VAHEBHERU 1

1Txizimu, ngu sikhati so tala ni mamahelo o tala, txi wombawombile kale ka vatate vathu, ngu sisofu sa vaprofeti, 2Konkuwa, masikwananu, txi wombawombile kwathu, ngu Mwanana wa txona, awu txi nga m'maha txidyathomba txa sotshe, awu kambe txi nga maha nzuma ni mafu ngu ngene. 3Ene, ngaku i ku liwoningo la wudhumo wa Txizimu, ni txikombiso txa wudhumo wa txona, awu a hiketako sotshe simaha ngu mtamo wa dipswi dakwe, msana ka kuva a di gwitile kukuwula siwonho, a ti ya zumba txineneni ka wuhombe wa Nyatxitimwi nzumani 4Mwanana mbwa hombe ngutu kupinda tingelozi, ngukusa Txizimu txi mu ningile ditina da hombe, kupinda tona. 5Nguko, ngu ka yihi ngelozi Txizimu txi nga womba txi txi kha txona: “Awe u Mwanana wangu, ni ku velekile nyamsi”, kani? Na kambe txi txi kha txona: “Ani ni na va ni di Tate wakwe, ene a na va Mwanana wangu”, kani? 6Na kambe, ngako Txizimu txi rumela Mwanana wa txona ha mafuni txi ti: “Totshe tingelozi ta Txizimu ti na m'khozele”. 7Se ngako Txizimu txi txi womba ngu tingelozi, txi ti: “Txizimu txi mahile tingelozi ta txona kota timoya, ani sithumi sa txona, txi si mahile midhikila ya mndilo”. 8Kambe ngako txi txi womba ngu Mwanana, Txizimu txi wombisa tiya: “Txiluvelo txako, awe Txizimu, txi tsani kala kupinduka, se ndonga yako ya wukoma i ndonga ya kululama. 9U randile wululami, u txi venga wubihi; ngu toneto, Txizimu, Txizimu txako, txi ku totile mafura a litsako kupinda votshe vangana vako.” 10Seni kambe txi txi: “Ngawe, Mkoma, u nga vanga mafu kukhatani; tinzuma nitona i mthumo wa manza ako. 11Sotshe si na lova, kambe awe khu na magwito; sotshe si na sakala kufana ni siambalo. 12Sotshe u na si peta kufana ni didhamba, si na kutxuka kufana ni siambalo, kambe awe u ku eneyo wa mmweyo, wutomi wako kha wu na mbi guma.” 13Mwendo ngu ka yihi ngelozi, Txizimu txi nga yi gela, hambi ditshiku da dimwedo, txi txi: “Khalahatsha txineneni kwangu, kala kuza ni maha ava i ku valala vako txikhigelo txa mikondo yako”, kani? 14Ina tingelozi totshe hi nga mimoya yi yi thumako mithumo, ayi yi nga rumelwa kuthumela avale va fanelako kuamukela thomba ya kuhanyiswa, kani?

will be added

X\