MITHUMO YA VAPOSTOLI 7

1Mphaxeli wa hombe a to mu wotisa, a txi khene: “Timhaketo ngu tona kani?” 2Sitefane a to xamula, a txi khene: “Anu vanathu ni nanu vatata, ni engiseni! Txizimu txa wudhumo txi ti kombisile ka tate wathu Abrahamu, na a di ngadi Mesopotamiya, na a si nzi kuaka Karani, 3txi txi mu gela ku: ‘Rura ditikoni kwanu ni ka lixaka lako, u txi ya ka ditiko di ni no ku komba dona.’ 4Se ene a to khukha ditikoni ka Vakaldheya, e ya aka Karani. Kambe ngako tate wakwe a di fite, Txizimu txi mu rurisile txi mu tisa ka ditiko di anu mi nga aka ka dona konkuwa. 5Aniko kha txa mu ninga thembwe kona hambi wukhaloanyana wu wu dinganako ku kandwa ngu mkondo; txi to mu thembisa dwe ti to txi na mu ninga dona di maha thomba yakwe ni ya vatukulu vakwe msana kwakwe, hambiko a nga ti sa nzi kuva ni mwanana. 6Txizimu txi mu gete, txi txi kha txona: ‘Vatukulu vako va na ya luvela ditikoni ka vane, ve mahwa tikhumbi, ve xaniswa mndani ka mune wa mazana a malembe. 7Aniko ditiko di di nga va maha tikhumbi ni na di abanisa, kha Txizimu; se msana keto, va na huma va ta ni khozela ka wukhalo wuwa.’ 8Se Txizimu txi to mu ninga txitumelelano txa wukwera. Ngu konaho, Abrahamu, a di velekile Isaake a mu yisile wukwerani ngu ditshiku da wutxhanu ni mararu. Isaake a mahisile toneto ka Jakobe, se Jakobe nene e mahisa toneto ka vanana vakwe i ku vanyampande va tihunzu ta digumi ni timbidi ta Israyeli. 9“Se vanana vava va Jakobe i ku vanyampande vathu va to va ni wukwele ka Josefa, ve mu xavisa, e yiswa Egipta, kambe Txizimu txi ti ni nene. 10Txi to mu hulusa ka otshe makhombo akwe, txi mu ninga kateko ni wuzivi masoni ka Faro, mkoma wa Egipta; se ene mkoma a mu mahile mfumeli wa Egipta ni wa yotshe nyumba yakwe. 11Se ku to humelela paya ni kuxaniseka ka hombe ditikoni ka Egipta ni Kanana, se vatate vathu ve pwata sakudya. 12Kambe, kutingako Jakobe a di engisile ti to sakudya si ho Egipta a to rumela kona vatate vathu do khata. 13Se ngako va di yite da wumbidi, Josefa a ti zivisile ka vanawe, se li txi ziveka ka Faro lixaka lakwe. 14Se Josefa a to rumela vathu ve ya teka Jakobe, tate wakwe, ni otshe maxaka akwe, mtengo wawe i nga ti mtxhanu wa makumi ni makumi mambidi ni mtxhanu wa vathu. 15Se Jakobe a to kwitima e ya Egipta, e ya fela kona, ene ni vatate vathu. 16Kambe sirumbi sawe si rwatwe si yiswa Sikeme, si ya tshotshwa diyivani ka Abrahamu, adiya a nga ti di xavile ngu male ya silivhela ka vanana va Hemori, tate wa Sikeme. 17“Ngako yi nga ti hafuhi mbimo ya kutatiseka ka txithembiso txi Txizimu txi nga xambanyela Abrahamu, lixaka lathu li to kula ni kuanda Egipta, 18kala kuza ku humelela mmwane mfumeli a nga ti sa mu ziva Josefa. 19Mkomeyo a xanisile lixaka lathu ngu mano: tshofu yakwe yi mahile ti to vatate vathu ve tshotsha vanana vawe vapune kasiku va si ngadi ve hanya. 20Ngu yoneyo mbimo a to velekwa Mosi; ene i ti mwanana wo tshura masoni ka Txizimu. Se a wunjilwe mitxima miraru nyumbani ka tate wakwe. 21Msana ka kuva a di tshotshilwe, mwanana wa muhorana wa Faro, a to mu rola e ya mu fuya kasiku e maha mwanana wakwe. 22Mosi a gondisilwe wotshe wuzivi wa Vaegipta. Se i ti mthu wa mtamo amu ka mapswi ni mu ka mithumo. 23“Kutingako a di hokile ka tanga ya mune wa makumi a malembe, a to pimisa mbiluni kwakwe kuendela vanawe vanana va Israyeli. 24Se ngako a txi wona mmweyo wawe a txi xaniswa, a to mu emela e pharela ngu kudaya muegipta. 25A titi alakanya ti to vanawe va na ti pfisisa ngu mamahelo ale ti to Txizimu txi na va hulusa ngu diwoko dakwe; aniko vona kha va ti pfisisa. 26Ngu ditshiku di di londetako, a to mana vamwane vavambidi va txi lwa, se e va khongotela ngu ku va kamba, a txi khene: ‘Vavamna, mi va lixaka limwelo! Mi lwela txani kani?’ 27Aniko awu a nga ti xanisa mkwawe a to retha Mosi, a txi khene: ‘I mani wu a nga ku maha mfumeli ni mlamuli wathu kani? 28U lava ku ni daya nga ku u nga daya muEgipta nyamnova kani?’ 29Konaho Mosi a to thava e ya maha muwuyi ditikoni ka Midhiyani; koneyo a ti ya veleka vanana vambidi va sizambiana. 30“Kutingako ku di pindile mune wa makumi a malembe, ngelozi yi to ti wonekisa kwakwe txiwulani, mmangoni ka Sinayi, yi di mdhikilani ka txipopo txi nga ti tura. 31Mosi ngako a txi wona tiya, a to xamala; se ngako a di tshuketile hafuhi kasiku e wonisisa, ku to pfala dipswi da Mkoma, di txi: 32‘Ngani Txizimu txa vatate vako, Txizimu txa Abrahamu ni txa Isaake ni txa Jakobe’ Mosi a to dhudhumela, a si tsani ni kuwona. 33Se Mkoma a txi khene kwakwe: ‘Thavisa masandazi mikondoni kwako, ngukuva wukhalo wu u nga ema ka wona i mafu o sawuleka. 34Ni woni kuxaniseka ka vathu vangu Egipta, ni kuwowola kwawe ni ku pfite, se ni txhikile kutela ku ta va hulusa, se konkuwa ngono ni ta ku ruma Egipta.’ 35“Mosi wuwa ngene wu va nga mu kanyisa, va txi khona: ‘I mani wu a nga ku maha mfumeli ni mlamuli wathu kani?’ ” Ngene wu a nga rumwa ngu Txizimu kumaha mfumeli ni mteruli wawe, ngu mtamo wa ngelozi yi yi nga mu humela txipoponi. 36Ngene a nga va humisa ngu kumaha sidiwukiso ni sikombiso ditikoni ka Egipta ni Lineneni ko Bhilivila ni txiwulani mndani ka mune wa makumi a malembe. 37I ngadi ene Mosi awu a nga womba ka vanana va Israyeli, a txi khene: Txizimu txi na wusa hagari ka vananu mprofeti wo nga ani. 38Ngu mbimo ya kusengeletana ka va ka Israyeli txiwulani, ngene Mosi a nga ema ni ngelozi, ayi yi nga wombawomba nayo mmangoni ka Sinayi, kumweko ni vatate vathu; ngene a nga amukela mapswi a wutomi, kasi kuta hi ninga ona. 39“Kambe vatate vathu va lambile ku mu engisa, senikoko va to mu rethela kule, ve tshumelela Egipta ngu mialakanyo yawe, 40va txi khona ka Aroni: ‘Hi mahele sizimu si si no hi thangelela masoni nguko Mosi wu a nga hi humisa ditikoni ka Egipta kha hi ti zivi ti ti nga mu humelela.’ 41Ka oneyo masiku, va to wumba dirole ve phaxa mhamba masoni ka txithombe, ve khozela ngu kutsaka mthumo wa manza awe. 42Ngu konaho, Txizimu txi to va tshuralela txi va ningeta kukhozelani ka sikwata sa tiyimbi sa nzuma, nga ti ti nga bhalwa dibhukuni ka Vaprofeti, va txi: ‘Anu va nyumba ya ka Israyeli, ina mi ni mahete magandelo ni timhamba txiwulani, mndani ka malembe a mune wa makumi kani? 43Kambe mi rwate mdhute wa Moloko ni nyeleti ya txikwembu txanu Refani.I ku sithombe si mi nga si maha kasi ku si khizamela. Ngu konaho ni na mi payula ni mi yisa ka kupinda Bhabhilona.’ 44“Vatate vathu va ti ni Ditenda da Wufakazi, txiwulani amuwa va nga ti veka kona sileti sa Mlayo. Ditenda diya di mahilwe madingano ni ti txi nga leletisa tona Txizimu, ngako txi txi wombawomba ni Mosi, txi mu leleta kambe kumaha nga txifananiso txi Mosi a nga txi wona. 45Vona vatate vathu, ngako va di di amukete ditenda diya, va to wulela nado, na va txi thangelwa ngu Joxuwa, ka ditiko da vamatiko, avava Txizimu txi nga ti va tovete, masoni ka vatate vathu; dona di zumbile konaho kala kuhoka masiku a Dhavhidha. 46Ene Dhavhidha a mani kateko masoni ka Txizimu, se e kombela dithomo do akela nyumba Txizimu txa Jakobe. 47Aniko Solomoni ngene a nga txi akela nyumba. 48“Kambe Nyatxitimwi kha na kuzumba ka tinyumba to mahwa ngu manza a vathu, madingano ni kuwomba ka Mprofeti a nga khene: 49‘Nzuma njikhalo txangu txa wukoma, mafu njikhigelo txa mikondo yangu. I nyumba muni mi no ni akela kani, kha Mkoma, ni wukhalo wa kuhumula kwangu i nga va wuhi kani? 50Ina hi nga diwoko dangu di nga maha sotsheso kani.’ 51“Anu va tithamo to banga, makhutu a timbilu ni a tinzeve, anu ma kanyisa yotshe mbimo Moya wo Sawuleka: mi fana ni vatate vanu. 52Ngu wuhi mprofeti wu vatate vanu va nga mbi mu xanisa kani? Va date ni vava kukhatani va nga zivisa kuta ka Mlulami, ene anu konkuwa mi nga mu ningela ni ku mu daya; 53Anu mi nga amukela mlayo manzani ka tingelozi, kambe kha ma wu xayisa.” 54Kutingako va di pfite timhaketo ta Sitefane, va to henya ngutu timbiluni kwawe se ve gegeresela makwasa ngu txiviti nayo 55Kambe Sitefane, a di tate ngu Moya wo Sawuleka, a to gula maso e wona nzumani, e wona kuphatima ka Txizimu ni Jesu a nga ti emile txineneni ka txona; 56Se atxi: “Ma ti wona, ani ni wona nzuma yi di tulekile, ni Mwanana wa Mthu a di emile txineneni ka Txizimu.” 57Se va to maha diguwa da hombe, ve ti tsiva tinzeve, va txi ya mu pfinya. 58Se va to mu ruruvisa ve mu yisa hahanze ka didhoropa, ve ya mu balisela ngu marigwi. Tifakazi titi vekile tinguwo ta tona minengeni ka dijaha di di dhanwako ku i Sawule. 59Mbimo yi va nga ti mu balisela, Sitefane a to khongela, a txi khene: “Mkoma Jesu, amukela moya wangu!” 60Se e khizama a txi kwangula ngu dipswi da hombe, atxi: “Mkoma u nga va alakanyele txiwonho txiya.” Ngako a di wombile tiya, a to fa.

will be added

X\