VAGALATIYA 2

1Msana ka digumi da malembe ni mune, ni tshumete ni kwela ni ya Jerusalema, kumweko ni Bharnabhasi, ni txi teka kambe ni nene Titosi. 2Ni kwete ni txi ya kona ngu kutulelwa ngu Txizimu. Ni xawutete masoni kwawe Evhangeli yi ni txhumayelako ka vamatiko; ni wonani navo ngu phuho avale i ku vathangeli va hombe, ni txi va xawutela nivona, ngu kuthava ti to ni nga tutuma mwendo ni nga va ni di tutumile mahala. 3Aniko hambi Titosi, a nga ti kumweko ni nani, ene i nga ti mgriki, kha kurumetwa kuyiswa wukwerani; 4mhaka yiya yi wusilwe ngu va va ti wombako ku mbanathu, na kasi makuhu; evo va ti ko txholovela hagari kwathu ngu kukanganyisa, kasi kumbzwingamela kuwona wuthuseki wathu, awu wu tako ngu ka Jesu Kristu, kufela ku ve tshumela ve hi beta wukhumbini. 5Kambe athu kha ha tumela ku ti veka hahatshi kwawe, hambi ngu txikhatianyana, kasiku ditshuri da Evhangeli di txi zumba di di tsani kwanu. 6Se ngu ditshelo da vale va nga ti woneka nga vathangeli va kona, mwendo kambe i ti singa vona, kha ni nga ni mhaka nato: Txizimu kha txi yi ngu khohe ya mthu - vonavo kha va nga ni kurumeta kuengetela txilo. 7Aniko vona va to ti wona ti to ani ni ningilwe kutxhumayela Evhangeli ka va vo mbi yiswa wukwerani, kufana ni Pedro nene a nga ningwa mthumo wo txhumayela Evhangeli ka va va fumwako ngu mlayo wa wukwera. 8Nguko awule a nga ninga Pedro mtamo wa kuthumela ava va wukwera, anani a ni ningile mtamo wa kuthumela ava i ku singa va wukwera. 9Ngu kuziva yona kateko yi ni nga ningwa, Jakobe ni Khefasi ni Johane ava va ziwako kota tisika ta dibanza, va hi losile ngu ku hi ninga manza a txinene, ani ni Bharnabhasi, ngu txikombiso txa kusengela kwathu navo, kasi athu hi txi ya txhumayela vamatiko, na vona ve ya txhumayela va wukwera. 10Tsena va to hi leleta ti to hi txi alakanya sisiwana; atiya ngu tona ti nani ni nga titi pandisekela ku ti maha. 11Aniko, mbimo yi Khefasi a nga ta Antiyokiya, ni tsani ni txi m'konama khohe ni khohe, nguko a titi fanela kukawukwa. 12Ngukusa mbimo yi va nga ti si nzi kubwaka ava va kuta ngu ka Jakobe, ene a titi dya kumweko ni va vo mbi ya wukwerani. Kambe mbimo yi vona va nga bwaka, a titi leka kudya navo, ngu kuthava va va wukwera. 13Vamwane vajudha va to wulelelwa ngu wukanganyisi wakwe, ahawa ko za Bharnabhasi nene e ndindwa ngu wona wukanganyisiwo. 14Kambe mbimo yi ni nga ti wona ti to se kha va tsimbili ngu nzila yo lulama, madingano ni ditshuri da Evhangeli, ni gete Khefasi masoni ka votshe vathu, ni txi khani: “Ngako awe u ku mjudha u hanyisako ku nga wamatiko, u si hanyisiko txijudha, u na si kotisa ku txani kukurumeta vamatiko ku ve hanyisa txijudha, kani?” 15Athu hi sivelekwa sa Vajudha, kha hi nga siwonhi sa vamatiko. 16Ha ti ziva ti to mthu kha si koti kumana wululami ngu kota ya mithumo ya Mlayo, aniko tsena a mana wululami ngu mtamo wa likholo ka Jesu Kristu; nanathu hi khotwe ka Kristu Jesu, kasiku hi mana wululami ngu likholo ka Kristu, i singa ngu mithumo ya Mlayo; ngukusa ni wammweyo kha na mbi mana wululami ngu kota ya mithumo ya Mlayo; 17Se, ngako athu hi lavako kumana wululami ngu ka Kristu, hi txi maneka hi di vawonhi, ti komba ti to Kristu ina i muemeli wa txiwonho kani? Lambi! 18Ngako ni txi tshumela ni txi aka atxiya ni nga txi khundumusela, ti komba ti to na ti pfa mnandu. 19Kunene, ani ngu mhaka ya Mlayo, ni fite ka wona kasiku ni hanyela Txizimu. Ni bethetwe ha txihambanoni kumweko ni Kristu. 20Ngu toneto, hi nga ngadi ani ni hanyako, aniko i Kristu a hanyako kwangu. Konkuwa, ni txi hanya wutomi wa mmidi, ni hanya ngu kukholwa ka Mwanana wa Txizimu, awu a nga ni randa, a txi ti ningela ngu ngani. 21Ani kha ni thavisi lisima la kateko ya Txizimu; nguko idiku ni mana wululami ngu mtamo wa Mlayo, lifo la Kristu li ndina va la mahala.

will be added

X\