JOHANE 10

1“Ngu ditshuri, ngu ditshuri, na mi gela ti to awule a si wuleliko ngu ha txikeni, txibalani ka tinvuta, kambe a wulelako ngu wumwane wukhalo, ndikhamba, ditshelo njigevenga. 2Ani wule i ku mdyisi wa tinvuta a wulela ngu txike. 3Muwoneleti wa dithanga, wa mu tulela ditimba, se tinvuta ti engisa dipswi dakwe. Se ene a dhana tinvuta takwe ngu matina a tona, e ti humisa hahanze. 4Se ngako a di humisile totshe tinvuta takwe, wa thangela masoni ka tona, se tinvuta ti mu londetela ngu msana, nguko ta di ziva dipswi dakwe. 5Aniko kha ti londeteli awule ti si mu ziviko, kambe ti na mu thava, nguko kha ti di zivi dipswi da vamwanyane.” 6Jesu a va mahete txidinganiso txiya, aniko vona kha va ti pima ti a nga ti lava ku va gela tona. 7Jesu a engetile e va gela kambe a txi khene “Ngu ditshuri, ngu ditshuri, na mi gela ti to ani ngani ni ku txike txa tinvuta. 8Votshe vale va nga ta, ni sa nzi kubwaka ani, makhamba phuho nzigevenga, kambe tinvuta kha ta va engisa. 9Ani ngani ni ku txike: Ngako mthu a txi wulela ngu ngani, a na hanyiswa; a na wulela, a txi huma, e ya mana lihawu. 10Dikhamba di tela kuta pa ni kuta daya ni kuta vhandamusa basi. Ani ni tete kuta ti ninga wutomi, ti txi mana kuhanya ka kuenela. 11“Ani ngani mudyisi wa mnene. Mudyisi wa mnene ngu wu a ningelako wutomi wakwe ngu kota ya tinvuta takwe. 12Mthumeli wa male, awu i ku singa mdyisi, awu tinvuta ti si mu lumbiko, ngako a txi wona dixolwa di txi ta, a leka tinvuta, a txi tutuma, se dixolwa di txi honyola tinvuta, di txi ti hangalasa. 13Ene a maha tiya nguko i mthumeli wa male tsena, kha khatali ngu tinvuta. 14Ani ni mdyisi wa mnene, tinvuta tangu na ti ziva, nitxona tinvuta tangu ta ni ziva. 15Nga tiya Tate wangu a ni zivako, nanani na mu ziva Tate, se ni ningela wutomi wangu ngu kota ya tinvuta tangu. 16Nina ni timwane tinvuta kambe, ti si nziko kuva ta dithanga diya, aniko ku laveka ti to ni ti tshanganisa, ti ta engisa dipswi dangu, se ku na va ni mtxhambi wumwewo ni mdyisi mmweyo. 17Tate wa ni randa, nguko ni ningela wutomi wangu, awu ni tshumelako kambe ni txi wu mana; 18Ku walo mthu wu a ni tekelako wutomi, aniko ngani ngu kuranda kwangu ni wu ningelako. Nina ni mtamo wa ku wu ningela, futsi kambe nina ni mtamo wa kutshumela ni txi wu mana. Awuwa ngu wona mlayo wu ni nga ningwa ngu Tate wangu.” 19Ku to wuka kambe kuhambana hagari ka Vajudha ngu mhaka ya dipswi diya. 20Wungi wawe, va titi khona: “Ana ni didhimoni, a hundekile! Ngu ku txani mi mu engiselako kani?” 21Vamwane va txi khona: “Mapswi awa hi nga a mthu wu a ku ni didhimoni. Didhimoni ina di nga tula maso a vathu va mabhofu kani?” 22Jerusalema, ku ti ni m'buso wa Kusawulekiswa ka Dithepele. I ti wuxika. 23Se Jesu a txi tsimbilatsimbila Dithepeleni, digumbini ka Salomoni. 24Vajudha va to mu randela, va txi khona kwakwe: “U na leka ditshiku muni ku hi kanakanisa timbilu, kani? Ngako u di Mesiya, ti wombe ha kubasani.” 25Jesu a to xamula a txi khene: “Ni mi gete, aniko kha mi tumeli. Mithumo yi ni yi mahako ngu ditina da Tate wangu, ngu yona yi ni fakazelako. 26Kambe anu kha mi tumeli, ngukusa kha mi nga tinvuta tangu. 27Tinvuta tangu ta engisa dipswi dangu, se ani na ti ziva, nitxona ta ni londisa. 28Ani na ti ninga wutomi wu wu si gumiko. Txima kha ti na mbi lova ni ditshiku ni da dimwedo, futsi kambe kha ku na mthu wu a no ti honyola manzani kwangu. 29Tate wangu, a nga ni ninga tona, mbwa hombe ngutu ka votshe; se kha ku na mthu wu a si kotako kuhonyola txilo manzani ka Tata. 30Ani ni Tate hi mmweyo.” 31Ngu konaho, Vajudha va to tshumela ve rola marigwi, kasi ku mu balisela. 32Jesu a to va xamula, a txi khene: “Ni mi kombisile mithumo yo tala, yo tshura, ayi yi humako ngu ka Tata. Mi lava ku ni balisela ngu wuhi ka yona, kani?” 33Vajudha va to xamula, va txi khona: “Kha hi lavi ku ku balisela ngu mhaka ya mthumo wa kutshura, aniko ngu mhaka ya txiruko, ngukusa awe, u ku mthu, u ti maha Txizimu.” 34Jesu a to va xamula a txi khene: “Ina kha ka bhalwa Mlayoni kwanu ti to: ‘Ni ti khani: Mi sizimu?’ 35Amu ka Mlayo va dhanwa ku i sizimu ava dipswi da Txizimu di nga rumelwa kwawe; se a walo wu a si kotako kufuvisa Mibhalo. 36Ka wule a nga sawulekiswa e rumwa ngu Txizimu ha ditikoni, anu mi khanu: ‘Awe wa ruka!’ Nguko ni nga khani: ‘Ni Mwanana wa Txizimu’, kani? 37Ngako ni si thumi mithumo ya Tate wangu, mi nga kholweni kwangu. 38Aniko, ngako ni txi yi thuma, hambi mi si kholwi kwangu, kholwani ka yona mithumo, kasi ku ti ziva, mi va mi txi ti zivisisa ti taku Tate a kwangu, nani ni kwakwe.” 39Ngu toneto, va to engeta ve lava ku mu ñola, aniko ene a to pshwitimuka manzani kwakwe. 40Se a to tshumela e tsula mtxhatuko ka Jordhani, ahawa Johane a nga ti khatile kubhabhatisa kona, e ya zumba kona. 41Vavangi va tile kwakwe, va ta khona: “Johane kha ditshuri, kha maha txidiwukiso ni txa tximwetxo, aniko totshe ti a nga ti womba ngu mhaka ya mthu wuwa, nda ditshuri.” 42Se konaho, vavangi va to kholwa kwakwe.

will be added

X\