VAHEBHERU 7

1Melkizedheki wuwa, mfumeli wa Salema, mphaxeli wa Txizimu Nyatxitimwi, a to hingeta Abrahamu, awu a nga ti wuya ngu kuxulani ka vafumeli; se e m'katekisa. 2Ngene wuwa Abrahamu a nga ya m'ninga wugumi wa sotshe. Kambe ditina dakwe, kukhata, di womba ku “mfumeli wa kululama.” Ka wumbidi, mfumeli wa Salema ti womba ku “mfumeli wa kudikha.” 3Ene kha nga ni tate, hambi mame, hambi lihunzu, kha nga ni makhato a masiku akwe, hambi magwito a kuhanya kwakwe, aniko a fana ni Mwanana wa Txizimu, i mphaxeli kala kupinduka. 4Hingani wona wuhombe wa mthu wuwa, awu hambi Abrahamu, i ku kokwane wathu wa hombe, a nga m'ninga wugumi wa sile sasinene, asi a nga si mana yimbini: 5Se vanana va Levhi, ava va nga ningwa mthumo wa wuphaxeli, va tumelelwa ngu mlayo kuamukela wugumi wa si si humiswako ngu vathu va i ku vanawe, kasi nivona mba lixaka la Abrahamu. 6Aniko, Melkizedheki, hambiko i ku singa wa lixada la Levhi, a amukete sa wugumi ka Abrahamu e tshumela e m'katekisa, ene a nga ti ni sithembiso. 7Ku walo kukanakana ka ti to mdotho a katekiswa ngu wa hombe. 8Txitimwi keto, ava va amukelako sa wugumi ahawa, mbathu va va fako, kasi i di haleya, ku wombwa ngu mthu wu a ku ni wutomi. 9Se hi nga womba ti to nene Levhi awu vanana vakwe va amukelako sa wugumi, a si humisile nene sa wugumi ngu ka Abrahamu. 10Ngukusa, Levhi a ti ngadi ka titsho ta kokwane wakwe Abrahamu, mbimo yi ene a nga tshangana ni Melkizedheki. 11Ngu toneto, idiku wuphaxeli wa Levhi i ti wo hetiseka, ngaku vathu va nga amukela mlayo hahatshi ka wona wuphaxeli wonewo, ti mahisa ku txani kulaveka wumwane wuphaxeli madingano ni wa mlayo wa Melkizedheki, i singa madingano ni mlayo wa Aroni, kani? 12Nguko, wu txi txitxwa wuphaxeli, mlayo ni wona wu fanete kutxitxwa. 13Ngukusa, awule mapswi ma wombako ngu mhaka yakwe a lumba lixaka la limbe, ali ni wammweyo ka lona a si khaliko kuthumela ha magandeloni. 14Ngukusa, ti ha kubasani ti to Mkoma wathu a humete ka lixaka la Judha, ali Mosi a si wombiko txilo ngu lona ka timhaka ta wuphaxeli. 15Kambe ti ha kubasani ngutu, ngako ku txi huma mphaxeli mmwane wo fana ni Melkizedheki, 16awu a nga mbi vekwa ngu mlayo wa mtumbuluko, aniko a vekwa ngu mtamo wa wutomi wakwe wo mbi guma. 17Ngukusa, Mibhalo yo Sawuleka yi mahile wufakazi wa ti to: “Awe u mphaxeli kala kupinduka madingano ni mlayo wa Melkizedheki.” 18Ngu toneto, mlayo wa kale wu fuvisilwe, ngu ku wu nga ti sina mtamo, wu nga ti si vhuni txilo. 19(Kha ditshuri, mlayo wa Mosi kha wa maha txilo txo hetiseka), se ku txi wulela txithembo txa txinene atxi txi hi ningako kutshuketela hafuhi ka Txizimu. 20Se, atiya kha ta mahwa hahanze ka txixambanyo; nguko, ava va nga mahwa vaphaxeli kale va ningilwe mthumowo, ku singa ni txixambanyo. 21Aniko, Jesu a mahilwe Mphaxeli ngu kuxambanya ka wule a nga khene: “Mkoma a xambanyile, kambe kha na mbi txitxa makungo akwe: awe u Mphaxeli kala kupinduka”. 22Ngu toneto, Jesu i mtsanisi wa txitumelelano txa txinene ngutu. 23Vaphaxeli va Txitumelelano txa Kale va ve vavangi, nguko va si si koti kuhanya kala kupinduka, ngu kukomiswa masiku ngu lifo. 24Aniko Jesu, ngaku wutomi wakwe wu si gumiko, wuphaxeli wakwe ni wona kha wu nga ni magwito. 25Ngu kota yeto, ene wa si kota kuhanyisa, ka mbimo yihi ni yihi, votshe vale va tshuketelako ngu ngene ka Txizimu, nguko ene wa hanya yotshe mbimo kufela ku va kombelela. 26Kha ditshuri, ngene Mphaxeli wa hombe wu a hi fanelako: Wa kusawuleka, a singa ni mnandu, wa kubasa mbilu, wa kuhambana ni vawonhi, wa kuguletwa txitimwi ka tinzuma. 27Kwakwe kha ku laveki ti to ditshiku ni ditshiku a txi wuyelela kuphaxa mhamba ya siwonho sakwe kukhata, ngu msana a txi tshumela e phaxa yimwane mhamba ya siwonho sa vathu, kota nga ti va mahako vamwane vaphaxeli vahombe. Ene a to phaxa mhamba yimweyo basi ya kuenela, ngu hawa a nga ti ningela ene apune. 28Kha ditshuri, mlayo wu vekile vaphaxeli va i nga ti vathu va dikhodo. Aniko, dipswi da txixambanyo di nga humelela msana ka mlayo wa Mosi, di vekile Mwanana wu i ku Mphaxeli wa kuhetiseka ngu ha ku si gumiko.

will be added

X\