VAHEBHERU 5

1Ngu toneto, wuhi ni wuhi i ku Mphaxeli Wa Hombe, kota nga ti a nga sawulwa hagari ka vathu kulowe, a ni fanelo ya kuthumela vona vathu ka timhaka ti ti tsimbilelanako ni mthumo wa Txizimu, kasiku a txi maha miningelo ni timhamba ta kudihela siwonho. 2Ene wa si kota kupfela wusiwana ava va kusisalelwa ni vale va lundumako, nguko nene wa thuka a txi lunduma. 3Ngu toneto, a fanela kuphaxa timhamba a txi alakanya siwonho sakwe ni sa vathu votshe. 4Mthu a nga thuke a txi ti tekela apune txikhunja txiya; hahanze ka wule a nga dhanwa ngu Txizimu kufana ni Aroni. 5Ngu toneto, Kristu nene hi nga ene apune a nga ti pfalisa, a txi ti maha Mphaxeli wa Hombe, kambe a to guletwa ngu wule a nga m'gela a txi khene: “Awe u Mwanana wangu, ni ku velekile nyamsi.” 6Kota nga ti a wombako kambe ka wumwane wukhalo a txi khene: “Awe u Mphaxeli kala kupinduka madingano ni mlayo wa Melkizedheki.” 7Kristu ka masiku awa a nga ti hanya wutomi wa mmidi, a mahile mikombelo, ngu kupeka tihuwa ni kudila mirongo, a txi khozela ka wule a nga ti si kota ku m'ponisa ka lifo, se a txi tumelelwa ngu mhaka ya kuengisa kwakwe. 8Ene, hambiko i ku Mwanana wa Txizimu, ka sixaniso sakwe, a gondile nzila ya kuengisisa. 9Msana ka kuva a di tatisile tifanelo takwe, a mahile txisima txa wutomi wo mbi guma ka votshelele vale va mu engisako. 10Nguko, a mahilwe Mphaxeli wa hombe ngu Txizimu, madingano ni mlayo wa Melkizedheki. 11Ka mhaka yiya, hi ni to tala hi nga ti fanela kuwomba, kambe ta karata ku ti txhamusela, ngukusa mi hindukile mi txi maha mikara, mu kuengisani. 12Ngukusa, ti ti mi fanete ngu kale kuva mi di vagondisi, kambe ni konkuwa mi ngadi mi txi fanela kugondiswa makhato a timhaka ta Txizimu. Mi hindukile mi txi maha vathu va va fanelwako ngu masi, i singa ngu sakudya so banga. 13Ngukusa, wuhi ni wuhi a ku ngadi a txi mama masi, kha si koti kuengisa timhaka to lulama, nguko i ngadi mwanana. 14Kambe sakudya si so banga, nza vahombe, i ku va vo tolovela, ava va zivako kuhambanisa to tshura ni to biha.

will be added

X\