VAEFESU 5

1Ngu toneto, etetelani Txizimu, anu mi ku vanana va txona vo randeka ngutu. 2Kufana ni Kristu, nananu vanani ni lirando, nguko Ene a mi randile. Ene a ti ningete apune ngu kota yathu, a txi ti maha gandelo ni mhamba yo bhumula ya kutsakisa Txizimu. 3Kambe wugango ni mithumo yotshe ya nzambwa mwendo likungo, si nga ve ni kuwombwa hagari kwanu, nga ti ti fanelako vasawuleki. 4Hambi mapswi a tingana, hambi a wubhemba mwendo sipoyilo, kha si laveki, aniko thumisani mapswi a kubonga. 5Zivani ti to a walo mthu wu a no mana thomba ya mfumo wa Kristu ni wa Txizimu, ngako i di mgelezi mwendo wu a mahako mithumo ya nzambwa, mwendo mnaveli wa tithomba, awu i ku mkhozeli wa sa walo. 6Mthu a nga thuke e mi kanganyisa ngu mapswi o mbi vhuna txilo, nguko simaha siya si dhana kuhenya ka Txizimu. 7Mi nga pataneni navo ka mithumo yawe yo biha. 8Kale mi ti hanyela mtemani, aniko mi hindukile mi maha liwoningo ngu ka Mkoma. Tsimbilani khakwati, nga ti mi ku vanana va liwoningo. 9Nguko mihando ya liwoningo ngu wunene ni kululama ni ditshuri. 10Lavani ati ti tsakisako Mkoma. 11Mi nga wuleleni amu ka mithumo ya txidema, ayi yi si ningiko mihando, kambe yi vayileleni masoni ka votshe vathu. 12Nguko ati vona va ti mahako ngu kusisa, ta yila ni ku ti womba. 13Aniko sotshe sakubiha sa soleka masoni ka sakuwonekela, 14ani sotshe si si humiswako ha kubasani, sa hinduka si maha liwoningo. Ngu toneto, ti wombwako va txi khona: “Wuka awe u otelako, wuka hagari ka vafi, se Kristu a na ku woninga.” 15Ti di ngeto, wonisisani tatinene mahanyelo anu; mi nga hanyiseni ku nga vathu va va si ziviko, aniko hanyani nga vathu va va zivako, 16londolani mbimo yi mi ku nayo, ngukusa masiku a ngweno ma bihile. 17Ngu toneto, mi nga ti maheni mabhemba, aniko lavani kuziva kuranda ka Txizimu. 18Mi nga seleni vhinya ngu kupindisa, ngukusa ya ninga kugeleza; 19aniko talani ngu Moya wo Sawuleka, mi txi khongotelana ngu txanu ngu kuembelela masalmu, mizeno ni tindando ta moya, mi txi embelela ni kudhumisa Mkoma timbiluni kwanu, 20mi txi bongela Txizimu Tate yotshe mbimo ngu sotshe si txi nga maha, ngu ditina da Mkoma wathu Jesu Kristu. 21Xoniphanani ngu txithavo ka Kristu. 22Anu vavasikati, engisani vamna vanu, kota nga ti mi engisisako tona Mkoma; 23nguko wamwamna ngene i ku msungo wa wamsikati, kota nga ti Kristu nene i ku msungo wa Dibanza ni muhanyisi wa mmidi. 24Se kota nga kuwa Dibanza di engisako Kristu, nivona vavasikati va na engise vamna vawe ka totshe timhaka. 25Nananu vavamna, randani vasikati vanu, kota nga ti Kristu a nga randisa txona Dibanza, a txi ti ningela ngu ndava ya dona, 26kasiku a txi di kuwula ngu mati, ni ku di basisa ngu dipswi, 27kasiku a txi di emisa masoni kwakwe, i di Dibanza do tshura, adi di ku singa ni sibawa kumbe tingonye, mwendo tximwane txo fana ni soneso; aniko di txi maneka i di do sawuleka, adi di ku singa ni txiwonho. 28Ngu toneto vavamna va fanelako kurandisa tona vasikati vawe nga mimidi yawe. Awu a randako msikati wakwe, wo ti randa apune; 29nguko ha kunene a walo mthu wu a khalako a txi venga mmidi wakwe, aniko wa wu dyisa, a txi wu gonga, kota nga ti Kristu nene a nga mahela dibanza, 30ngukusa athu hi sihango sa mmidi wakwe. 31Ngu kota yeto, wamwamna a na siya tate wakwe ni mame wakwe, a txi namarela ka msikati wakwe, va txi maha nyama yimweyo ngu wumbidi wawe. 32Msisalo wuwa mbwa hombe: ni womba wa kutshangana ka Kristu ni dibanza dakwe. 33Ngu toneto, mmweyo ni mmweyo wanu, ngu kwakwe, a fanete kuranda msikati wakwe, nga ti a ti randisako tona ene apune; nene wamsikati e xonipha mwamna wakwe.

will be added

X\