MITHUMO YA VAPOSTOLI 18

1Msana ka toneto, Paulo a to khukha Atena e tsula Korinto. 2Koneyo a ti ya mana Mjudha wo kari, a nga ti dhanwa ku i Akila wa kuvelekelwa Ponto, na a di ngadi kubwaka ngu Italiya, kumweko ni Prisila, msikati wakwe; ngukusa Klawudhiyo a ti vekile mthetho wa ku votshe Vajudha va na khukhe Roma. Se Paulo a to ya kwawe. 3Se ngako i nga ti wa mthumo wumwewo navo, va ti ni mthumo wa kuluka matenda, a to zumba navo a txi thuma. 4Se ngu otshe masiku a tisabbata a ti wombawomba disinagogani e kholwisa Vajudha ni Vagriki. 5Mbimo yi Silasi ni Timoti va nga ta ngu Makhedhoniya, Paulo a to ti ningetela kugondisani ka dipswi tsena, e tsanisa masoni ka Vajudha ti to Mesiya ngene Jesu. 6Kambe ngako a txi wona kukaneta kwawe, ni kuruka kwawe, Paulo a to zuza tinguwo takwe, a txi khene kwawe: “Mnoha wanu wu na ve txitimwi ka misungo yanu. I di ani ni basile: kukhukhela konkuwa ni na tsula ka vamatiko.” 7Kutingako a di humile hale, a to ya wulela nyumbani ka mmweyo a dhanwako ku i Titiyo Justo, mkhozeli wa Txizimu, awu nyumba yakwe yi nga ti gwatamile ni disinagoga. 8Krispo, mthangeli wa disinagoga a to kholwa ka Mkoma ene ni yotshe ngamu yakwe; ni Vakorinto vavangi, ngako va txi engisa Paulo, va to kholwa nivona, ve bhabhatiswa. 9Se Mkoma e humelela ka Paulo ngu txiwoniso ni wusiku, a txi khene kwakwe: “U nga thave, wombawomba, u nga malale, 10ngukuva ni ni nawe, kha ku nga ni mthu wu a no ku wukela e ku maha ta walo nguko nina ni vathu vavangi didhoropani muwa.” 11Se a to zumba konamo dilembe ni mtxhanu wa mitxima ni wumwewo e va gondisa dipswi da Txizimu. 12Mbimo yi Galiyo i nga ti muemeli wa wukoma ditikoni ka Akaya, Vajudha va to langana kuwukela Paulo, ve mu teka, ve mu yisa dibanzani, 13va txi ya khona: “Awuwa a susumeta vathu ti to ve khozela Txizimu ngu nzila yo hambana ni mlayo.” 14Paulo, a di ngadi a txi lava kutula txisofu, Galiyo a to gela Vajudha, a txi khene: “Anu Vajudha, ngako i di mahungu a mhaka ya kugombonyeka mi wombako ona mwendo ya wubihi wumwane, ni ndina amukela kumangala kwanu; 15kambe ngaku i ku kukanetisana ngu mhaka ya mapswi ni matina ni Mlayo wanu, thethisanani mipune, ngukuva ani kha ni lavi ku ti maha muabanisi wa timhaka to ngeto.” 16Se e va tovela dibanzani. 17Se votshe va to ñola Sostene, mthangeli wa disinagoga, ve mu peka masoni ka dibanza, aniko Galiyo kha khatala ngu tona. 18Paulo a zumbile Korinto masiku a mangi. Msana keto, a to siya vanawe e tsula Siriya ngu ngalava, a di ni Prisila ni Akila. Madingano ni txixambanyo txi a nga txi maha, a to kuyulwa misisi a di Kenkreya. 19Kutingako va di hokile Efesu, Paulo a to ya va siya kona, se e wulela disinagogani e ya kanetisana ni vajudha. 20Vona va to mu kombela ku e engetela masiku a kuzumba navo, kambe kha tumela. 21Se a to va salisa, a txi khene: “Ni na tshumela ni wuya kwanu, ngako Txizimu txi txi ti lava.” Se a to khukha Efesu e tsula ngu ngalava. 22Kutingako a di hokile Khezareya, a to kwela e ya losana ni dibanza da makholwa, ngu msana e kwitima e ya Antiyokiya. 23Ngako a di zumbile mbimoanyana koneho, a to khukha kambe e horolokela matiko a Galatiya ni Frigiya na a txi tsanisa votshe vagondiswa. 24Mjudha wo kari a dhanwako ku i Apolosi, awu a nga velekelwa Alexandriya, a ti tile Efesu. I ti mthu wa kuziva kuwombawomba ni kuziva Mibhalo. 25A ti gondisilwe nzila ya Mkoma, se ngu kukhutala kwakwe moyani a ti wombawomba ni kugondisa timhaka ta Jesu, ngu longoloko ya yinene, hambiko a nga ti ko ziva txibhabhatiso txa Johane dwe. Ngu konaho Apolosi a to khata kuwombawomba disinagogani, a si thavi txilo. 26Kutingako Prisila ni Akila va di mu engisile, va to mu teka ve mu txhamusela tatinene Nzila ya Txizimu. 27Se ngukuva a nga ti lava kuya Akaya, vanawe va to mu tsanisa ve bhalela dipapilo vagondiswa, kasiku ve mu amukela. Ngako a di bwakile kwawe, a vhuni ngutu makholwa ngu wunene wa kateko ya Txizimu. 28Ngukuva a titi va kona Vajudha ngu mtamo ha vathuni, e va kombisa ngu Mibhalo ti to Jesu ngene Mesiya.

will be added

X\