MITHUMO YA VAPOSTOLI 9

1Kambe Sawule, ngukuva a di ngadi ni mahika a kubavela kudaya vagondiswa va Mkoma, a to tsula ka Mphaxeli wa hombe, 2e ya kombela kwakwe mapasi awa ma nga bhalelwa masinagoga a Dhamasku, ti to ngako a txi ya mana koneyo vathu va Nzila yiya, vavamna mwendo vavasikati, e va yisa Jerusalema, va di sungilwe. 3Ngako a di ngadi hagari ka kutsimbila, hafuhi ni Dhamasku, kunukunuko kukhanya ka kuta ngu nzumani ku to mu woninga. 4Se a to wa hahatshi, e pfa dipswi di txi: “Sawule, Sawule, u ni xanisela txani?” 5Se ene a to khene: “Ngawe mani, Mkoma?” Mkoma a txi khene: “Ngani Jesu, ngani wu awe u mu xanisako. 6Aniko khukha u txi wulela didhoropani, se u na gelwa ti u fanelako ku ti maha.” 7Kambe majaha awa ma nga ti nayo ma ti emile ngu kuwika misana, nguku ma nga ti ko pfa dipswi dwe, ma si woni mthu. 8Se Sawule a to khukha ngu hahatshi, e tula maso, kambe a si nga ngadi e wona. Va to mu ñoleta ngu diwoko ve mu wuleta Dhamasku. 9Se ku txi pinda masiku mararu na a si woni, asi dyi, a si seli txilo. 10A titi ho kona Dhamasku mgondiswa wu a dhanwako ku i Ananiya; se Mkoma a to mu dhana ngu txiwoniso, a txi khene: “Ananiya!” Ene a txi orovela a txi: “Ni ho hawa, Mkoma.” 11Mkoma a txi khene kwakwe: “Khukha u tsula ka nzila yi yi dhanwako ku i ‘Nzila yo lulama’, u ya wotisa, nyumbani ka Judha, mthu wu a dhanwako ku i Sawule wa Tarso; ene ndiyo wa khongela; 12se ene ngu txiwoniso a woni mthu wu a dhanwako ku i Ananiya, a txi wulela e m'sanzeka manza, kasiku e tshumela e wona.” 13Kambe Ananiya a to xamula, a txi khene: “Mkoma, ni engisile vathu vo tala, va txi wombawomba ngu mthu wuwa, ve xawutela wotshe wubihi wu a nga wu maha ka vasawuleki vako va Jerusalema. 14Se ahawa a tile a di ningilwe mtamo ngu vaphaxeli va hombe, wo sungelela votshe va va dhumisako ditina dako.” 15Kambe Mkoma a ti khene kwakwe: “Tsula, nguko awuwa, ngu txona txiya txi ni nga ti sawulela txona, kasiku hokisa ditina dangu ka vamatiko, ni ka mfumeli, ni ka vanana va Israyeli. 16Ani nipune ni na mu kombisa ti a fanelako kuxanisekisa tona ngu mhaka ya ditina dangu.” 17Ananiya a to tsula e ya wulela nyumbani e mu sanzeka manza, a txi khene: “Sawule, mwanathu, Mkoma Jesu wu a nga ti wonekisa kwako hanzila, yona yi u nga ta ngu yona, ngene a nga ni ruma kasiku u tshumela u txi wona, u tala ngu Moya wo Sawuleka.” 18Konako marongo ma to moroka ngu khoheni kwakwe, se e tshumela e wona. 19Kutingako a di dyite sakudya, a to tshumela e mana mtamo. Se Sawule e zumba masiku o kari ni vagondiswa va Dhamasku. 20Se Sawule kunukunuko a to khata kugondisa ta Jesu masinagogani e huwelela ti to ngene Mwanana wa Txizimu. 21Se votshe va va nga ti mu engisa, va to xamala ngutu, va txi khona: “Ina hi nga ene wu a nga titi xanisa, ani Jerusalema, avale va nga titi dhumisa ditina diya kani? Ina ene kha tela kuta va teka, va di sungilwe, e va yisa ka vaphaxeli va hombe kani?” 22Aniko Sawule a ti engetelwa mtamo e vhala sisofu sa vajudha va Dhamasku ngu ku va kombisa ti to Jesu kunene ngene Mesiya. 23Ku di pindile masiku a mangi, Vajudha va to sunga txikungo txa ku mu daya. 24Aniko Sawule a to ziviswa ati vona va nga langana txona. Vona va ti mu zingela ngu ha sikeni ka didhoropa wusiku ni mtshikari, kasiku ve mu daya. 25Kambe vagondiswa va to mu teka ni wusiku, ve mu txiritela hahatshi ngu ha digumani na a di mu ngulani. 26Ngako Sawule a di hokile Jerusalema, a to lava ku ti patanisa ni vagondiswa, kambe votshe va txi mu thava, nguko va si kholwi ti to nene i mgondiswa. 27Senikoko Bharnabhasi a to mu teka a txi mu heleketa ka Vapostoli, a txi ya va txhamusela ati ene a nga wonisa tona Mkoma ha nzila, ni tiya Mkoma a nga wombawombisa tona nayo, ni tiya kambe a nga txhumayelisa tona ditikoni ka Dhamasku ngu mtamo wa kuthemba ditina da Jesu. 28Se a to zumba navo Jerusalema, a txi hanya navo ngu wuxaka, a txi gondisa ngu ditina da Mkoma, na a si thavi txilo; 29a ti wombawomba a txi xamulana kambe ni Vajudha va kuwombawomba txigriki, aniko avava va ti langana makungo a ku mu daya. 30Se ngako va di ti engisile, vagondiswa kulowe, va to mu heleketa Khezareya, ahawa va nga ya mu pindisa ve mu rumela Tarso. 31Hambi keto, Dibanza di ti ni kurula ka dotshe ditiko da Judheya ni da Galileya ni da Samariya, di txi kula, di txi hanya ngu kuxonipha Mkoma, di txi anda ngu kuvhunetelwa ngu Moya wo Sawuleka. 32Ngako Pedro a nga ti tsimbilatsimbila ka otshe matshelo, a to hoka ka vasawuleki va va nga ti akile ditikoni ka Lidha. 33A to ya mana mthu koneyo, awu a nga ti dhanwa ku i Eneyasi a di otelisilwe ha ditahoni txipimo txa mtxhanu wa malembe ni mararu. A ti khwanyete sihango. 34Se Pedro a txi khene kwakwe: “Eneyasi! Jesu Kristu wa ku hanyisa, wuka u txi peta ditaho dako.” Kunukunuko a to wuka. 35Se votshe va va nga aka ditikoni ka Lidha ni Saroni, ngako va txi mu wona, va to hunduluka ve kholwa ka Mkoma. 36Didhoropani ka Jopa, ku ti ni wamsikati wa mgondiswa, awu a nga ti dhanwa ku i Tabhita, atiya ngu txigriki ti txhamusako ku Dhorkasi. Ene a ti taletwe ngu mithumo ya wumbilu ni wuha. 37Aniko, ka oneyo masiku, a to lwala e fa. Ngako va di mu kuwute, va to mu veka ka nyumba ya txitezini. 38Se ngaku Lidha i nga ti hafuhi ni Jopa, vagondiswa, va di engisile ti to Pedro wa ho, va to ruma vavamna vambidi, kuya mu dhana, va txi: “Kuluveta u txi ta kheno kwathu.” 39Se Pedro a to khukha e tsula navo. Kutingako a di hokile, va to mu yisa ka nyumba yile ya txitezini. Votshe vavasikati va tinoni va to ta mu randela na va txi dila, va txi mu komba mikhatxwa ni tinguwo ti Dhorkasi a nga va rungela tona, a di ngadi navo. 40Se Pedro a to humisa hahanze votshe vathu vale, e khizama a txi khongela. Se a di rendekete txirumbi, a to khene: “Tabhita, wuka!” Ene a to tula maso e wonetela Pedro se e khalahatsha. 41Pedro a to mu ñola ngu diwoko e mu emisa, se a di dhani vasawuleki ni tinoni a to mu kombisa masoni kwawe na a txi hanya. 42Mhakeyo yi to ziwa ngu dotshe didhoropa da Jopa, se vavangi ve kholwa ka Mkoma. 43Pedro a to zumba Jopa mbimo yo lapha mtini ka mtxhuki wa madhowo, a dhanwako ku i Simoni.

will be added

X\