JAKOBE 1

1Ani Jakobe, txithumi txa Txizimu ni txa Mkoma Jesu Kristu, ka tixaka ta digumi ni timbidi ti nga hangalaka ni otshe matiko, ni mi navelela wutomi: 2Vanathu, yi woneni i di mhaka ya kutsakisa ngutu, amukelani ngu mbilu yo tsaka sotshe siduko si mi si manako, 3ngu kuziva ti to txiduko txa likholo lanu, txi ninga kuhonisela, 4Aniko, ta laveka ti to kuhonisela ku txi veka mthumo wo hetiseka, kasiku mi txi maneka mi di vathu vo hetiseka ni vo lulama, mi singa ni txisolo ni txatximwetxo. 5Ngako mmweyo wanu a txi pwata wuzivi a na wu kombele ka Txizimu, atxi txi ningako votshe vathu ngu wunene, na txi si feleli, se a na ningwa. 6Aniko a na kombele ngu likholo, a si kanakani; nguko awule a kanakanako a fana ni mavimbi a linene, ma susumetwako ni kuvhiluswa ngu diphuho. 7Mthu wo ngeto, a nga pimise ti to wa ningwa txihi ni txihi ngu Mkoma. 8Nguko, eyo i mthu wa mipimiso yimbidi, wa kanakana ka tosthe tinzila takwe. 9Mwanathu wu a ku wusiwanani, a na tsake ngako a txi guletwa. 10Kambe nene nyatithombe a na tsake ngako a txi vekwa hahatshi; nguko ene a na pinda kufana ni txiluva txa mwasi. 11Ngukusa, neti ditambo di txi huma ni kuhisa ka dona, di womisa mwasi, se siluva sa wona si txi mora, se kutshura ka wona ku txi wonheka. Ngu tona ti a gwitisako tona nyatithombe ni mabhindu akwe. 12A katekile mthu wu a amukelako txiduko ngu kutimisela. Nguko, a di gwitile kudukwa, a na amukela m'bhoti wa wutomi, awu Mkoma a nga wu thembisa ka vale va m'randako. 13Ni wammweyo a dukwako, a nga thuke a txi khene: “Txiduko txangu txi ta ngu ka Txizimu”, nguko Txizimu kha txi na ku si kota kudukwa ngu wubihi, se kambe kha txi duki mthu. 14Aniko, mthu ni mthu a dukwa ngu kunavela kwakwe ko biha ku ku m'ndindako ku txi mu yisa kubihani. 15Msana keto, kunavela ko biha, ka mana mimba, ku txi veleka txiwonho, se txiwonho txa vitwa txi veleka lifo. 16Vanathu vo randeka ngutu, mi nga ti kanganyiseni. 17Sotshe sihiwa sa lisima, sotshe siningo sa kuhetiseka, si ta ngu txitimwi, si txi txhika ngu ka Tate wa liwoningo, awu a ku singa ni kutxitxa, awu kuwoninga kwakwe ku ku singa ni kutxitxa ku txi maha txidema. 18Ngu kuranda kwakwe ene a hi velekile ngu dipswi da ditshuri, kasiku hi txi maha matiwula a siwumbwa sakwe. 19Ti ziveni tiya, vanathu vo randeka ngutu. Mthu wuhi ni wuhi a na kuluvete kuengisa, a txi swela kuwomba, a txi swela kuhenya. 20Nguko, kuhenya ka mthu kha ku mahi kululama ka Txizimu. 21Ngu konaho, thavisani yotshe nzambwa ni wubihi wu wu pindako, mi txi amukela ngu kudikha dipswi di di nga phaywa timbiluni kwanu, adi di nga si kotako ku mi ponisa. 22Aniko, mahani valondeteli va dipswi, mi nga ti maheni vaengisi va dona dwe, nguko eto mo ti kanganyisa mipune. 23Khaditshuri, ngako mthu a txi lumbela kuengisa dipswi a si di mahi, a fana ni mthu wu a dongololako khohe yakwe ya mtumbuluko amu ka txibuko; 24a ti wonile e khukha e tsula, a txi kuluveta e divala ati a nga zumbisa tona. 25Kasi awu a khutalako ngu kugonda mlayo wa kuhetiseka wa wuthuseki e wu simamela, a si ti mahi muengisi wo divala, aniko a veketako ati wona wu rumako, eyo a katekile ka tile a ti mahako. 26Ngako, mthu a txi pimisa ti to ndikholwa, kambe a si bhasopi lidimi lakwe, a txi ti kanganyisa apune, a na ti zive ti to wukholwa wakwe kha wu vhuni txilo. 27Nguko, wukholwa wa ditshuri wo mbi na dikhwiti masoni ka Txizimu, Tate wathu, ngu kudingula va vo felwa ngu vaveleki, ni vale i ku tinoni, kuxanisekani kwakwe, ni ku ti vhikela kambe ka nzambwa ya ditiko.

will be added

X\