VAHEBHERU 2

1Ngu toneto, hi fanete kuengisisa tatinene timhaka ti hi nga ti pfa, kasiku hi si timeli nzila. 2Ngukusa, ngako dipswi di di nga wombwa ngu tingelozi ka vatate vathu di di tsani, ngako kambe kotshe kundaka ka mlayo ni kotshe kueyisa ku di mani txitsayiso txi txi dinganako, 3se athu hi na hulukisa kutxani, ngako hi txi kanyisa kuhanyiswa kuwa kwathu ka hombe kani? Kuhanyiswa kuwa ku khatile kuhuwelelwa ngu Mkoma, ngu msana ku txi tsaniswa kwathu ngu va va nga ti pfa, 4ku txi fakazelwa kambe ngu Txizimu, ngu sikombiso ni sixamaliso, ngu sidiwukiso sa totshe tixaka ni siningo sa Moya wo Sawuleka, asi si avelwako madingano ni kuranda ka txona. 5Nguko, hi nga ka tingelozi Txizimu txi nga ningela kufuma ditiko di di tako, adi hi wombawombako ngu dona. 6Aniko, mmwane ka wumwane wukhalo a mahile wufakazi, a txi khene: “Mthu nji txani kasiku u txi mu alakanya kani, mwendo mwanana wa mthu nji txani kasiku u txi mu endela kani? 7U m'mahile wu a ku hahatshi ka tingelozi mbimonyana ya yidotho; u m'ningile wudhumo ni kupfaliswa, si va m'bhoti wa ha msungo kwakwe. 8Sotshe simaha u si vekile hahatshi ka mikondo yakwe”. Se nga ti Txizimu txi nga veka sotshe simaha hahatshi ka mikondo yakwe, kha ka sala txilo ni txatximwetxo txi ku singa hahatshi kwakwe. Kambe konkuwa, kha hi nzi ku ti wona ti to sotshe si hahatshi kwakwe. 9Jesu wu a nga vekwa hahatshi ka tingelozi ngu txikhatinyana txa txidotho, ha mu wona na a di vekilwe m'bhoti wa kupfaliswa ni kudhumiswa, ngu kota ya sixaniso sa lifo. Kunene, ene ngu mtamo wa kateko ya Txizimu, a dukile lifo, kasiku a txi hanyisa votshe vathu. 10Kha ditshuri, ti ni fanelo, ti to awule a lumbwako ngu sotshe, awu kambe i ku ene a nga si vanga, ngaku a nga lava kuguleta vanana vavangi a txi va veka ka txikhunja txa wudhumo, e thanga ngu kusawulekisa Muhanyisi wa kona ngu wuhetiseki wa sixaniso. 11Nguko, hambi M'basisi, hambi va va basiswako, va huma ka Tate mmweyo. Ngu kota yeto Jesu, kha kanakani ku va dhana ti to i vanawe, nga mapswi awa, 12ma ku: “Ni na huwelela ditina dako ka vanathu, hagari ka msengelatano ni na embelela wudhumo wako.” 13Se a txi khene kambe: “Ni na veka kwakwe kuthemba kwangu.” Se a txi engeta kambe a txi: “Ngani wuwa, ni vanana vava Txizimu txi nga ni ninga.” 14Ngu toneto ngaku vanana i ku mnoha wumwewo, ni nyama yimweyo, nene mbwa mtumbuluko wumwewo navo, kasiku e lovisa ngu lifo lakwe awu a fumako lifo, i ku ene Sathane. 15Jesu a thusile votshe vava i nga ti tikhumbi kuhanyani kwawe ngu kota ya kuthava lifo. 16Ngukusa, khaditshuri ene kha tela kuta khutalela tingelozi, aniko a tete kuta khutalela vanana va Abrahamu. 17Ngu toneto, ti ti fanete ku e fananiswa ka totshe ni vanawe, kasiku, masoni ka Txizimu e va mphaxeli wa hombe, wa kutala ngu wumbilu ni kuthembeka, ti to e si kota kudihela siwonho sa vathu. 18Ngukusa, aku a nga pfa kupandiseka ngu kota ya kudukwa, wa si kota kuvhuna ava va dukwako.

will be added

X\