MITHUMO YA VAPOSTOLI 14

1Ikoniyo nikona, Paulo ni Bharnabhasi, va to wulela disinagogani ka Vajudha ve gondisa, ahawa ko za dibutho da hombe da Vajudha ni Vagriki ve kholwa. 2Aniko Vajudha va va nga mbi kholwa va to kujetela vamatiko kasiku timbilu tawe ti txi wukela vanathu. 3Hambi keto, Paulo ni Bharnabhasi va zumbile masiku o tala, ve wombawomba va si thavi txilo ngu kuthemba Mkoma, a nga ti tsanisa dipswi da kateko yakwe ngu kumaha sikombiso ni sidiwukiso ngu manza awe. 4Vathu va didhoropa dile ve hambana: vamwane va txi ema ni vajudha, vamwane va txi emela Vapostoli. 5Se vamatiko ni Vajudha ni tinduna tawe va to langana ku va mahela tshofu ni ku va balisela ngu marigwi. 6Vona, ngako va di ti zivile, va to thavela madhoropani ka Likawoniya, Listra ni Dherbhe ni ka maphambo a hafuhi. 7Konamo nikona va titi txhumayela Evhangeli. 8A titi ho mthu didhoropani ka Listra, awu a nga ti lemate minenge; ngukuva i ti txilema kukhukhela kuvelekwani kwakwe, txima a ti si zivi kutsimbila. 9A titi engisela ti ti wombwako ngu Paulo. Se ene ngako a txi mu wonisisa, e wona ti to ana ni kukholwa ko dingana ku e hanyiswa, 10a to guleta dipswi, a txi khene kwakwe: “Khukha u txi ema ngu minenge yako!” Ene a to ndaka e khata kutsimbila. 11Dibutho da vathu, ngako va di woni ti ti nga mahwa ngu Paulo, va to huwelela ngu lidimi la Txilikawoniya, va txi: “Sizimu si tekile tikhohe ta vathu, si txhikela kwathu!” 12Se Bharnabhasi va ti mu dhana ku i “Zewusi”, Paulo ene va txi i “Herme”, ngukuva i ti ene i nga ti mthangeli wa dipswi. 13Konako mphaxeli wa Zewusi, awu dithepele dakwe di nga ti hahanze ka didhoropa, a to neha marole na ma di bombisilwe ngu mibhoti ya siluva, na a txi xuva kuphaxa mhamba kumweko ni dibutho. 14Ngako Vapostoli Bharnabhasi ni Paulo va di zivisilwe toneto, va to vharula tinguwo tawe ve ti rinza hagari ka vathu, ve kwangula, va txi: 15“Vavamna! Mi mahela txani toneto kani? Anathu hi vathu vo fana ni nanu ngu mtumbuluko; mahungu a manene awa hi mi tiselako ona, ngu ti to mi leka mithumo yi ya kukhozela sa walo, mi tshumelela ka Txizimu txi txi hanyako, txi nga maha nzuma ni mafu ni linene, ni sotshe simaha si si ku ka sona. 16Ka tixaka ti ti nga pinda, Txizimu txi tumete ti to mfumo ni mfumo wu tsimbila ngu nzila ya wona; 17hambi keto, kha txa leka kufakaza ti to txona txa ho, ngu kumahela tatinene vathu, txi wisa mati a nzuma, ni ku mi ninga tinyango to pfuna, txi khurisa timbilu tanu ngu sakudya ni litsako.” 18Hambiko va nga womba mapswi awa, kha ta va hehukela kutsimba dibutho ti to di si va maheli mhamba. 19Ti di mahile eto, ku to bwaka Vajudha va kuta ngu Antiyokiya ni Ikoniyo ve ta kujetela mabutho a vathu ti to ve balisela Paulo ngu marigwi, se ve mu ruruvisa ve mu yisa hahanze ka didhoropa, na va txi alakanya ti to a fite. Kambe ngako vagondiswa va di mu ranganyetile, a to wuka e wulela didhoropani. 20Se mangwanani ka kona, a to khukha e tsula Dherbhe, kumweko ni Bharnabhasi. 21Ngako va di txhumayete evangeli ka didhoropa diya ni kumaha mtengo wa hombe wa vagondiswa va to tshumelela Listra ni Ikoniyo ni Antiyokiya. 22Va ti tsimbila va txi tsanisa timbilu ta vagondiswa ni ku va laya ti to ve timisela amu ka likholo, nguko, kha vona, hi fanete kuamukela sixaniso sa singi, kasiku hi si kota kuwulela Mfumoni ka Txizimu. 23Msana ka kuva va di vekile madhota masoni ka otshe mabanza, ngu ku va sanzeka manza ni ku va khongelela ni ku ti tona sakudya, va to va veka manzani ka Mkoma, awu va nga kholwa kwakwe. 24Senikoko, va to tshawunyeta Pisidhiya, va txi hoka Panfiliya. 25Se va di huwelete Dipswi aniya Perga, va to relela va txi ya Ataliya. 26Va txi khukhela koneyo, va to tsula ngu ngalava va txi ya Antiyokiya, ahawa va nga khatela kona, na va txi themba kateko ya Txizimu, ka mthumo wule va nga gwita ku wu maha. 27Ngako va di hokile, va to tshanganisa Dibanza, va txi txhamusela totshe ti Txizimu txi nga thuma ngu vona, ni tiya txi nga tulelisa tona vamatiko ditimba da likholo. 28Se va to zumba kona mbimo yo lapha ni vagondiswa.

will be added

X\