2 TIMOTI 1

1Ani Paulo, mpostoli wa Kristu Jesu ngu kuranda ka Txizimu, madingano ni txithembiso txa wutoni wu, wu ku ka Kristu Jesu, 2ni bhalela awe, Timoti, mwanana wangu wo randeka, ni khani: Makatekwa, ni wumbilu ni kudikha si na ve ni nawe, si txi ta ngu ka Txizimu Tate, ni ka Kristu Jesu, Mkoma Wathu. 3Na bonga ka Txizimu, atxi ni txi thumelako ngu livhalo lo basa kufana ni tiya va nga mahisa tona vatate vangu, na ni si leki ku ku alakanya mikombeloni kwangu, wusiku ni mtshikari. 4Ngu kualakanya mirongo yako, na xuva ngutu tatinene kutshumela ni ta ku wona, kasiku ni txi tala ngu litsako. 5Na khumbula likholo lo mbi kanganyisa li ku kwako, i ku likholo limwelo ni li li nga ti ni kokwane wako Loyidhe ni mame wako Eunise, ali ni thembako ti to li ho kwako nawe. 6Ngu konaho, na ku layetela ti to u txi wuseta txihiwa txa Txizimu, atxi u nga ningwa ngu kuwa ni nga ku sanzeka manza angu. 7Nguko Txizimu kha txa hi ninga moya wa dizowa, aniko txi hi ningile moya wa mtamo, ni wa lirando ni ku ti pimela. 8Ngu toneto, u nga telwe ngu tingana kufakazela Mkoma Wathu, hambi kufakazela ani ni ku txibotxhwa ngu kota yakwe, aniko sengela ni nani kuxanisekani kwangu ngu mhaka ya Evhangeli, u txi tsaniswa ngu mtamo wa Txizimu, 9atxi txi nga hi hanyisa, txi hi dhana ngu madhanelo o sawuleka; txi hi dhani i singa ngu mhaka ya mithumo yathu, aniko ngu mhaka ya kuranda ka makungo a mbilu ya txona ni kateko ya txona. Hi ningilwe kateko yiya ngu ka Kristu Jesu, ti si nzi kuva ho timbimo. 10Kateko yiya yi ti kombisile konkuwa ngu kuwoneka ka Muhanyisi wathu, Kristu Jesu, ene wuwa a nga fuvisa lifo e tisa wutomi ni kuhanya ko mbi guma, asi si nga ti humelelisa kubasani ngu mtamo wa Evhangeli. 11Ani ni simekilwe kumaha mtxhumayeli wa Dipswi ni mpostoli ni mgondisi ngu konaho ka Evhangeli yiya. 12Ngu toneto ni xanisekelako tona. Aniko kha ni na tingana, nguko ani na m'ziva awu ni thembako ene, na ti ziva ngu ditshuri ti to ene ana ni mtamo wa kuveketa asi a nga ni vekela manzani kwangu, kala kedo ditshiku. 13Londetela mapswi a manene, aawa u nga ma engisa kwangu, ngu likholo ni lirando li li ku ka Kristu Jesu. 14Tximaha txa txinene, txi txi nga vekwa manzani kwako, txi xayise ngu kuvhunwa ngu Moya wo Sawuleka, awu wu zumbako timbiluni kwathu. 15Wa ti ziva ti to votshe va ku Asiya va ni lekile, hagari kwawe ku maneka Figelusi ni Hermogenesi. 16Mkoma a na telwe ngu wumbilu ka mwaya wa Onesiforo, nguko sikhati so tala a ni rulisite mbilu, kha telwa ngu tingana ngu mhaka ya tingomondo tangu, 17aniko, mbimo yi a nga bwaka Roma, ene a to ni lava ngu kukarateka e za e ni mana. 18Mkoma a na m'ninge kumana wumbilu masoni kwakwe kedo ditshiku. Awe, kupinda vamwane, wa yi ziva ngutu mithumo yi ene a nga ni mahela didhoropani ka Efesu.

will be added

X\