2 VATESALONIKA 1

1Paulo, ni Silivhano, ni Timoti, ka Dibanza da Vatesalonika, ava va lumbako Txizimu Tate wathu, ni Mkoma Jesu Kristu. 2Kateko ni kudikha, si na ve ni nanu, si si tako ngu ka Txizimu Tate wathu ni ka Mkoma Jesu Kristu. 3Hi fanete kubonga Txizimu yotshe mbimo ngu mhaka yanu, vanathu, nguko eto ti lulamile, ngukusa likholo lanu la kula ngutu, ni kurandana ka engeteleka mndani ka mmweyo ni mmweyo wanu motshe. 4Ngu toneto, ha ti kulisa ngu nganu hagari ka mabanza a Txizimu, ngu mhaka ya kutimisela kwanu ni kukholwa kwanu amu ka sotshe sixaniso ni mihumbo yi mi yi rwalako. 5Sotshe siya, njikombiso txa kulamula ko lulama ka Txizimu; si humelela kasiku mi va ni fanelo ya Mfumo wa Txizimu, wu mi xanisekako ngu mhaka ya wona. 6Nguko ti lulamile ti to Txizimu txi tshumetela ngu sixaniso ava va mi xanisako. 7Kasiku anu mi xaniswako, mi txi ningwa kuhumula ni nathu ditshiku di Mkoma Jesu a no ta woneka, a txi ta ngu nzumani kumweko ni tingelozi ta mtamo wakwe, 8a di ha mdhikilani ka mndilo, kasiku e pharela ka vale va si txi ziviko Txizimu, ni ka va va si engisiko Evhangeli ya Mkoma wathu Jesu. 9Txitsayiso txawe ku na va kulova ko mbi guma, kha va na mbi kanga yi wona khohe ya Mkoma, hambi kuphatima ka wukoma wakwe, 10mbimo yi a no ta ka edo ditshiku, kasi kuta dhumiswa hagari ka vasawuleki vakwe, ni kuta xamalwa hagari ka vale va nga kholwa kwakwe, kufana ni nanu mi nga amukela wufakazi wathu. 11Ha mi kombelela yotshe mbimo, ti to Txizimu txathu txi txi mi maha ava va fanelwako ngu wutomi wu txi nga mi dhanela wona, txi txi thuma ngu mtamo wa txona ti to yotshe mixuvo yanu ya yinene yi txi tatiseka ngu kuenela, ni mthumo wa likholo lanu. 12Ngu nzileyo, ditina da Mkoma wathu Jesu Kristu di na dhumiswa kwanu nananu mi na dhumiswa madingano ni kateko ya Txizimu txathu ni ya Mkoma Jesu Kristu.

will be added

X\