2 PEDRO 3

1Vo randeka, adiya dipapilo nda wumbidi ni txi mi bhalela, na ni txi duketa, ka otshe mapapilo a mambidi, kuwuseta mialakanyo yanu ya yinene ngu sialakanyiso so kari; 2kufela ku mi khumbukisa mapswi ale ma nga wombwa kale ngu vaprofeti vo sawuleka, ni txileleto txa Mkoma ni Muhanyisi, atxi mi nga ningwa txona ngu Vapostoli vanu. 3Kukhata, mi fanete kuziva ti to ka masiku o gwitisa va na humelela vatseketseli ni sipoyilo sawe, va txi hanyisa ku ambi ti pimela, madingano ni minavelo yawe wo biha. 4Vona va na kha vona: “Ti gwitisile ku txani ta wule ku nga thembiswa ti to wa ta kani? Nguko, kukhukhela vatate vathu ve fa, ti ngadi zumbisile tona ti i nga ti tona kukhatani ka mthumbuluko wa ditiko.” 5Kambe vona va maha khakwenye, va txi nga vo ti timelela ti to: I kale yi di ho nzuma ni mafu, mafu awa ma nga thaviswa ka mati, ma txi vekwa hagari ka mati ngu Dipswi da Txizimu. 6Ni ti to: Ngu mhaka ya toneto, ditiko da yoneyo mbimo di fuvile ngu kumitwa ngu ndambi. 7Kasi nzuma ni mafu sa konakuwa, si veketilwe ngu dona Dipswi, si txi rinzela mndilo, si txi rinzela ditshiku do lamulwa ni da kuloviswa ka vathu va va si khataliko ngu Txizimu. 8Ku ni mhaka ya yimweyo mi si faneliko ku yi divala: Ditshiku da dimwedo masoni ka Mkoma di fana ni digumi da mazana a malembe, ani digumi da mazana a malembe ma fana ni ditshiku da dimwedo. 9Mkoma kha sweli kumaha sithembiso sakwe, nga ti vamwane va alakanyako ti to wa swela, kasi ene ana ni kutimisela ngu nganu. Kha ti lavi ti to ni wammweyo a txi lova, aniko a lava ti to votshe ve hunduluka. 10Kambe ditshiku da Mkoma di na tisa ku nga dikhamba; ka donedo ditshiku, tinzuma ti na pinda ti txi dhinda ngutu, tinyeleti ti na nyivilika ngu kupfa kuhisa ka hombe; ditiko ni mithumo ya dona si na hya si txi guma. 11Akuwa ku no hya sotshe simaha siya si txi guma, anu mi fanete kuva ni mahanyelo o sawuleka a wukhongeli, 12mi txi rinzela ni kukuluvetisa kuhoka ka ditshiku da Txizimu; ahawa tinzuma ti no hiswa ti txi nyivilika, ni sotshe sivangwa si no nyivilika si txi guma. 13Hambi keto, athu, kota nga ti Mkoma a nga hi thembisa, hi rinzela tinzuma ta tiphya ni ditiko da diphya, ahawa kululama ku nga aka kona. 14Ngu kota yeto, vo randeka, na mi txi rinzela simaha siya, ti karateni kufela ku ene a txi ta mi mana mi di basile, mi singa ni txisolo, kambe a ne ta mi mana mi di ni kudikha. 15Pimani ti to kuhonisela ka Mkoma wathu ngu kona kuhanyiswa kwanu! Ngu toneto, nene mwanathu wo randeka, Paulo, a mi bhalete ngu yona nzila yiya, madingano ni wuzivi wu a nga ningwa. 16Ngu toneto nene a wombisako txona ka otshe mapapilo akwe ngako a txi gwesa mhaka yiya ka ona mapapilo awa. Ti ho timhaka to kari ti ti karatako ku ti engisisa, atiya vathu vo mbi ziva ni vo mbi tsana va ti soholotako, madingano ni ti va ti mahako ka yimwane Mibhalo, va txi ti lovisa vapune. 17Ngu toneto, anu vo randeka, ngaku mi nga songolela ku ti ziva, ti woneleni, kasiku mi si thuki nanu mi txi humiswa ka likholo lanu lo tsana, ngu kuxengwa ngu vathu vo biha va va si khataliko ngu txilo. 18Ngu toneto, kulani amu ka kateko ni kuziva Mkoma ni Muhanyisi Jesu Kristu. Kwakwe ku na ve ni kupfaliswa, konkuwa ni ka ditshiku da wutomi wo mbi guma! Amen.

will be added

X\