VAGALATIYA 5

1Kristu a hi txhatxhile kasiku hi zumba hi di txhatxhekile. Ngu toneto, zumbani mi di tsani, mi nga tumeleni kutshumela mi sungwa kambe ngu dijoke da wukhumbi 2Ani Paulo ni khani kwanu: Ngako mi txi tumela kuyiswa wukwerani, Kristu kha nambi mi vhuna txilo. 3Na engeta ni txi tsanisa ka votshe va va yako wukwerani ti to va fanela kuvekisa totshe ti Mlayo wu rumako tona. 4Mi ti hambanisile ni Kristu anu mi lavako kumahwa valulami masoni ka Txizimu ngu kota ya Mlayo, mi wete kule ni kateko ya Txizimu. 5I di athu, ha themba ti to Txizimu txi na hi maha valulami masoni ka txona ngu mtamo wa Moya wo Sawuleka wu thumako kwathu ngu konaho ka likholo. 6Ngukusa ka Jesu Kristu, wukwera hi nga wa txilo, hambi wukhutu ni wona hi nga txilo, tsena likholo li li ti kombako ngu mithumo ya lirando. 7Mi ti tutuma kwati; se i mani a nga mi tsivela, kasiku mi si engisi ditshuri kani? 8Kutimetwa kuwa kwanu kha ku humi ngu ka Txizimu txi txi mi dhanako. 9Mtshumbelo wa wudotho wa vilisa wurathi wotshe. 10Ani nina ni kuthemba ngu nganu, ka Mkoma ti to, kha mi nambi va ni yimwane mialakanyo yo hambana ni yangu. Aniko awule a mi vhilinganyisako, a na rwala kuabaniswa kwakwe, hambi i di mani ni mani. 11Se ngaku ani, vanathu, ni di ngadi ni txi gondisa ta wukwera, ngu ku txani ni ku ngadi ni txi xaniswa kani? Ngukusa, ngako i di toneto, kutxhumayela kwangu ngu ta txihambano, nga ku si khuvekisi mthu. 12Avale va phayako vhilinganya hagari kwanu va na ye hawa ko gwita ngu ku ti thena! 13Vanathu, anu mi dhanetwe kuta hanya kutxhatxhekani. Ti di mahile eto, kukhululeka kwanu ku nga mi lundumise, mi txi fumwa ngu sa ha mafuni, aniko thumelanani ngu lirando. 14Nguko wotshe Mlayo wu tshanganiswa ka dipswi dimwedo, adi di ku: “Randa mkwanu nga ti awe u ti randisako tona.” 15Aniko, ngako mi txi lumana ni kukakatxulana, ti woneleni mi si fuvisani ngu txanu. 16Se ani na mi gela ni khani: Tumelani kutsimbitiswa ngu Moya, eho se kha mi nambi maha minavelo ya nyama. 17Nguko nyama yina ni minavelo yo hambana ni Moya; Moya ni wona wuna ni minavelo yo hambana ni nyama. Asiya sa simbidi sa bangana, kasiku mi si mahi kuranda kwanu. 18Aniko ngako mi txi tumela kutsimbitiswa ngu Moya, eho se kha mi fumwi ngu Mlayo. 19Mithumo ya mtumbuluko wa nyama ma yi ziva, ngu yiya: wugelegele, mikhuwo ya nzambwa, ku ambi ti ñola; 20kukhozela sizimu sa walo, wuloyi, livengo, maguwa, txiluse, txitsikivi, kukanetana, ku ambi engisana, mibango, 21kubavela, wudevi, limito, ni simwane so fana ni sona siya. Na mi alakanyisa, ngaku ni khalako ni txi mi alakanyisa, ti to: Ava va mahako to ngeto, kha va nambi mana thomba ya Mfumo wa Txizimu. 22Kasi mihando ya Moya ngu yiya: Lirando, litsako, kudikha, kutimisela, wunene, kutshambisa, kuthembeka, 23kuthutha, ku ti pimela; kha wu nga ho mlayo wu wu tsimbisako siya. 24Avale i ku va Kristu Jesu va bethete ha txihambanoni nyama ni wubihi wa yona ni minavelo ya yona. 25Ngaku hi nga ningwa wutomi ngu Moya, he maheni kuranda ka wona. 26Hi nga ti guleteni, hi nga vhukaneni, hi nga vengelaneni.

will be added

X\