MITHUMO YA VAPOSTOLI 13

1Ku titi ho ka Dibanza da Antiyokiya vaprofeti ni vagondisi: i ti Bharnabhasi ni Simiyoni, awu a dhanwako ku i Nigere, ni Lukiyo wa Kirene, ni Manahene, awu a nga kula kumweko ni mkoma Herodha, ni Sawule. 2Ka ditshiku do kari, ngako va txi khozela ka Mkoma, na va txi ti tona sakudya, Moya wo Sawuleka wu to womba wu txi: “Ni sawuleleni Bharnabhasi ni Sawule, kasiku ni va ninga mthumo wu ni nga va dhanela wona.” 3Se ngako va di gwitile ku ti tona sakudya ni kukhongela, va to va sanzeka manza ve va ruma. 4Vona ngako va di rumilwe ngu Moya wo Sawuleka, va to kwitima ve ya Seleukiya, se ngu koneyo va ti ya txhatuka ngu ngalava ve ya Kipra. 5Ngako va di hokile Salamina, va to ya txhumayela dipswi da Txizimu masinagogani ka Vajudha. Va ti ni Johane, mvhuneteli wawe. 6Ngako va di tshawunyetile txotshe txitondolo ve hoka Pafo, koneyo va to ya mana Mjudha wo kari, i nga ti msalamusi ni mprofeti wa makuhu, awu a nga ti dhanwa ku i Bhari Jesu. 7Ene a ti lumba m'ti wa nganakana Sergiyo Paulo, wamwamna wo ziva, awu a nga dhana Bharnabhasi ni Sawule, ngu ku navela kuengisa dipswi da Txizimu. 8Kambe Elima, msalamusi, ngu toneto di wombako ditina dakwe ngako di txi txhamuselwa, a to mu tsimba, e zama kutimeta nganakana ti to yi si kholwi. 9Aniko Sawule, i ku ene Paulo, a di tate ngu Moya wo Sawuleka, a to mu wonisisa awule wa msalamusi, 10a txi khene: “Awe u nga tala ngu wukanganyisi ni wubihi wotshe, mwanana wa Sathane, mlala wa sotshe so lulama, khu leki kugombonyisa tinzila ta Mkoma, ati i ku to lulama kani? 11Wona, konkuwa diwoko da Mkoma di txitimwi kwako. U na maha dibhofu, se ngu mbimo yo kari, khu na mbi ngadi u txi wona ditambo.” Kunukunuko, kuphuma ni txidema si to mu khubhunyeta; se e tenderukela e lava wo mu ñoleta ngu diwoko. 12Nganakana ngako yi di woni ti ti nga humelela, yi to kholwa, nguko gondo ya Mkoma yi ti mu xamalisile ngutu. 13Paulo ni va a nga ti navo, va to khukha Pafo ngu ngalava, ve ya hoka Perga ka Panfiliya. Aniko Johane a to va leka e tshumelela Jerusalema. 14Vona va to tshawunyeta ve pinda Perga, ve tsimbila ve ya hoka Antiyokiya ka Pisidhiya. Ngu ditshiku da Sabbata va to wulela disinagogani ve khalahatsha. 15Msana ka kugondwa dibhuku da Mlayo ni Vaprofeti, vathangeli va disinagoga, va to rumela dipswi, va txi khona: “Vanathu, ngako mi di ni dipswi do laya vathu, mi nga di womba.” 16Paulo a to khukha, a txi maha txikombiso ngu diwoko, a txi khene: “Majaha a ka Israyeli ni nanu mi thavako Txizimu, engisani: 17Txizimu txa ditiko diya dathu va ka Israyeli, txi sawute vatate vathu, txi va guleta vathu vava, va di ngadi ditikoni ka Egipta. 18Se ngu mtamo wa diwoko da txona txi va humisile ka ditiko dileya, txi va mahela wumbilu txiwulani, mndani ka malembe o lava kudingana mune wa makumi. 19Ngako txi di fuvisile mtxhanu wa mifumo ni mimbidi ditikoni ka Kanana, txi to va ninga ditiko dile, di maha thomba yawe, 20ngu mbimo ya kudingana mune wa mazana ni mtxhanu wa makumi a malembe (450). Msana keto, Txizimu txi va vekete valamuli kala kuhoka ka mprofeti Samueli. 21Msana keto, va to kombela mfumeli; se Txizimu txi va ninga Sawule, mwana Kixi, wa lihunzu la Bhenjamini, awu a nga fuma mune wa makumi a malembe. 22Msana keto, Txizimu txi va fumisete Dhavhidha, txi mu maha mfumeli, awu txi nga mu fakazela kwawe, txi womba tiya: ‘Ni mani Dhavhidha, mwana Jese, i ku wo randeka ka mbilu yangu, awu a no ta maha totshe ti ni ti xuvako.’ 23Ngu ka lihunzu lakwe Txizimu txi humisile Jesu, Muhanyisi wa vanana va ka Israyeli, nga ti txi nga ti thembisile tona. 24Na Jesu a si nzi kuhumelela, Johane a to thanga e txhumayela ngu txibhabhatiso txi txi yisako kuhundulukani ka siwonho ka yotshe ngamu ya ka Israyeli. 25A di hafuhi ni kuheta mthumo wakwe, Johane a ti khene: ‘Ani kha ni nga ene wu mi mu pimiselako; aniko msana kwangu, wa ta mmwane, awu ani ni ku singa ni fanelo yo thukunyula tingoti ta masandazi akwe.’ 26“Vanathu, vanana va lixaka la Abrahamu! Ni nanu vamwane mi thavako Txizimu! Dipswi diya da kuhanyisa di rumetwe kwathu. 27Nguko ava va nga aka ditikoni ka Jerusalema, ni vathangeli vawe, ngako va nga mbi ti lava ku mu ziva Jesu, va mu abanisile, ve ninga kutatiseka ka mapswi a vaprofeti, aawa ma gondwako sabbata ni sabbata. 28Se hambiko va nga mbi mana mnandu ni wawumwewo kwakwe, wo dingana ku e fa, va kombete ka Pilato ti to e dawa. 29Ngako va di hetile totshe timhaka ti ti nga bhalelwa ene, va to mu hawula ha phandeni ve mu tshotsha diyivani. 30Aniko Txizimu txi mu wusile kufani. 31Se ngu masiku o tala a ti wonekisile ka vale va nga ti kwete nayo kukhukhela Galileya kala kuya hoka Jerusalema, vonavo konkuwa i ku tifakazi takwe hagari ka ditiko: 32“Nanathu ha mi zivisa mahungu awa a manene: txithembiso txi txi nga mahwa ka vatate vathu. 33Txizimu txi tatisile txithembiso txiya kwathu, vanana vawe, ngu kuwusa Jesu, nga ti ti nga bhaliswa tona amu ka dibhuku da Masalmo, va txi:‘Awe u mwanana wangu, ni ku velekile nyamsi.’ 34“Ati to Txizimu txi mu wusile ka vakufa, ni ti to ene kha na mbi ngadi e tshumelela kusinani, txona Txizimu txi ti wombile toneto ngako txi txi womba tiya: ‘Ni na mi ninga makatekwa o sawuleka, o tsana, ayawa ma nga thembiswa ka Dhavhidha.’ 35Ngu toneto, Txizimu txi wombile ka wumwane wukhalo txi txi:‘Awe khu na mbi leka Msawuleki wako a txi eyeta kusina.’ 36“Kasi i di Dhavhidha, ngako a di hetile, ka mbimo ya kuhanya kwakwe, mthumo wu Txizimu, ngu makungo a txona, txi nga ti mu sikete wona, ene a to otela, se e tshotshwa hafuhi ni vatate vakwe, e sina. 37Kambe awu Txizimu txi nga mu wusa, kha ziva kusina. 38Vanathu, ti ziveni ti to kudivalelwa ka siwonho ku nuwelwa kwanu ngu ngene mthu wuwa. 39Se kululama ko hetiseka, akuwa mi nga mbi si kota kuningwa ngu Mlayo wa Mosi, wuhi ni wuhi a kholwako wa ku mana ngu Jesu. 40Ngu konaho, ti woneleni kasiku ti si mi humeleli ati ti nga wombwa ngu vaprofeti, ti to: 41‘Wonani, anu vakanyisi, xamalani mi va mi lova! Ngukuva ka masiku anu, ni na maha mthumo, awu mi ndinova mi si wu tumeli, idiku mo ziviswa ngu mthu.’ ” 42Ngako Paulo ni Bharnabhasi va txi huma ngu disinagogani, vathu va to kombela ti to ka Sabbata yi yi tako ve va gondisa kambe timhaketo. 43Kutingako msengeletano wu di hangalakile, Vajudha va vangi ni valondeteli va va thavako Txizimu, va to londisa Paulo ni Bharnabhasi; vona, ngu mabhulo awe navo, va to va khongotela kasiku ve simamisa kuhanya amu ka kateko ya Txizimu. 44Ngu ditshiku da Sabbata yi yi gametako, votshe vathu va didhoropa, kuleka ngu vavadotho, va to tshangana kasi kuya engisa dipswi da Txizimu. 45Ngu kuwona dibutho da vathu, Vajudha va to tala ngu kubavela, se va txi angula ngu siruko ka timhaka tiya Paulo a nga ti wombawomba ngu tona. 46Aniko Paulo ni Bharnabhasi, na va si thavi txilo, va to womba, va txi khona: “Ku ti fanete kuthanga ngu kwanu hi txi huwelela dipswi da Txizimu. Aniko ngako mi di rethelako kule ni nanu mipune, mi ti pfako mi singa ni fanelo ya wutomi wo mbi guma, senikoko athu ha tshumelela ka vamatiko. 47Nguko Mkoma a hi rumisile toneto, a txi khene: ‘Ni ku emisete ti ta ku u txi maha liwoningo la mifumo, kasi kuhokisa huluko kala magumo ka mafu.’ ” 48Va di engisile toneto, vamatiko va to tala ngu litsako, ve dhumisa dipswi da Mkoma. Ni votshe vale va nga ti ni fanelo ya wutomi wo mbi guma, va to amukela likholo. 49Ngu kota yeto, dipswi da Mkoma di to hangalaka ka dotshe ditiko dile. 50Aniko Vajudha va to kujetela vavasikati va ku ti ningetela mu ka wukhongeli, na i di va kuxonipheka amule didhoropani, ti to ve va humisa ditikoni kwawe. 51Vona va to huphutela lithule la mikondoni kwawe ngu ku va sola, ve tsula Ikoniyo. 52Ngu ditshelo da vagondiswa, vona va to sala va di tate ngu litsako ni Moya wo Sawuleka.

will be added

X\