2 VATESALONIKA 2

1I di ta kuwuya ka Jesu Kristu, Mkoma wathu, ni ta kusengeletana kwathu nayo, vanathu, 2ha mi kombela, ti to mi si kuluveti mi txi dekadekiswa timbiluni kwanu, ti to mi si dhukiswi ngu dipswi da wuprofeti, hambi ngu mawombelo mamwane, mwendo dipswi di di ku nga di ta ngu kwathu, asi si ndino mi ninga kukholwa ti to ditshiku da Mkoma di hokile. 3Mi nga thuke mi txi kanganyiswa ni ka kudhoto ngu mthu, ngukusa ku si nzi kumaha eto, kuthanga ku na va ho kutshumelela msana, ni kuwoneka ka mthu wa txiwonho, mwanana wa kulova, 4awu a kanetako ni ku ti guleta txitimwi ka sotshe si si dhanwako ku i Txizimu, ni si si khozelwako, e za e ya khalahatsha ngu wutumbu dithepeleni ka Txizimu, a txi ti womba ku ene i Txizimu. 5Kha mi alakanyi ti to ni txi mi gela mhaka yiya ni di ngadi ni nanu, kani? 6Nguko, ma txi ziva txi txi m'tsivelako kuta konkuwa, kasiku nyakubiha wuwa e wonekiswa ngu mbimo yakwe ha kubasani. 7Nguko, mitamo ya wubihi ayi yi nga sisala, ya thuma ni konkuwa, aniko yi thuma dwe kala e thaviswa awule a yi tsivelako. 8Se konako, a na wonekiswa ha kubasani m'bihi; se Mkoma Jesu a na m'fuvisa ngu ku m'futeta ngu txisofu txakwe e m'lovisa ngu kuphatima ka kuta kwakwe. 9Kuta ka m'bihi ku na kombiswa ngu mithumo ya Sathane, a na va ni mitamo yotshe, ni sikombiso, ni sidiwukiso sa makuhu. 10A na thumisa totshe tinzila to biha, ti ti xengako ava va yako kulovani, nguko kha va amukela ni kuranda ditshuri, kasiku ve huluswa. 11Ngu koneho Txizimu txi va lekile ve fumwa ngu mtamo wo xengetela ti to ve tumela ta makuhu; 12kasiku, ve abaniswa votshe va va nga mbi tumela ditshuri, ve tsakela tinzila to biha. 13Kasi i di athu, hi fanete kubonga Txizimu yotshe mbimo ngu kota yanu, vanathu, mi randwako ngu Mkoma, nguko Txizimu txi mi sawute kukhukhela makhatoni, kasiku mi txi huluswa ngu Moya wu wu basisako, ni kukholwa ka ditshuri. 14Ngu konaho Txizimu txi nga mi dhana ngu Evhangeli yi hi nga mi txhumayela, kasiku mi txi ta avelwa kupfaliswa ka Mkoma wathu Jesu Kristu. 15Ngu konaho, vanathu, zumbani mi di tsani, veketani siheno si hi mi gondisako ngu sisofu mwendo ngu mapapilo athu. 16Mkoma wathu Jesu Kristu, ngu wutumbu wakwe, ni Txizimu Tate wathu, txi nga hi randa, txi txi hi ninga, ngu kateko ya txona, thavelelo yo mbina magwito, ni txithembo txa txinene, 17vona va na mi tsakise timbilu tanu, ni ku mi tsanisa ka totshe tatinene ti mi ti mahako, ni ka totshe tatinene ti mi ti wombako.


Copyright
Learn More

will be added

X\