VAGALATIYA 6

1Vanathu, ngako mthu a txi maneka a di mahile ta walo, anu mi ku vavanene, m'ziviseni khakwati, na mthu ni mthu a txi ti wonela, kufela ku nene a si wi mu kudukwani. 2Vhunanani kurwala mirwalo yanu, kasiku mi na si kota kuveketa mlayo wa Kristu. 3Ngukusa, ngako mthu a txi pimisa ti to njilo, na i singa txilo, wo ti xenga apune. 4Aniko mthu ni mthu a na wonisise mithumo yakwe, se ngu kona a no si kota ku ti dhumisa ngu mithumo yakwe tsena, i singa ngu ku ti dinganisa ni vamwane; 5ngukusa mthu ni mthu a na rwala thundu yakwe. 6Awule a gondiswako Dipswi, a na abane ni mgondisi wakwe sotshe sa sinene si a ku naso. 7Mi nga ti xengeni. Txizimu kha txi sakanelwi. Mthu ni mthu a na elula asi a phayako. 8Awule a phayako so tsakisa mtumbuluko wakwe wa nyama, a na elula so sina si humako ka mtumbuluko wakwe wonewo; aniko awu a phayako so tsakisa Moya, a na elula asi si humako ka wona Moya, i ku wutomi wo mbi guma. 9Hi nga rerekeni kuthuma ta tinene, ngukusa ngu mbimo ya kona, hi na elula, ngako hi txi timisela. 10Ngu konaho, he maheni wunene ka votshe vathu, na hi di ngadi ni mbimo, ngutungutu ka makholwa kulothu. 11Hingani wona ti li nga kulisa tona lyanza li ni mi bhalelako ngu lona. Ngani nipune ni bhalako ngu dianza dangu. 12Avale va lavako ku ti maha vavanene masoni ka vathu, evo ngu vona va mi kurumetako kuyiswa wukwerani. Va maha eto kufela ku va si xaniswi ngu kota ya txihambano txa Kristu; 13ngukusa hambi vona va va ti yisako wukwerani kha va veketi mlayo. Aniko va navela ku mi yisa wukwerani, kasiku ve ti dhumisa ngu nyama yanu. 14I di ani, ti na ve kule ni nani ku ti dhumisa ngu txilo tximwane, hahanze ka txihambano txa Mkoma Wathu Jesu Kristu. Kunene, ngu mhaka ya txona txihambano, kwangu, ditiko di bethetwe ha txihambanoni. 15Ngu toneto, wukwera hi nga txilo, wukhutu ni wona hi nga txilo. Mhaka ya hombe ngu kuhunduluka hi maha txivangwa txa txiphya. 16Kurula ni wumbilu si na ve txitimwi ka votshe vale va hanyako wutomi wawe mayelano ni mlayo wuwa, ni ka votshe vanana va Israyeli wa Txizimu. 17Kukhukhela konkuwa, mthu a nga thuke a txi ni karata, nguko ha mmidi kwangu, nina ni timbirimbi ta silonda si ni nga si mana ngu ndava ya Jesu. 18Makatekwa a Mkoma Wathu Jesu Kristu ma na ve ni nanu, vanathu. Amen

will be added

X\