JAKOBE 2

1Vanathu, likholo lanu ka Mkoma wathu Jesu Kristu, wu a nga tala ngu wudhumo, li nga mahe mibhando hagari kwanu. 2Nguko, ngako a txi bwaka mthu mtshanganoni kwanu, na a di ambate ringi ya nzalama litihoni kwakwe, na kambe a di ni siambalo sa kutshura; se ngu msana ku txi ta mmweyo wa txikulungu na adi ambate sa nzambwa. 3Se mi txi amukela kwati awule wa kubomba mi txi khanu: “Awe khalahatsha ahawa ka txikhalo txa masoni,” ngu msana mi txi khanu ka wule wa txikulungu: “Awe ema konaho” mwendo ku khanu: “Awe khalahatsha hahatshi ka txikandetelo txa mikondo yangu.” 4Ina toneto hi nga kusawula mi ku mahako hagari kwanu, mi txi ti maha valamuli va mialakanyo ya kubiha, kani? 5Engisani, vanathu vo randeka: Ina kasi Txizimu kha txa langa vathu va sisiwana ditikoni muwa, kufela ku ve maha vakoma mu ka likholo, ni vadyi va thomba ya wukoma wu txona Txizimu txi nga wu thembisa ka vale va txi randako, kani? 6Aniko, anu mi nyenyile txisiwana! Se, ina hi nga vanyatithombe va mi tsotsorolako, kani? Vonavo va mi ndindako ve mi yisa kuthethiswani, kani? 7Ina hi nga vonavo va ruketelako ditina da dinene di mi nga phaxwa ngu dona kani? 8Ngu toneto, ngako mi txi veketa mlayo wu i ku wa hombe ka yotshe, madingano ni mibhalo yi yi ku: “U na randa mkwanu nga ti u ti randisako tona,” eho mi maha tatinene. 9Aniko, ngako mi txi sawula madingano ni khohe ya mthu, mi maha txiwonho, mi na abaniswa ngu mlayo, nga sindakamilayo. 10Kha ditshuri, awule a veketako sotshe sirumo sa mlayo, aniko a kanyisako txirumo tximwetxo, txa mlayo, a maneka a di ni mnandu wa kueyisa wotshe mlayo. 11Nguko, awule a ku khene: “U nga mahe wugango” a wombile kambe ku khene: “U nga daye.” Ngu toneto, ngako u si mahi wugango, kambe u txi daya mthu, se u txindakamilayo. 12Ngu konaho, wombawombani mi txi thuma nga vathu va va fanelako kulamulwa ngu mlayo wa wuthuseki, 13nguko kulamulwa kha ku nambi va ni divalelo ka wule a ku singa ni divalelo. Aniko, wumbilu wa vengana ni kulamula. 14Vanathu, xana ti vhuna txani, ngako mthu a txi khene ndikholwa, na kasi kha mahi mithumo yi yi fanelako kani? Kukholwa ko nga toneto ina ku nga mu hanyisa kani? 15Ngako mwananu mwendo ndiyako a di ni wusakato, a txi pwata ni sakudya sa ditshiku ni ditshiku, 16se mmweyo wanu a txi va gela a txi khene: “Tsulani ngu thenga, ti futumeteni, mi txi dya mi txi khura!” Na mi si va ningi txilo txa ku va vhuna ngu txona mmidi wawe, mapswi anu ma vhuna txani kwawe, kani? 17Ngu toneto, likholo ni lona, ngako li si na mithumo li fite ngu wutumbu wa lona. 18Kambe mmwane a na khene: "Awe u ni likholo, se ani nina ni mithumo. Ni kombe likholo lako lo mbi na mithumo, ani ni na ku komba likholo langu ngu mithumo yangu." 19Awe wa kholwa ti to txi ho Txizimu tximwetxo txokha, kani? Ndinene! Aniko alakanya ti to madhimoni ni ona ma kholwa, kambe ma dhudhumela. 20Awe mthu wa txipumbu, wa ti lava kuwona ti to likholo li li ku singa ni mithumo kha li vhuni txilo, kani? 21Ina hi nga yona mithumo yi nga maha ti to tate wathu Abrahamu e va mlulami, ngukuwa a nga ningela mwanana wakwe Isaake ha txiluveloni kani? 22Se, wa ti wona ti to likholo lakwe li thumisani ni mithumo, ni ti to likholo li ningilwe kuhetiseka ngu mithumo, kani? 23Ngu toneto, yi tatisekile mibhalo yi yi ku: “Abrahamu a khotwe ka Txizimu, se atiya ti m'ningile ku e maha kota mlulami, se ene a dhanwi ku i mngana wa Txizimu.” 24Ma ti wona ti to mthu a mahwa wo lulama ngu mithumo i singa ngu likholo dwe. 25Kufana ni toneto, nene Rahabi, wa digelegele, ina kha mahwa mlulami ngu mithumo mbimo yi a nga amukela mitumi a txi yi tshumeta ngu yimwane nzila, kani? 26Nguko, kufana ni mmidi wu wu ku singa ni moya wu wu balwako ti to wu fite, ngu toneto ni lona likholo li fite, ngako li singa ni mithumo.

will be added

X\