2 PEDRO 1

1Ani Simoni Pedro, txithumi ni Mpostoli wa Jesu Kristu, ni bhalela avale va nga amukela likholo la lisima kufana ni lathu, ngu kululama ka Txizimu ni Muhanyisi wathu Jesu Kristu. 2Makatekwa ni kudikha si na ve ni nanu ngu kutala ka sona, ngu konaho ka wuzivi wa Txizimu ni Jesu Kristu, Mkoma wathu. 3Mtamo wa wuzimu wakwe wu hi ningile sotshe simaha si si lavekako ka wutomi ni wukhongeli ngu ku hi ninga kateko ya kuziva awule a nga hi dhana, ngu kupfaliswa kwakwe ni mtamo wakwe. 4Ngu mhaka ya sona, hi mani txiavelo mdani ka sithembiso sa hombe ni sa lisima ngutu, kasiku nanu mi txi mana txiavelo txa wuzimu, mi txi huluka ka lifo li li nga vangwa ha ditikoni ngu minavelo yo biha. 5Ngu mhaka ya totshe tiya, khutalani nga ti mi ti kotisako tona, mi txi tsanisa wunene ngu wuzivi; 6mi txi tsanisa wuzivi ngu ku ti pimela, mi txi tsanisa ku ti pimela, ngu kuhonisela, mi txi tsanisa kuhonisela ngu wukhongeli, 7mi txi tsanisa wukhongeli ngu kudhundana ka wuxaka, mi txi tsanisa kudhundana ka wuxaka ngu lirando. 8Nguko, yotshe mitamo yiya, yi txi maneka kwanu ngu kutala ka yona, kha yi nambi mi leka mi di mikara mwendo sifule amu ka kuziva Jesu Kristu Mkoma wathu. 9Ngukusa, awu a ku singa naso siya sotshe, ndibhofu, kha woni kule, kambe a divate ti to a basisilwe ka siwonho sakwe sa kale. 10Ngu toneto, va ka kwathu, khutalani mi txi ya masoni, kasiku mi txi si kota kutsanisa kudhanwa kwanu ni kusawulwa kwanu. Nguko, mi txi mahisa eto, kha mi nambi thuka mi txi khuvekiswa. 11Ngu yoneyo nzila, mi na tulelwa dipango da wukoma wo mbi guma wa Mkoma wathu ni Muhanysi wathu Jesu Kristu. 12Ngu konaho, otshe masiku ni navela kuzumba ni txi mi alakanyisa timhaka tiya, hambiko mi ti zivako, ni kuwa mi nga tsaniswa ka dona ditshuri diya mi ku nado. 13I fanelo yangu, ni di ngadi ni txi hanya ka ditenda diya da ha mafuni ku mi wusa, kasiku mi zumba mi txi wonelela. 14Nguko mbayimbayi ni na huma ka ditenda diya, madingano ni txiziviso txiya ni nga mahelwa ngu Mkoma wathu Jesu Kristu. 15Hambi keto, ni na ti karata kasiku hambi ni txi fa, mi na sala mi txi ti alakanya totshe tiya. 16Nguko, ku mi gondisa kwathu timhaka ta mtamo ni kuta ka Mkoma wathu Jesu Kristu, kha ta khukhela ka mabhulo o sikwa ngu wutxhari wa mthu, aniko hi mi gondisile ngu ku hi nga wona wuhombe wakwe ngu maso athu mapune. 17Nguko, ene a amukete manzani ka Txizimu Tate wudhumo ni kupfaliswa, mbimo yi di nga ta dipswi ngu kuphatimani ko xamalisa di txi: “Awuwa i Mwanana wangu wo randeka ngutu, awu ni tsakiswako ngutu ngu ngene.” 18Athu hipune hi di engisile dipswi diya di txi ta ngu nzumani, mbimo yi hi nga ti kumweko nayo ha mmangoni ko sawuleka. 19Se kambe, hi ngadi ni dipswi do tsana ngutu da vaprofeti, adi mi mahako tatinene ngu ku di engisa, nga liwoningo li phatimako ha wukhaloni ka txidema, kala mbimo yi ditambo di no ta woninga ni nyezi yi yi no ta humelela timbiluni kwanu. 20Aniko, masoni ka totshe, zumbani mi txi ti ziva ti to ku walo dipswi da vaprofeti, adiya mthu a si kotako ku di txhamusela ti txi khukhela ha msungo kwakwe. 21Ngukusa, ku walo dipswi ni dadimwedo da wuprofeti adi di nga wombwa ngu kuranda ka mthu. Aniko vathu vo sawuleka va va nga susumetwa ngu Moya wo sawuleka, ngu vona va va nga wombawomba ngu ditina da Txizimu.

will be added

X\