VAHEBHERU 3

1Ngu toneto, vanathu va vakusawuleka, anu mi nga mana txiavelo txa kudhanwa ngu Txizimu: Alakanyani Jesu, Mpostoli ni Mphaxeli wa Hombe wa kukholwa kwathu. 2Ene a thembekile ka wu a nga m'sawula, nga Mosi nene a nga ti thembekile mndani ka yotshe nyumba ya Txizimu. 3Ngukusa, ene a manekile a di ni wudhumo wa hombe kupinda Mosi, nguko muaki wa nyumba a mana kudhumiswa ka kupinda nyumba ya kona. 4Nguko, nyumba yihi ni yihi yi ni muaki wa yona, kambe awu a nga aka sotshe i Txizimu. 5Se Mosi, a ti thembekile mndani ka yotshe nyumba ya Txizimu, kota nga txithumi, kasiku e maha fakazi ya totshe ti ti nga ti fanete kuwombwa. 6Aniko Kristu, a thembekile kota Mwanana, nyumbani ka txona Txizimu. Se nyumba ya Txizimu ngu ngathu, ngako hi txi vekisa kutsana ko hetiseka ni kuthemba ko tsakisa. 7Ngu toneto, Moya wo Sawuleka wa womba wu txi: “Nyamsi, ngako mi txi engisa dipswi da Txizimu, 8mi nga bangiseni timbilu tanu, nga ati ti nga maheka kudukwani ngu ditshiku da txiduko; 9Ahawa vatate vanu va nga ni duka kona, kasiku va txi ni xola, ve wona mithumo yangu, mndani ka mune wa makumi a malembe. 10Ngu toneto ni nga henyela lixakelo, ni txi khani: ‘Yotshe mbimo, timbilu tawe ta hambuka, vona kha va ti ziva tinzila tangu.’ 11Ngu toneto, ni xambanyile kuhenyani kwangu ni txi khani: ‘Kha va nambi wulela kuhumulani kwangu.’ ” 12Wonani, vanathu, ti to ku si thuki ku txi va ni wammweyo hagari kwanu, wa mbilu yo biha, ni ya ku ambi kholwa, yi txi mi hambanisa ni Txizimu txi txi hanyako. 13Ngu toneto, layanani masiku otshe, na ku di ngadi ku txi wombwa ku “Nyamsi” amu ka mibhalo, ati ti wombako athu kasiku ku si vi ni wammweyo hagari kwanu wo ti bangisa, ngu kukanganyiswa ngu txiwonho. 14Ngukusa, hi vamwevo ni Kristu, ngako hi txi vekisa ngu kutsana kala magwito kuthemba kwathu, aku hi nga va nako kukhatani, 15ngako ku txi wombwa ku; “nyamsi, ngako mi txi engisa dipswi da Txizimu, mi nga bangiseni timbilu tanu, kufana ni ti ti nga maheka kudukwani.” 16Mba mani va va nga engisa dipswi da Txizimu se ve txi duka kani? Hi nga vona va va nga huma Egipta, va txi thangelwa ngu Mosi, kani? 17Mba mani va Txizimu txi nga va henyela mndani ka mune wa makumi a malembe, kani? Ina hi nga vava va nga wonha, avava sirumbi sawe si nga sala txiwulani kani? 18Mba mani kambe ava Txizimu txi nga va xambanyela ti to kha va nambi wulela kuhumulani ka txona, i singa va va kukanyisa kani? 19Se ngu toneto, ha ti wona ti to va tandekile kuwulela ngu mhaka ya ku ambi kholwa kwawe.


Copyright
Learn More

will be added

X\