VAGALATIYA 3

1Oh! Vagalatiya, maphuphulunu, i mani a nga mi xenga, anu vava Jesu Kristu a nga txhumayelwa masoni kwanu, nga mi to mu wona a txi gogotelwa ha txihambanoni, kani? 2Hingani ni gela mhaka yiya: Mi amukete Moya ngu kota ya kuvekisa Mlayo mwendo ngu kota ya kuamukela mahungu a likholo, kani? 3Kasi mi maphuphulu o nga tiya? Anu mi nga khata ngu Moya, se konkuwa i mmidi wu mi hokisa kuhetisekani kani? 4Ati ta hombe ti nga mi humelela ti nga va i di ta walo kani? Tona kha ta nga va ta walo! 5Awule a mi ningako Moya, a txi maha sidiwukiso hagari kwanu, ina a maha eto ngu mhaka ya kuvekisa Mlayo mwendo ngu mhaka ya kuva mi di engisile mahungu a likholo kani? 6Ngukusa “Abrahamu a khotwe ka Txizimu, se ngu kota yeto, a manekile i di wo lulama.” 7Ngu konaho, ti ziveni ti to ava va kholwako ngu vona i ku vanana va Abrahamu. 8Mibhalo niyona, ngu kusongolela ku ti wona ti to Txizimu txi na hundulusa vamatiko ve maha valulami ngu kukholwa, yi zivisile ka Abrahamu mahungu awa a manene, yitxi: “Yotshe mifumo yi na katekiswa ngu kota yako.” 9Ngu toneto, ava va kholwako va katekiswa kumweko ni Abrahamu, i ku dikholwa. 10Ngukusa vavekisi va Mlayo, votshe va maneka hahatshi ka kuruketelwa, nguko ti bhatwe taku: “A ruketetwe wuhi ni wuhi a si vekisiko sileleto sotshe si si nga bhalwa dibhukuni ka Mlayo.” 11Ti ha kubasani ti to, ngu kota ya Mlayo, a walo wu a no va a di lulamile masoni ka Txizimu, nguko ti bhatwe va txi: “Awule i ku wo lulama, ngu kukholwa a na hanya.” 12Ngu konaho Mlayo ni likholo kha si tsimbili ngu nzila yimweyo; nguko Mlayo wu womba tiya: “Mthu a hanya ngu kuvekisa sileleto sa Mlayo.” 13Kristu a dihile kasiku a txi hi terula ka dikhombo da kuruketelwa ngu Mlayo, ene a ti mahile wo ruketelwa ha wukhaloni kwathu, nguko Mibhalo yi kha yona: “A na ruketelwe wuhi ni wuhi a nga hayekwa ha phandeni.” 14Atiya ti mahekile kufela ku kateko ya Abrahamu yi txi hokela vamatiko ngu Jesu Kristu, se ngu konaho nathu hi txi mana kuamukela ngu likholo wona Moya, i ku txihiwa txi txi nga thembiswa. 15Vanathu, ni na mi dinganisela ngu txiheno txa kuhanya ka mthu: Ngako txitumelelano txo kari txi di mahilwe ngu tifanelo txi tsana, a walo wu a si kotako ku txi fuvisa, hambi kuengetela timwane txitimwi ka txona. 16Se sithembiso si mahilwe ka Abrahamu ni liveleko lakwe; Mibhalo kha yi wombisi ku “tiveleko takwe”, nga to va ta vathu va vangi; aniko yi ti “ni ka liveleko lako”, ati ti wombako mthu mmweyo, i ku Kristu. 17Ati ni wombako ngu tiya: Txitumelelano txiya txi nga tsaniswa kale ngu Txizimu kha txi na kufuviswa ngu Mlayo, awu wu nga ta msana ka mune wa mazana ni makumi mararu a malembe, ni txithembiso txa kona kha wu na ku txi fuvisa. 18Ngukusa, ngako thomba yi txi ningwa ngu mhaka ya kuveketa Mlayo, kha yi ngadi yi ningwa ngu kota ya txithembiso; kasi Txizimu txi ningile Abrahamu thomba ngu txithembiso dwe. 19Idito, Mlayo wu thumile txani kani? Wu ningilwe msana ka mbimo ngu mhaka ya kuwonha, ku za ku txi humelela lixaka li, txithembiso txi nga mahelwa lona. Mlayo wu tisilwe ngu tingelozi manzani ka mtshanganisi.a 20Se mtshanganisi kha tshanganisi mthu mmweyo dwe. Kasi Txizimu txona njimwetxo dwe. 21Ngako i di toneto, Mlayo wu lwa ni sithembiso sa Txizimu kani? Lambi! Ngukusa, idiku ku ti ko ningwa mlayo vathu, awu wu si kotako kuhanyisa, kunene vathu va ndina maha valulami ngu kuvekisa mlayo. 22Aniko mibhalo yi womba ti to sotshe si sungilwe ngu txiwonho, kasiku txithembiso txi ningwa ka va va tumelako ngu kukholwa ka Jesu Kristu. 23Na likholo li si nzi kuhoka, hi titi seketwe hahatshi ka Mlayo, hi txi rinzela kuwonekiswa ka lona likholo. 24Ngu konaho, Mlayo ngu wona wu nga va mgondisi wathu kala kuhoka ka Kristu, ti to hi mana kumahwa valulami ngu likholo. 25Se li di hokile likholo, kha hi swi hi txi fumwa ngu mgondisi. 26Ngukusa anu motshe mi vanana va Txizimu ngu kukholwa ka Kristu Jesu. 27Motshenu mi nga bhabhatiselwa kwakwe Kristu, mi ambate Kristu. 28Kha ku swi ku di ni mjudha mwendo mgriki, kha ku na khumbi mwendo mthuseki, kha ku na wamwamna mwendo wamsikati, nguko motshenu mi vamwevo ngu ka Kristu Jesu. 29Seni, ngako mi di va ka Kristu, ngu konaho mi liveleko la Abrahamu, mi sidyathomba ngu kota ya txithembiso.

will be added

X\