MITHUMO YA VAPOSTOLI 11

1Kambe vapostoli ni vanawe, ava va nga aka ditikoni ka Judheya va ti engisile ti to vamatiko nivona va amukete dipswi da Txizimu. 2Ngako Pedro a di tshumelete Jerusalema, makholwa awa a wukwera ma to kanetisana nayo, 3ma txi: “Awe u wulete mitini ka makhutu u dya nawo.” 4Se Pedro e khata ku va gela timhaka ngu ku ti longolokisa. 5A txi khene: “Ni ti didhoropani ka Jopa na ni txi khongela. Se ni to wona txiwoniso. Ni woni txiya txo nga nguwo ya hombe, yi nga ti txhika ngu nzumani, na yi di sungilwe ngu mu ka mune wa misulo, yi ta hoka kwangu. 6Kutingako ni di yi solete, ni to wona sihari sa mune wa minenge ni sihari sa kutsimbila ngu mirumbu ni sinyana sa nzuma. 7Se ni to pfa dipswi, di nga ni gela, di txi: ‘Pedro khukha u txi ema! Daya u txi dya!’ 8Se ani ni ti khani: ‘Ahim-him, Mkoma. Nguko txima kha ku zivi kuwulela txilo txo yila mwendo txo mbi basa mkanani kwangu!’ 9Di to engeta di ta ngu nzumani dipswi, di txi: ‘Txilo txi txi nga basiswa ngu Txizimu u nga thuke u txi khawe txa yila.’ 10Toneto ti wuyetilwe kararu, se sotshe si tshumela si txi kwetwa nzumani. 11“Kunukunuko ku to humelela vavamna vararu ha txikeni ka nyumba yi hi nga ti ka yona: Vona va ti rumetwe kwangu, na va txi khukhela Khezareya. 12Se Moya wu to ni gela ti to ni na tsule navo, ni si kanakani; vanathu vava va mtxhanu ni mmweyo va to tsula kumweko ni nani. Se hi ti ya wulela mtini ka ene Korneliyo wuwa. 13Ene a hi gete ku khene a woni ngelozi nyumbani kwakwe, yi di emile, yi txi kha yona: ‘Ruma vathu va txi ya Jopa, ve ya dhana Simoni, awu dimwane ditina i ku Pedro. 14Ene a na ku gela timhaka ti u no hanyiswa ngu txona, awe ni wotshe mwaya wako.’ 15Se ngako ni txi khata kuwombawomba, Moya wo Sawuleka wu to txhikela txitimwi kwawe, nga ti ti nga maheka kwathu kukhatani. 16Se ni alakanya dipswi da Mkoma, a nga khene: ‘Johane a bhabhatisile ngu mati, kambe anu mi na bhabhatiswa ngu Moya wo Sawuleka.’ 17Senikoko, ngako Txizimu txi nga va ninga txihiwa txo fana ni txathu, athu hi nga kholwa ka Jesu Kristu, ni mani ani wo ni nga si kota kulambela Txizimu kani?” 18Ngako va di pfite timhaketo, va to malala ve dhumisa Txizimu, va txi: “Kunene, nivona vamatiko Txizimu txi va ningile kuhunduluka ku ku yisako wutomini.” 19Ava va nga ti hangalakile ngu kuxaniswa ku ku nga humelela, mbimo yi Sitefane a nga dawa, va to ya masoni kala ve ya hoka Fenikiya, ni Kipra ni Antiyokiya, va txi txhumayela Dipswi ka Vajudha dwe. 20Hambi keto, hagari kwawe, ku ti ni vavamna va Kipra ni va Kirene, avava va nga wulela Antiyokiya, ve wombawomba kambe ni ka Vagriki, ve va txhumayela Evhangeli ya Mkoma Jesu. 21Se diwoko da Mkoma di ti navo; vathu vo tala va to hunduluka ve kholwa ka Mkoma. 22Timhaketo, ngako ti di hokile tinzeveni ka Dibanza da Jerusalema, va to ruma Bharnabhasi e tsula Antiyokiya. 23Ngako a di hokile e wona kateko ya Txizimu, a to tsaka, e va laya votshe ti to ve tsanisela ka Mkoma ngu timbilu to khutala. 24Bharnabhasi i ti wamwamna wa mnene, awu a nga ti tate ngu Moya wo Sawuleka ni likholo. Ngu konaho, dibutho da hombe da vathu, di to namarela ka Mkoma. 25Bharnabhasi a to tsula Tarso, a txi yela Sawule. 26Ngako a di mu mani, a to mu teka e tsula nayo Antiyokiya. Va ti ya zumba koneyo dilembe dotshe, va txi thuma votshe ka dibanza diya, ve gondisa vathu vo tala ngutu. Ngu kona Antiyokiya vagondiswa va nga khata kudhanwa ngu ditina da ku i makristu. 27Ka oneyo masiku, vaprofeti vo kari va to kwitima ngu Jerusalema ve ya Antiyokiya. 28Mmweyo wawe, awu va ku i Agabo, a to khukha a txi ema, e profeta ngu Moya ti to nzala ya hombe yi na va ho ka dotshe ditiko. Kha ditshuri yi humelete kufumani ka Klawudhiyo. 29Se vagondiswa va to engisana ka mhaka yi ya ku mmwane ni mmwane e rumela asi a si manako, kasi kuya vhuna vanawe va va zumbako ditikoni ka Judheya. 30Kunene, va to mahisa toneto, ve si rumela ka madhota, ngu manza a Bharnabhasi ni Sawule.

will be added

X\