VAKOLOSA 4

1Anu vanyamne, hanyani ni sithumi sanu ngu nzila yo lulama ni fanelo, na mi txi ziva ti to nanu mina ni Mkoma wanu a ku nzumani. 2Simamisani mi khongela, mi txi khutalela kona mikombeloni, na mi txi bonga, 3mi txi hi kombelela ni nathu, kasiku Txizimu txi hi tulela nzila ya kutxhumayela kwathu, kasiku hi si kota ku huwelela msisalo wa Kristu, ani ni maneka mkorani ngu mhaka ya wona msisalowo. 4Ni kombeleleni kasiku ni si kota ku wu txhamusela ngu kuwomba ngu tifanelo ti ti lavekako. 5Hanyani ngu wuzivi ni va va ku hahanze, mi txi londola tatinene mbimo yi mi ku ka yona. 6Kuwombawomba kwanu ku na ve ko tsakisa yotshe mbimo, na ku di lungilwe ngu m'nyu, ti to mi ziva ti mi fanelako kuxamulisa tona mthu ni mthu. 7I di mahungu a ti ni hanyisako tona, a na ta mi xawutela totshe ene Tikiko mwanathu wo randeka, txithumi txo thembeka, txithumi kulothu mthumoni ka Mkoma. 8Ni mi rumela ene, ngu kota ya toneto, to ta mi xawutela mahungu a wutomi wathu ni kuta tsanisa timbilu tanu. 9Kumweko ni Onesimu, mwanathu wo thembeka ni kurandeka ngutu, awu i ku wa lixaka la ka kwanu. Vona va na ta mi xawutela totshe ti ti mahekako kheno. 10Wa mi dingula Aristarkusi i ku txibotxhwa kulothu, kumweko ni Marku mtukulu wa mwanawe Bharnabhasi, awu mi nga ziviswa timhaka takwe; ngako a txi mi endela, mu amukeleni. 11Jesu, awu a dhanwako ku i Justo, wa mi dingula nene. Ava va nga ya wukwerani, ngu vona vava tsena va thumako kumweko ni nani, ka mthumo wa mfumo wa Txizimu; ngu vona va ni thavelelako. 12Wa mi dingula Epafrasi, i ku mmweyo wanu, txithumi txa Kristu Jesu, txi lwako yotshe mbimo ngu nganu mikombeloni kwakwe, kasiku mi zumba mi di va kuhetiseka, mi di va kutsana amu ka kumaha totshe ti Txizimu txi ti randako. 13Kha ditshuri ani na mu fakazela ka mhaka yiya: Ene wa ti karata ngutu ngu nganu, ngu va Laodhikheya, ni va Hierapoli. 14Wa mi dingula nene Luka, mngana wathu wa ñanga, wa mi dingula nene Demasi. 15Dingulani vanathu va Laodhikheya, ni mame Ninfa, ni Dibanza di di sengeletanako mtini kwakwe. 16Msana ka kuva di di gondilwe hagari kwanu dipapilo diya, di ningeleni di gondwa kambe Dibanzani ka Laodhikheya; nananu lavani kugonda adi di tako ngu Laodhikheya. 17Gelani kambe Arkipo mi txi khanu: “Tsimbitisa khakwati mthumo wu u nga wu amukela manzani ka Mkoma; wu thume ngu tifanelo ta tinene.” 18Madingulisa awa ni bhala ngu txanza txangu: Ani Paulo. Mi nga divaleni ti to ni kukhotelwani. Kateko yi na ve ni nanu.

will be added

X\