JAKOBE 4

1Ti ta ngu hani tiyimbi, ma ta ngu hani mazunga hagari kwanu, kani? Ina kha si mahwi ngu timbiti ta minavelo yo biha, ayi sihango sa mmidi wanu si lewako ngu yona, kani? 2Ma navela so maha, kambe kha mi si mani; se mi tutumela kudaya. Mi na ni wukhuxu, kambe kha mi koti txilo. Se ngu toneto, mi khata mazunga, nguko kha mi kombeli. 3Hambi mi txi kombela, kha mi amukeli txilo, nguko kha mi kombeli ngu fanelo: Asi mi kombelako, mi kombela sa kutsakisa minavelo yo biha ya mmidi. 4Vanyawugangonu, kha mi ti zivi ti to wungana ni ditiko mbulala ka Txizimu, kani? Ngu toneto, awu a lavako wungana ni ditiko, i mlala wa Txizimu. 5Mwendo mi pimisa ti to mibhalo yo womba walo ngako yi txi womba ti to: “Moya wu wu zumbako kwathu, Txizimu txi wu randa ngu txiluse, kani?” 6Txona Txizimu txa hi ninga tikateko ta tingi ngutu, madingano ni dipswi da mibhalo, adi di wombako ti to: “Txizimu txi lambela ava va ti kulisako, aniko txi ninga tikateko ta txona ava va ku ti veka hahatshi.” 7Ngu konaho, ti vekeni hahatshi masoni ka Txizimu, kambe lambani ku ti ningela ka Sathane, se ene a na mi thava. 8Tshuketani hafuhi ka Txizimu, kasi ni txona txi na tshuketela hafuhi kwanu. Basisani manza anu, vawonhi, mi txi basisa timbilu tanu, anu vathu va timbilu timbidi. 9Zivani wusiwana wanu, salukani, mi txi dila; maseko anu ma na phinduke ma txi maha madila, litsako lanu li na phinduke li txi maha kupandiseka. 10Ti vekeni hahatshi masoni ka Mkoma, se ene a na mi guleta. 11Mi nga lenganeni, vanathu. Awu a lengako mkwawe, mwendo kulamula mkwawe, a lenga mlayo ni kulamula mlayo. Senikoko, ngako u txi lamula mlayo, khu ngadi mlondeteli wa wona, aniko u mlamuli wa wona. 12Mmahi wa mlayo ni mlamuli i mmweyo dwe, awu a si kotako kuponisa mwendo kulovisa. Aniko, u mani awe, u lamulako mkwanu, kani? 13Senikoko, ni womba kwanu mi ku khanu: “Nyamsi, mwendo mangwana, hi na tsula ka didhoropa do kari, hi na ya fungala dilembe, hi txi xavisa, hi txi bhindula male,” 14Anu, ni ka kudotho kha mi ti zivi, ti ti no maheka mangwana! Wutomi wanu nji txani, kani? Nguko anu mi hunguva yi yi humelelako txikhatianyana, yi txi hangalaka. 15Hahanze ka kuwombisa ku khanu: “Ngako Mkoma a txi ti lava hi na hanya se hi na thuma tiya, mwendo tile.” 16Kambe konkuwa, ma ti guleta ngu mapimo anu aku ti themba: Kasi kotshe ku ti guleta ko nga tiya, ku bihile. 17Ngu toneto, awule a zivako kumaha tatinene, a si mahi, a ni txiwonho.

will be added

X\