VAEFESU 2

1Nananu mi ti fite ngu konaho ka minandu ni siwonho sanu, 2asiya kale mi nga txi hanyela ka sona, mbimo yi mi nga txi londetela minavelo ya ha mafuni hawa, mayelano ni kuranda ka mkoma wu a fumako ka mpfhuka wu wu ku txitimwi ka mafu, i ku moya wu, ni konkuwa, wu thumako hagari ka sindakamilayo. 3Nanathu hotshethu hi ti fite kale kufana navo, ngu kulondetela minavelo yathu yo biha ni kumaha kuranda ko hambana ka mmidi wathu ni mipimiso yathu. Ngu kota yeto, nathu ngu mtumbuluko wathu hi ti maneka hi di vanana va va fanelwako ngu kutsukulwa ngu Txizimu kufana ni vamwane. 4Kambe Txizimu, txi nga tala ngu wumbilu ni lirando la hombe, ali txi nga hi randa ngu lona athu, 5hi nga ti fite ngu kota ya siwonho sathu, txi hi hanyisile kumweko ni Kristu. Inna! Mi hanyisilwe ngu makatekwa. 6Txizimu txi hi wusile kumweko ni nene, se txi txi ya hi khalahatshisa nzumani ngu ngene Kristu Jesu; 7kasi kukombisa ka timbimo ti ti tako makatekwa a txona a hombe, ngu wunene wu txi nga va nawo ni nathu ngu ka Kristu Jesu. 8Nguko mi hanyisilwe ngu mhaka ya tikateko ni kukholwa. Aniko hi nga ta kumahwa ngu mtamo wathu, njiningo txa Txizimu. 9Hi nga so huma mtamoni kwanu, kufela ku ni wammweyo a si ti kulisi. 10Nguko athu hi mthumo wa kuhuma manzani ka Txizimu txi nga hi vanga ngu ka Kristu Jesu ngu kota ya mithumo ya yinene yi Txizimu txi nga hi sikela ngu kale, kasiku hi yi maha. 11Ngu konaho, anu mi ku singa majudha, mi dhanwako ku mi makhutu ngu vale va ti wombako ku "nzithiva" ngu kota ya tile ti nga thumwa ngu manza ha mmidi kwawe, 12alakanyani ti to, ka yile mbimo, mi ti si lumbi Kristu, mi ti singa ni fanelo ya kubalwa kumweko ni va ka Israyeli, mi ti maneka mi di vamatiko ka situmelelano ni sithembiso sa Txizimu ha mafuni. 13Aniko anu kale mi nga ti kule ni Kristu Jesu, se konkuwa mi hafuhi ngu mnoha wa Kristu. 14Kristu ngu wutumbu wakwe, ngene kudikha kwathu, ene a nga patanisa tixaka timbidi ta vathu, a txi va maha lixaka limwelo, a txi fuvisa txibhiya txi txi nga ti va abanisa, a txi fuvisa livengo ngu kuningela mmidi wakwe; 15a fuvisile mlayo wa sirumo ni mithetho, kasiku Ene ngu wutumbu wakwe, a txi tshanganisa vathu va tixaka timbidi, e va maha vathu vamwevo vavaphya, a txi wuyisa kudikha. 16Ngu mtamo wa txihambano, a va tshanganisile ni Txizimu vathu va tixaka tile ta timbidi, a di va mahile Mmidi wumwewo, a txi fuvisa livengo. 17Ene a tete kuta huwelela mhaka ya kudikha kwanu mi nga ti kule ni ka vale va nga ti hafuhi. 18Ngu toneto, ngu mtamo wa Jesu, hotshethu vathu va tixaka tiya ta timbidi ha mana kuamukelwa ngu Tate ka wonewo Moya wa wumwewo. 19Ngu toneto, anu kha mi nga ngadi vamatiko mwendo vawuyi, aniko mi vamwevo ni vasawuleki va mwaya wa Txizimu, 20ngukusa anu mi fana ni nyumba yi nga akwa txitimwi ka makhato o mahwa ngu vapostoli ni vaprofeti, ahawa Kristu Jesu apune i ku Dirigwi da kona da hombe do tsanisa; 21kwakwe nyumba yotshe yi mana kudingana ni kukula, yi txi maha dithepele do sawuleka da Mkoma. 22Kwakwe kambe, nanu mi akilwe kumweko ni vamwane, mi maha nyumba ya kuzumba Txizimu ngu Moya wa tona.

will be added

X\