VAHEBHERU 13

1Yanani masoni ngu kurandana nga vanawe. 2Mi nga divaleni kuamukela vapfhumba, ngukusa, ngu kona kuamukela vapfhumba, vamwane na va si ti zivi, va amukete tingelozi. 3Alakanyani ava va nga khotelwa, mi txi nga mo va kukhotelwani kumweko navo. Alakanyani avale va xaniswako, nguko nananu mina ni mmidi. 4Mtxhadho wu na xoniphwe ngu votshe, se m'bhedhu wa mtekano wu nga nyenyeziswe, nguko Txizimu txi na abanisa ava va mahako wugelegele, ni va va mahako wugango wu wo hoxela mtxhadho. 5Mi nga fumweni ngu male kuhanyani kwanu. Tsakani ngu si mi ku naso, nguko Mkoma apune a wombile a txi khene: “Kha ni nambi thuka ni ku leka, kha ni nambi nga va ni ku ku tshotsha.” 6Ngu toneto, ha si kota kuwomba ngu kutsana hi txi khathu: “Mkoma ngene txivhuno txangu, kha ni nambi thava txilo; mthu a nga ni maha txani, kani?” 7Alakanyani vathangeli vanu, ava va nga mi txhumayela dipswi da Txizimu. Wonisisani ati wutomi wawe wu nga gwitisa txona, mi txi londetela likholo lawe. 8Jesu Kristu ngeneyo wammweyo, nyamnova, nyamsi ni yotshe mbimo. 9Mi nga tumeleni kukanganyiswa ngu tigondo to mbi zivaneka. Nguko, ti ni lisima ngako mbilu yi txi tsaniswa ngu kateko kupinda sakudya, asi si si vhuniko txilo ka vale va namarelako ka sona. 10Hi ni txiluvelo, atxiya va si faneliko kudyela ka txona ava va khozelako ditendani. 11Nguko, tinyama ta sihari, asiya mnoha wa sona wu tiswako ngu mphaxeli wa hombe ka wukhalo wo sawuleka kuta kombelela divalelo ya siwonho, ti hiselwa hahanze ka ditenda. 12Ngu toneto, Jesu, kufela kubasiswa vathu ngu mnoha wakwe wupune, a dawetwe hahanze ka txike txa didhoropa. 13Ngu toneto, ahi humeni hi ya m'hingeta hahanze ka ditenda hi txi rwala kuruketelwa kwakwe. 14Nguko hahatshi hawa, kha hi nga ni didhoropa do tsana, aniko hi lava didhoropa di di tako. 15Ngu ngene ahi ningeleni yotshe mbimo mhamba yo dhumisa Txizimu, ti ti wombako m'hando wa txisofu txi txi fakazako ditina dakwe. 16Mi nga divaleni kumaha tatinene, mi txi abana ni vakwanu asi mi ku naso, nguko atiya ngu txona timhamba ti ti tsakisako Txizimu. 17Engisani vathangeli vanu, mi txi ti veka hahatshi masoni kwawe; nguko ngu vona va karatekelako mimoya yanu. Ngu vona va no ya angula ati ti dinganako yona. Ngu toneto, va na si kota kuthuma mthumo wawe ngu kutsaka, va si wu thumi ngu kudila. Nguko eto, nga ti si mi vhuni txilo. 18Hi kombeleleni, nguko ha themba ti to hi ni livhalo la linene, na hi txi navela ngu yotshe mbilu kutsimbila ngu nzila ya yinene yotshe mbimo. 19Na mi kombela ngutu ti to mi txi mahisa toneto, kasiku ni txi kuluveta ni txi wuyiswa kwanu. 20Txizimu txa kudikha txi nga kwelisa txitimwi awule txi nga mu wusa ngu ka vafi ngu mnoha wa txitumelelano txo mbi na magwito, mdyisi wa hombe wa tinvuta, 21Mkoma wathu Jesu, txi na mi longisele sotshe si i ku sasinene, kasiku si mi vhuna kumaha kuranda ka txona; txona Txizimu txi na thume kwathu ati ti txi tsakisako, ngu Jesu Kristu, awu a fanelako kupfaliswa ngu malembe ni malembe. 22Vanathu, na mi kurumeta kutimisela ka mapswi awa ni mi layako ngu ona. Nguko, ni mi rumete a madotho dwe. 23Zumbani mi txi ti ziva ti to mwanathu Timoti a humisilwe mkorani. Ni txi kuluveta kukhukha, ni na ta nayo ni ta mi wona. 24Dingulani votshe vathangeli vanu. Votshe vasawuleki va mi dingula ava va kuta ngu Italiya. 25Makatekwa ma na ve ni nanu motshe. Amen.

will be added

X\