MITHUMO YA VAPOSTOLI 6

1Ngu ka oneyo masiku, ngako mtengo wa vagondiswa wu nga txi anda, vamwane ka vona, ava va nga txi wombawomba lidimi la txigriki va to khata kungurangura ve sola va, va nga txi wombawomba lidimi la txihebheru, va txi khona tinoni ta ka kwawe ta divalwa kuphamelwani ka sakudya sa ditshiku ni ditshiku. 2Se va Digumi ni Vambidi va to ramba dibutho da vagondiswa, ve va gela tiya: “Kha ti laveki ti to hi leka kutxhumayela Dipswi da Txizimu, hi thumela timezani. 3Ndinene, vanathu, kukhedha hagari kwanu, mtxhanu wa majaha ni mambidi a kuthembeka tatinene, na ma di tate ngu Moya wo Sawuleka ni wuzivi, kasiku hi va veka ve thuma mthumo wuwa. 4Kasi athu hi na khutala hi txi ti ningetela ka mthumo wa kukhongela ni kutxhumayela.” 5Txikungo txiya txi tsakisile dibutho, se konaho va to khedha Sitefane, i nga ti dikholwa da kutsana, na a di tate ngu Moya wo Sawuleka, ni Filipi, ni Prokoro ni Nikanori, ni Timoni ni Parmenasi ni Nikolawu, mlondeteli wa kuta ngu Antiyokiya. 6Va to va emisa masoni ka Vapostoli, se vona ve va mahela mikombelo ni ku va sanzeka manza. 7Ti di ngeto, Dipswi da Txizimu di to khata kuanda, se mtengo wa vagondiswa wu to engeteleka ngu kutsakisa ditikoni ka Jerusalema; se dibutho do tala da vaphaxeli ve kholwa. 8Sitefane, a di tate ngu kateko ni mtamo, a to maha sidiwukiso ni sikombiso hagari ka vathu. 9Kambe vamwane va kuta ngu ka disinagoga di di dhanwako ku nda Vathuseki, ni vamwane va Kirene ni va Alexandriya kumweko ni vamwane va Kilikiya ni va Asiya, va to ema ve kanetisana ni Sitefane. 10Aniko ve tandeka kukona wuzivi wakwe ni Moya wu a nga txi wombawomba ngu wona. 11Se va to xavelela vathu kasiku ve womba ku khona: “Hi mu pfite a txi womba mapswi a kuruka Mosi ni Txizimu.” 12Ngu toneto, va wusile vathu, ni madhota ni vabhali, se va to mu tela ngu txidhukisa, va ta mu ñola, ve mu yisa Dibanzani ka wukoma. 13Se ve humisa tifakazi ta makuhu, ati ti nga womba titxi: “Mthu wuwa kha leki kuwombawomba timhaka ti ti poyilako Wukhalo wo sawuleka ni Mlayo; 14ngukuva hi mu engisile, a txi khene: ‘Jesu wa Nazareta a na fuvisa Wukhalo wuwa e txitxa ni mahanyelo awa hi nga ningwa ngu Mosi.’ ” 15Se votshe va va nga ti khate ha Dibanzani ka wukoma va to mu ronokela ngu maso ve wona khohe yakwe yi txi fana ni ya ngelozi.

will be added

X\