2 VATESALONIKA 3

1Ngu kugwitisa, vanathu, hi khongeleleni, kasiku dipswi da Mkoma di txi ya masoni ngu kutxhumeyelwa ka otshe makhalo ngu kukuluveta, di txi amukelwa ngu txithavo kota nga ti di nga amukeliswa tona ngu nganu, 2Hi kombeleleni kambe ti to hi txi poniswa manzani ka vathu vo soholoka, ni vo biha, nguko hi nga votshe va ku ni likholo. 3Aniko, Mkoma mbwo thembeka: Ene a na mi ninga kutsana, a na mi vhikela ka m'bihi. 4Athu ha mi themba ditinani ka Mkoma: Anu ma veketa, futsi kambe mi na zumba mi txi veketa ati hi mi rumako. 5Mkoma a na tsimbitise timbilu tanu a txi ti yisa ka lirando la Txizimu, ni ku timiselani ka Kristu. 6Ha mi leleta, vanathu, ngu ditina da Mkoma Jesu Kristu, ti to mi txi hambana ni mwanathu wuhi ni wuhi a si londiseliko nzila ya mlayo, a hambanako ni tigondo ti hi nga mi ninga tona. 7Anu ma ti ziva ati mi fanelako ku ti maha, kasi kulondetela ati athu hi hanyisako tona. 8Hagari kwanu, kha ha hanyisa wukara, futsi kha ha dya sakudya sa mthu mahala, aniko hi thumile wusiku ni mtshikari, ngu kukhutala ni kukarateka, kasiku hi si nemeti ni wammweyo kwanu. 9Na i singa ti to kha hi nga ni fanelo yeto, aniko hi mahisile tiya, kasi ku mi vekela txikombiso. 10Mbimo yi hi nga ti ni nanu, hi ti mi gela tatinene, hi txi khathu: Awu a si ti laviko kuthuma, kha nga ni fanelo ya kudya. 11Se hi ti pfite ti to hagari kwanu, ku ni vathu va hanyelo ya ku ti hunda, ava va ti ningetelako ka so mbi nyawula, va txi leka kuthuma. 12Ka vonavo, ha va ruma ni ku va laya ngu ditina da Mkoma Jesu Kristu, ti to va txi thuma ngu kuthutha, kasiku ve mana kudya sakudya si va nga si thumela. 13Kambe anu, vanathu, mi nga karaleni ngu kumaha tatinene. 14Ngako mthu a txi kanyisa ati hi bhalako ka dipapilo diya, m'wonisiseni, mi nga khataleni txilo ngu ngene, kasiku a na wiswa tingana. 15Hambi keto, mi nga m'woneni nga mlala wanu, aniko m'layeni nga mwananu. 16Mkoma wa kudikha a na mi ninge kudikha yotshe mbimo ni otshe makhalo. Mkoma a na ve ni nanu motshe. 17Madingula awa, ngani Paulo, ngu txanza txangu ni nga bhala. Ngu txona txitsaniso txangu. Ngu tona ti ni bhalisako tona ka otshe mapapilo angu, ni bhalisa tona tiya. 18Kateko ya Mkoma wathu Jesu Kristu, yi na ve ni nanu motshe!

will be added

X\