni ti womba nga ti Tate a nga ni gelisa tona.”

will be added

X\