JAKOBE 5

1Engisani, anu vanyatithombe, dilani mi txi peka tihuwa ta hombe ngu makhombo awa ma no mi wela. 2Tithomba tanu ti sinile, siambalo sanu si dyitwe ngu titshumba. Nzalama yanu ni silivhela yanu si dyitwe ngu kubhirela ka mafu. 3Kubhirela kuwa ku fakaza likungo lanu, akuwa ku no dya nyama yanu nga mndilo. Mi sengeletile tithomba ka masiku o gwitisa. 4Wonani, male yi mi nga lamba kuholela sithumi si si nga elula tithembweni kwanu ya kwangula, se tihuwa ta vaeluli ti hokile tinzeveni ka Mkoma wa tiyimbi. 5Mi zumbile ha mafuni mi si thumi txilo, mi txi nonisa timbilu tanu, ti ti rinzelako ditshiku da kudawa. 6Mi ningete mthu wo lulama e dawa. Ene kha mi lambela. 7Ngu konaho, vanathu, timiselani, kala kuwuya ka Mkoma. Wonani mdimi a rinzelako mitxelo yo tshura ya mafu ngu kutimisela, kala a txi amukela kuwa ka mati o khata ni o gwitisa. 8Nga toneto, nananu timiselani; tsanani timbilu tanu, nguko ku hafuhi kuwuya ka Mkoma. 9Mi nga mangalaneni, vanathu, kasiku mi si ta lamulwa. Wonani ti to Mlamuli a ha txikeni. 10Vanathu, gondani kuxaniseka, mithumo ni kutimisela ka Vaprofeti va va nga wombawomba ngu ditina da Mkoma. 11Wonani, athu hi va bala ti to va katekile avale va nga tsanisela amu ka mixaniso. Mi ti engisile ti txi wombwa ta kutimisela ka Jobe, kambe mi ma woni magwito awa Mkoma a nga m'ninga ona, ngukusa Mkoma a na ni wumbilu ni divalelo. 12Ngutungutu, vanathu, mi nga xambanyeni hambi ngu nzuma, hambi ngu mafu, hambi ngu txilo txihi ni txihi, kambe kuwombawombani kwanu, “Ina” a na ve i di “Ina”, se “Ahim-him” a na ve i di “Ahim-him”, kasiku mi si weli kuabaniswani. 13Wa ho wa kuxaniseka hagari kwanu, kani? A na khongele. Wa ho wa kutsaka hagari kwanu, kani? A na embelele tindando ta kudhumisa. 14Wa ho wa kulwala hagari kwanu, kani? A na dhane madhota a Dibanza, ona ma na m'kombelela, ma txi m'tota mafura ngu ditina da Mkoma. 15Mkombelo wa likholo wu na hanyisa mlwali e mana kuamukelwa ngu Mkoma. Se, hambi a di mahile siwonho, si na divalelwa. 16Zivisanani siwonho sanu, mi txi kombelelana, kufela ku mi txi hanyiswa. Mkombelo wa lisima wa mlulami wu ni mtamo ngutu. 17Elija i ti mthu wa kuxaniseka kufana ni nathu, a khongete ngu kukhutala ti to nzuma yi si ni, se ku gumile malembe mararu ni mtxhanu wa mitxima ni wumwewo, ma si wi mati ha mafuni. 18A tshumete e khongela kambe, se nzuma yi nisa mati, se mafu ma txi ninga mihando ya ona. 19Vanathu, ngako mmweyo wanu a txi leka nzila ya ditshuri, se mmwane a txi mu wuyisa ka nzila ya yinene, 20a na ti zive ti to awule a tshumetako muwonhi ka nzila yakwe ya kutimela, a na hanyisa moya wakwe ka lifo, se a na divalelwa mtalo wa siwonho.

will be added

X\