VAHEBHERU 4

1Ngu toneto ngako txithembiso txa kuwulela kuhumulani ka Txizimu txi di ngadi tsani, ahi ti woneleni ti to mmwane hagari kwanu a si maneki a di sate msana. 2Ngukusa, nanathu, hi engisile Evhangeli nga vona; aniko, dipswi di va nga di engisa kha da va vhuna txilo, ngukusa kha va namarela ngu likholo avale va nga di engisa. 3Aniko, athu hi kholwako hi na wulela kuhumulani, ngaku Txizimu txi nga womba txi txi: “Ni xambanyile kuhenyani kwangu ni txi: ‘Kha va nambi wulela kuhumulani kwangu!’ ” Txizimu txi wombisile toneto, hambiko mithumo ya txona yi nga ti hetisekile kukhukhela kutumbulukani ka mafu. 4Ngukusa, ka wumwane wukhalo ti bhatwe ta ditshiku da wutxhanu ni mambidi taku: “Txizimu txi humute ngu ditshiku da wutxhanu ni mambidi, ka yotshe mithumo yi txi nga yi maha.” 5Mhakeyo ya wombwa kambe: “Kha va nambi wulela kuhumulani kwangu.” 6Ngu konaho ku sate ku vamwane va txi wulela kuhumulanimo, ngukusa avale va nga thanga vona ve amukela mahungu a manene kha va wulela ngu mhaka ya kukanyisa kwawe. 7Txizimu txa engeta txi veka dimwane ditshiku da “Nyamsi”, ngako txi txi wombawomba kale ngu txisofu txa Dhavhidha, nga ti hi nga wombisa tona msana: “Nyamsi, ngako mi txi engisa dipswi da Txizimu, mi nga bangiseni timbilu tanu.” 8Ngu toneto, idiku Joxuwa a ti va ningile kuhumula koneko nga Txizimu txi sa engeta txi txi wombawomba ngu dimwane ditshiku msana keto. 9Hambi keto, kuhumula ku ngadi ho ku, ku nga siyelwa vathu va Txizimu. 10Ngukusa, awu a nga wulela kuhumulani ka Txizimu, nene wa humula mithumoni kwakwe, kufana ni Txizimu txi humulako mithumoni ka txona. 11Ngu toneto, he khutaleleni kuya wulela kona kuhumulaniyo, kasiku ni wammweyo a si wi, ngu mhaka ya kukanyisa ko fana ni kwawe. 12Dipswi da Txizimu da hanya, di ni mtamo. Da hinda kupinda ditxhari do lotwa ka otshe matshelo, dona da milela mndani, kala kuya abanisa mmidi ni moya, kala kuya thola matshanganoni ka marambo ni mndani ka wuluvi, di ya tumbula mialakanyo ni makungo a mbilu. 13Kha txi nga ho txiwumbwa ni txa tximwetxo txi si kotako kusisala masoni ka Txizimu, ngukusa, sotshe si tulekile si txi maneka si di ha kubasani masoni ka wule hi fanelako kuya thethiswa ngu ngene. 14Aku athu hi ku ni Mphaxeli Hahombe, awu a nga dhawula makenekene a txi ya huma nzumani, Jesu Kristu, Mwanana wa Txizimu, hi fanete kuva ni likholo la kutsana. 15Nguko, Mphaxeli wathu wa Hombe, hi ku nayo, hi nga ene wo sindwa ku hi pfela wusiwana ka siwonho sathu, ngukusa nene a dukilwe ka totshe tinzila, kufana ni nathu, kambe kha maha txiwonho. 16Ngu kota yeto, ahi yeni ngu kutsaka txiluveloni ka makatekwa, ahawa hi no ya mana wumbilu ni kateko yi yi no hi vhuna ngu mbimo yi yi fanelako.

will be added

X\