VAEFESU 1

1Ani Paulo, mpostoli wa Kristu Jesu ngu kuranda ka Txizimu, ni bhalela vasawuleki va Efesu, va thembekako ngu ka Kristu Jesu; 2kateko ni kudikha si na ve ni nanu, si txi ta ngu ka Txizimu Tate wathu ni Mkoma Wathu Jesu Kristu. 3Txi na dhumiswe Txizimu Tate wa Mkoma wathu Jesu Kristu, txi nga hi katekisa ngu makatekwa a moya wa nzumani, ngu ka Kristu. 4Ngu kota yakwe, Txizimu txi hi sawute, di si nzi kumahwa ditiko, kasiku hi txi mana wululami wa lirando ni kuzumba hi singa ni txisolo masoni ka txona. 5Ngu txona Txizimu txi nga hi sikela ngu kale ti to hi na maha vanana va txona, va mafuyiwa, ngu Jesu Kristu, ngu wunene wa kuranda ka txona, 6kasiku hi txi pfalisa Txizimu ngu wudhumo wa tikateko ta txona, hi nga ningwa ngu Mwanana wa txona wo randeka. 7Hi mani kuterulwa ngu ngene, hi mani divalelo ya siwonho ngu kota ya mnoha wakwe, i ku kutsetselelwa ka siwonho sathu, ngu mtamo wa kutala ka tikateko ta Txizimu, 8txi nga thela ngu kuenelela mimoyani kwathu ngu wuzivi wa hombe ni kupima; 9txi hi ninga kuziva makungo a kusisaleka a kuranda ka txona, kota nga ti ti nga txi tsakisa ku ti maha, ngu kale ni kale ngu ka Kristu, 10ati ti nga ti fanela kumaheka kutatisekani ka mbimo: ti to txi tshanganisa mfumoni ka Kristu sotshe si si ku nzumani ni si si ku ha mafuni. 11Ngu ngene Kristu kambe, Txizimu nathu txi hi mahile vadyi va thomba ya txona, nga ti txi nga ti wonisa tona txona txi kotako totshe ngu mtamo wa kuranda ka txona, 12kasiku hi txi kulisa wudhumo wa txona, ni kupfaliswa ka txona athu hi nga txi verela Kristu ngu kale. 13Nananu, ngaku mi nga engisa dipswi da ditshuri, i ku Evhangeli ya kuhanyiswa kwanu, ngaku mi nga kholwa ka dona dipswi dile, mi bhatwe ngu txixambanyo txa Moya wo Sawuleka, wu nga ti thembisilwe, 14awu i ku txitsaniso txa thomba yathu, ayi hi no yi mana, ditshiku di Txizimu txi ningako kukhululeka ko gwitisa ka vava i ku va txona, kumahela ti to ve pfalisa wudhumo wa txona. 15Ngu toneto, nani, txima ni pfa mhaka ya kukholwa kwanu ka Mkoma Jesu ni lirando lanu ka vasawuleki votshe, 16kha ni leki kubonga ngu kota yanu, na ni txi mi alakanya mikombeloni kwangu. 17Na kombela ka Txizimu txa Mkoma wathu Jesu Kristu, Tate wa wudhumo, ti to txi mi ninga Moya wa wuzivi ni wa mtuletelo, kasiku mi txi ziva tatinene; 18txi woninga timbilu tanu, kasiku mi ziva ti to njithembiso muni atxiya mi dhanelwako txona ngu Txizimu, ni ti to wu talisite ku txani wudhumo wa thomba ya txona, ayi txi nga mi vekela kumweko ni vasawuleki; 19mi ziva kambe ti to, kwathu makholwa, mbwa hombe ngutu mtamo wa txona, nyala ni mtamo wa Txona wa hombe, 20awu Txizimu txi nga wu wonekisa ka Kristu, ngu ku txi nga mu wusa ka vakufa, txi txi m'khalahatshisa txineneni ka txona nzumani, 21txitimwi ka votshe va va nga ningwa kufuma ni mtamo ni wuhombe ni wukoma, ni txitimwi ka otshe matina awa ma khumbukwako ka txikhati txa nyamsi ni txa mbimo yi yi tako. 22Hahatshi ka mikondo ya Kristu, Txizimu txi vekile sotshe simaha, kambe txi m'mahile Msungo wa dotshe Dibanza, 23adiya i ku mmidi wakwe, dona Dibanza diya di ningwako kuhetiseka ngu Kristu, i ku ene a ningako kuhetisela ka sotshe simaha.

will be added

X\