VAHEBHERU 12

1Ngu toneto, akuwa hi nga randelwa ngu mtalo wa hombe wa tifakazi ta likholo, nanathu hi fanela kutshotsha kule sotshe si si hi nemelako kumweko ni txiwonho txi txi hi namarelako, hi txi tutuma ngu kutsanisela mnava wu hi nga sikelwa wona. 2Na hi txi wonetela Jesu, mvangi ni muhetisekisi wa likholo lathu, awu a nga leka litsako li a nga velekwa ka lona, a txi langa mixaniso ya kurwala txihambano, a si khatali ngu kurukwa. Se konkuwa, a maneka a di khalahatshile txineneni ka txikhalo txa wukoma txa Txizimu. 3Ngu toneto, alakanyani ene wuwa a nga timisela kuxaniswa ko ngeto, ngu kota ya vawonhi, kasiku mi si rereki, mi si gumi mtamo timbiluni kwanu. 4Anu kha mi nzi kulwa ni txiwonho, aha koza mi theketa mnoha. 5Kasi mi divate mapswi awa mi khongotelwako ngu ona, nga kule ka vanana, aawa ma ku: “Mwanangu, u nga kanyise kulaywa ngu Mkoma: U nga khuveke, ngako a txi ku kawuka. 6Nguko Mkoma a kawuka mthu wu a m'randako, ni kutsayisa mwanana wuhi ni wuhi, a mu amukelako.” 7Anu mi tsayiselwa kugondiswa. Txizimu txi mi wona kota nga vanana va txona. Nguko, kasi ngu wuhi mwanana a si kawukwiko ngu tate wakwe, kani? 8Ngako mi si gondiswi ati votshe vanana va gondiswako tona, ti komba ti to mi mirembwa, kha mi nga vanana va ditshuri. 9Hahanze ka toneto, hi ni vatate vathu va mmidi, avava va nga hi gondisa, vona ha va xonipha. Ina kha hi faneli kuxonipha ngutu Tate wa mimoya, kasiku hi na hanya kani? 10Nguko, vona va hi gondisile txikhati txa txidotho, madingano ni mawonelo awe. Aniko, Txizimu txa hi laya kasiku txi txi hi vhuna, ti to hi fana natxo amu ka wusawuleki wa txona. 11Kha ditshuri, kotshe kutsayiswa kha ku tekeli kuwoneka ti to njimaha txo tsakisa, aniko ku wonekisa ku nga ngu xaniswa. Kambe msana ka mbimo, ka vale va nga gondiswa toneto, ku ninga mihando ya kudikha ni ya kululama. 12Ngu toneto, guletani manza anu a kukarala ni mazolo anu a kurereka. 13Lulamiselani minenge yanu tinzila ta tinene, kasiku txihango txi txi nga lemala, txi si khuduki, aniko txi na hanyiswa. 14Zumbani ngu kudikha ni votshe, mi lava wusawuleki; nguko, hahanze ka wona, a walo wu a si kotako kuwona Mkoma. 15Ti woneleni khakwati, kasiku ni wammweyo kwanu a si kelelelwi ngu mathomo a Txizimu. Ku nga ve ni mthu a milako hagari kwanu nga mkuluti wo bava, awu wu vangako kukarateka ni kunyeta vo tala. 16Ku nga ve ni wammweyo wa wugango mwendo awu a nyenyezisako sa kusawuleka nga Esawu, awu a nga xavisa wutiwula wakwe ngu mbiya ya sakudya. 17Ma ti ziva kambe ti to mbimo yi a nga lava thomba ya kukatekiswa, a nyenyilwe nguko kha mana nzila yo hunduluka ngu yona, hambiko a nga ti kombela ngu kudila mirongo. 18Kha ditshuri, anu kha ma tshuketela, kufana ni vanana va Israyeli, ka mmango wu wu si kotako kugweswa, awu wu ku ni mndilo wo tura, ni txidema, hunguva, ni txingulu. 19Anu kha ma pfa kuvetwa ka mpundu ni kukwangula ka dipswi. Ava va nga pfa dipswi da kona va zile ve kombela ti to va si engeti ve di pfa kambe. 20Nguko, va ti xuleka kulondetela ati va nga ti rumwa ngu dona, ti taku: “Hambi i di txifuyo, ngako txi txi gwesa mmango wuwa, txi na fayetelwe ngu marigwi.” 21Kha ditshuri, mhaka yiya i ti yo thisa ngutu, ahawa Mosi a nga za a txi womba ku khene: “Na dhudhumela ngu kuthava,” 22Aniko, anu mi tshuketete ka mmango wa Siyoni, didhoropani ka Txizimu txi txi hanyako, Jerusalema wa nzumani, ka tingelozi ta mazana ni mazana, ati ti ku hagari ka msaho. 23Anu mi tshuketete ka Dibanza da vanana va matiwula, ava matina awe ma nga bhalwa nzumani, ni ka Txizimu Mlamuli wa votshe, ni ka mimoya ya valulami va va nga hoka kuhetisekani; 24ni ka Jesu muemeli wa txitumelelano txa Txiphya, ni ka mnoha wa kuxwayela, wu wu ku ni lisima lo pinda mnoha wa Abheli. 25Ti woneleni ti to mi si lambi kuengisa awu a mi wombawombelako. Nguko,akuwa va nga mbi huluka kutsayiswani avale va nga lamba kuengisa awule a nga ti va kawuka ha mafuni, ngutungutu athu kha hi nambi huluka, ngako hi txi lamba kuengisa awu a hi kawukako a di nzumani. 26Ene wu dipswi dakwe di nga zinginisa mafu, konkuwa a huwelela a txi khene: “Ni na tshumela ni txi zinginisa kambe, i singa mafu dwe, aniko niyona nzuma na yi zinginisa.” 27Mapswi awa kambe ma zivisa ka wumbidi ti to si na fuviswa sotshe siwumbwa so dekadeka sa ha mafuni, kasiku si txi sala dwe asi si si dekadekiko. 28Ngaku hi nga amukela mfumo wo mbi dekadeka, he ñolisiseni tatinene kateko yiya. Ngu yona, a hi khozeleni Txizimu ngu nzila yi yi amukelekako, ngu ku ti veka hahatshi, ni txithavo. 29Nguko, Txizimu txathu, i mndilo wu wu hisako.

will be added

X\