MITHUMO YA VAPOSTOLI 25

1Ngako Festo a di bwakile ka ditiko donedo, a zumbile masiku mararu Khezareya, se e kwela Jerusalema. 2Se vaphaxeli va hombe ni madhota a Vajudha va to ta masoni kwakwe kuta mangalela Paulo; 3va txi womba ngu kukhongotela Festo, va to mu kombela ti to e va siza a txi rumela Paulo Jerusalema, kasi vona va ti sungile txikungo txa ku mu daya ha nzila. 4Kambe Festo a to va angula a txi khene Paulo a seketwe mkorani ka Khezareya, e va gela kambe ku khene ene Festo apune a na khukha ngu kukuluveta e tsula koneyo. 5A txi engeta a txi khene: “Ava ti va dinganako hagari kwanu, va na teke nzila yimweyo ni nani hi relela hi ya Khezareya; se ngako ku di ni wumwane mnandu ha mhakani ka mamowa, va ne ya mu mangalela!” 6Kutingako a di zumbile navo masiku awa ma si pindiko mtxhanu ni mararu, kumbe digumi, Festo a to kwitima e ya Khezareya. Mangwanani ka kona, a to khalahatsha ha txikhaloni ka kulamula, e rumela kudhana Paulo. 7Ngako a di bwakile, Vajudha va kuta ngu Jerusalema, va to mu randela, se ve mu lumbeta minandu ya yingi yo thisa ayi va nga ti si si koti kukomba ditshuri da yona. 8Kambe Paulo a to ti xamulela, a txi khene: “Kha na hoxela mlayo, hambi Dithepele, hambi Khezari.” 9Kambe ngukuva Festo a txi lava kutsakisa Vajudha, a to wotisa Paulo, a txi khene: “U randa kukwela u ya Jerusalema, kasi kuya lamulwa masoni kwangu kani?” 10Aniko Paulo a ti khene: “Ani ni emile masoni ka dibanza da kulamula da Khezari, ahawa ni fanelako kulamulelwa kona. Txi walo txiwonho ni nga txi maha ka Vajudha, ngaku nawe u ti zivako khakwati. 11Ngako hakunene ni di mahile to biha, ngako ni di mahile txiwonho txi txi dinganako ku ni dawa, kha ni lambi kufa. Aniko, ngako ku singa ni ditshuri ka minandu yi va ni mangalelako ngu yona, a walo mthu wu a si kotako ku ni ningela manzani kwawe. Ni kombela kulamulwa ngu Khezari.” 12Se Festo, ngako a di sutile mhaka yiya ni madhota a dibanza, a to xamula, atxi: “U kombete kulamulwa ngu Khezari, u na tsula kwakwe Khezari.” 13Msana ka masiku o kari, mfumeli Agripa ni Bhernike va to ta Khezareya kuta losa Festo. 14Ngako va di zumbile masiku a mangi, Festo a to gela mfumeli timhaka ta Paulo, a txi khene: “Ahawa ku ni mthu wu Felikisi a nga mu siya a di sungilwe. 15Ngako ni di Jerusalema, vaphaxeli va hombe ni madhota a Vajudha, va mu mangate kwangu, va txi kombela ku a na lamulwe. 16Kambe ni va xamute ni txi khani: ‘Hi nga tolovelo ya Varoma kuningela mthu, hambi wuhi ni wuhi a mangalwako, na a si nzi kuningwa mbimo yo ti xamulela, masoni ka vamangali vakwe, ka ti a mangalwako ngu tona.’ 17Vona, ngako va di hokile votshe ahawa, ani kha na swela: mangwanani ka kona ni to ya khalahatsha ha txikhaloni ka kulamula, ni rumela ku e nehwa mthu wuwa. 18Kambe vamangali vakwe masoni kwakwe kha va humisa mhaka, ni ya yimweyo, ka ti ni nga ti ti rinzete. 19Tsena va ti ni kukanetisana ngu ta wukhongeli wawe, ni ta mthuyo a dhanwako ku i Jesu wa kufa, aniko Paulo a tsanisako ti to wa hanya. 20Se ani, ngu kukanakaniswa ngu timhaketo, ni mu wotisile ku wa ti lava kuya Jerusalema, kuya lamulelwa kona kani. 21Kambe Paulo a kombete kuveka mhaka yakwe mtamoni ka mfumeli wa hombe; ngu konaho ni rumete ku e woneletwa a di mkorani, kala ditshiku da ku mu rumela ka Khezari.” 22Se Agripa a txi khene ka Festo: “Nanani ni lava ku mu engisa mthu wuwa.” Ene a txi khene: “Mangwana u na ta mu engisa.” 23Ngu mangwanani ka kona, Agripa ni Bhernike va to ta va di ambate sa wukoma wawe, ve tsula ha banza va di ni tinduna ta hombe ta yimbi, ni madhota a hombe a didhoropa. Se Paulo e nehwa ngu kuruma ka Festo. 24Konaho Festo a ti khene: “Mfumli Agripa, ni nanu motshenu mi nga tshangana hawa, ma mu wona mthu wuwa, dibutho dotshe da Vajudha va nga mu mangalela kwangu. Kukhukhela Jerusalema kala kona hawa va txi kwangula ngu mtamo va txi khona kha ti laveki e lekwa a txi hanya. 25I di ani, kha na mana mnandu wo dingana ku e dawa; aniko ngako ene apune a nga ti veka manzani ka mfumeli wa hombe, ni woni ti to a na rumelwe kwakwe. 26Ngako ni nga mbi mana mhaka yo tsana ya kubhalela mfumeli, ani ni mu veka masoni kwanu, ngutungutu kwako, mkoma Agripa, kasiku, msana ka kuva yi di wotisisilwe mhaka yakwe, ni si kota kuziva ati ni no bhala txona ngu ngene. 27Kunene, ni ti wona ti sa lulama kurumela mthu wo ñolwa, na ku si wombwi ti va mu mangalako ngu tona.”

will be added

X\