MITHUMO YA VAPOSTOLI 12

1Ka yona yile mbimo, mfumeli Herodha a to khata kuxanisa vathu vo kari va Dibanza. 2Se a to daya Jakobe, mwanawe Johane, ngu ditxhari. 3Ngako a txi wona ti to ti tsakisile Vajudha, a to engeta e ñola ni Pedro; i ti masiku a mapawu o mbi na mtshumbelo. 4Ngako a di mu ñote e mu beta mkorani, a to mu ningela e woneletwa ngu mune wa mitxawa, ayiya wumwewo ni wumwewo ka yona wu nga ti ni mune wa masotxhwa. A ti navela ku mu humisa masoni ka vathu, ngako Pasika yi di pindile. 5Mbimo yi Pedro a nga ti seketwe mkorani, Dibanza di ti si humuli ku mu khongelela ka Txizimu. 6Kutingako Herodha a txi pimisa ku mu humisa masoni ka vathu, ni wusiku wa kona Pedro a ti otete hagari ka masotxhwa mambidi, na a di sungilwe ngu titxhini timbidi, na kambe ha txikeni ka mkora ku ti ni vawoneleti. 7Kunukunuko ngelozi ya Mkoma yi to woneka, se kukhanya ku txi woninga nyumbani. Se ngelozi yi to gwesa Pedro, ha didhawa, yi mu wusa yi txi kha yona: “Kuluveta u txi khukha!” Se titxhini ti nje kuwa ngu mawokoni kwakwe. 8Ngelozi yi to mu gela, yi txi: “Ti sunge libhande txiwununi, u txi ambala masandazi ako.” Se ene a to maha toneto. Ngelozi yi to engeta yi txi: “Fenengela nguwo yako, u txi ni londisa.” 9Pedro a to huma e yi londisa, na a si ti pimi ti to mwendo hakunene ditshuri ati ti mahwako ngu ngelozi; a ti alakanya ti to txi nga va i di txiwoniso. 10Se va to pinda mtxawa wo khata wa vawoneleti, ni wa wumbidi, ve hoka ka txike txa ditimba da simbi, atxi txi yisako didhoropani. Ditimba da kona di to tuleka dipune. Va to huma ve tsimbila mnavanyana wa nzila, se kunukunuko ngelozi yi to khukha yi mu siya Pedro. 11Se ene, ngako a di ambulukile, a to khene: “Konkuwa se na ti ziva ngu ditshuri ti to Mkoma a rumete ngelozi yakwe yi ta ni hulukisa manzani ka Herodha ni kuwonelelani ka dibutho da Vajudha.” 12Se ngako ma di wuyile mapimo akwe, Pedro a to ya mtini ka Maria, mame wa Johane, awu a dhanwako ku i Marku, ahawa makholwa o talanyana ma nga ti sengeletani kona, ma txi khongela. 13Ngako Pedro a txi gogota ditimba da diguma, ku to ta txithumi txa dihorana, atxi va ku i Rodha, txi ta mu engisa. 14Rodha a to di ziva dipswi da Pedro, se ngu kutsaka, a to leka kutula ditimba e tutumela kuya va gela ti to Pedro wa ho hahanze, ha txikeni. 15Aniko vona va ti kha vona kwakwe: “U ni mawudi, mwananawe!” Kambe ene a to tsanisa a txi nditshuri. Se va txi mu gela ku khona: “I ngelozi yakwe!” 16Pedro ene a ti ya masoni ngu kugogota ditimba. Se va di tute, va to mu vona ti to ngene, ve xamala ngutu. 17Kambe ene a to maha txikombiso ngu diwoko, kasiku ve malala; msana keto, a to va txhamusela ati Mkoma a nga mu humisisa txona ngu mkorani, a txi engeta, a txi khene: “Zivisani Jakobe ni vanathu timhaketo.” Se a to huma e tsula ka wumwane wukhalo. 18Ngako di di txite, dizunga da hombe di to humelela hagari ka masotxhwa, ti to Pedro a mahisile ku txani. 19Herodha a di rumete ku mu lava, va to mu pwata. Se a di rumete kuthethisa masotxhwa a kuwoneleta, a to leleta ku ma na dawe. Se Herodha a to khukha Judheya e kwitima Khezareya e ya zumba kona. 20Herodha a ti ni txiviti ni vathu va Tiri ni Sidhoni, kambe vona va to langana ve ta kwakwe. Se kutingako va di engisani ni Blasto nduna ya hombe ya mkoma, va to kombela kudikha ka ditiko, inkusa ditiko dawe di ti tshunzela ditikoni ka mkoma. 21Se ngu ditshiku di di nga sawulwa, Herodha a to ambala nganju ya wukoma, e khalahatsha ha txikhaloni kwakwe ka wukoma, e wombawomba navo. 22Se vathu ve kwangula, va txi: “Dipswi diya nda Txizimu, hi nga da mthu!” 23Kambe kunukunuko, ngelozi ya Mkoma yi to peka Herodha, nguko kha dhumisa Txizimu. Se a to dyiwa ngu timbungu, e fa. 24Kambe dipswi da Mkoma di ti anda di hangalaka ngutu. 25Se Bharnabhasi ni Sawule, ngako va di hetile mthumo wawe, va to khukha Jerusalema, na va di ni Johane, awu a dhanwako ku i Marku.

will be added

X\