3 JOHANE 1

1Ani Didhota ni bhalela Gayu wo randeka ngutu, awu ni m'randako ngu ditshuri. 2Wo randeka ngutu, ni navela ti to u txi hanya kwati, ni ti to wutomi wako wa mmidi wu txi xayiseka kufana ni ti wu xayisekisako tona wutomi wako wa moya. 3Ni tsakile ngutu ngu kubwaka ka vanathu, va txi fakaza ditshuri di u di simamelako, ti to hakunene u hanya mu ka ditshuri. 4Ku walo ti ti ni tsakisako ngutu kupinda kuziva ti to vanana vangu va hanya mu ka ditshuri. 5Mwanathu wo randeka, u hanya wutomi wo thembeka ka totshe ti u ti mahako ka vanathu, ngutungutu ka vale i ku vaendi. 6Vona va fakazile lirando lako masoni ka Dibanza. U na va u txi maha tatinene, ngako u txi va longela sa nzila ngu tifanelo ti ti tsakisako Txizimu, 7nguko vona va tekile dipfhumba diya ngu ditina da Txizimu, va si tumeli kuamukela txilo ka vamatiko. 8Ngu konaho, hi fanete ku va amukela vathuvo, kasiku hi txi thumisana navo amu ka ditshuri. 9Ni bhalete dibanza mamwane mapswi, aniko Dhiyotrefo, a randako ku ti maha mthangeli hagari kwawe, kha hi amukeli. 10Ngu konaho, ngako ni txi ta kheyo, ni na ta landula mahanyelo akwe ni mapswi akwe o biha a hi poyilelako ngu ona. Hahanze keto, a lamba ni kuamukela vanathu. Se avale va ti lavako ku va amukela, wa va tsimbisa, a txi va humisa Dibanzani. 11Wo randeka ngutu, u nga etetele wubihi, aniko etetela wunene. Awu a mahako wunene, a lumba Txizimu. Awu a mahako wubihi kha txi wona Txizimu. 12Dhemetriyo va m'suma wunene votshe vathu. Ditshuri nidona da m'fakazela. Nanathu ha m'fakazela, se nanu ma ti ziva ti to wufakazi wathu mbwa ditshuri. 13Ni ti ni ta tingi ni nga ti fanete ku ku bhalela, aniko kha ni lavi ku ku rumela txona ngu kuthumisa dipapilo ni tinta. 14Na themba ti to hi na wonana kunukunuku, se hi na ta wombawomba, hi txi wonana khohe ni khohe. 15Kudikha ku na ve ni nawe. Va ku dingula vangana vako. Dingula nawe mmweyo ni mmweyo ka vangana vathu.

will be added

X\