2 JOHANE 1

1Ani Didhota ni bhalela khosikazi yo sawulwa ngu Txizimu, ni vanana va yona, ava ni va randako ngu ditshuri; hi nga ani nokha ni va randako, aniko ni votshe va va zivako ditshuri va va randa, 2ngu mhaka ya ditshuri di di zumbako kwathu, adi di no va ni nathu yotshe mbimo, 3kateko ni wumbilu ni kudikha si txi huma ngu ka Txizimu Tate ni ka Jesu Kristu, Mwanana wa txona, si na ve ni nathu, si txi hi tsanisa amu ka ditshuri ni mu ka lirando. 4Ni tsakile ngutu, nguko ni nga mana vamwane ka vanana vako va txi hanya mu ka ditshuri, madingano ni txirumo txi hi nga txi amukela ka Tate. 5Se konkuwa, awe khosikazi, na ku kombela, i singa ti to no ku bhalela txirumo txa txiphya, aniko ni womba ti hi nga rumwa kukhukhela makhatoni: Ti to hotshe hi randana. 6Lirando la kona ngu liya: Kuhanya ngu kuveketa sirumo sakwe. Se txirumo txo khata, nga tiya mi nga ngondisa tona kukhukhela makhatoni, ngu ti to mi hanya lirandoni. 7Nguko va hangalakile ni ditiko vaxengeteli va vangi, ava va si fakaziko ti to Jesu Kristu a ti mahile mthu. Mthu wo ngeto ngene Mxengeteli ni Mkaneti wa Kristu. 8Ti woneleni kasiku mi si mwalati mihando ya ku ti karata kwanu; aniko mi fanete kumana hakhelo yi yi dinganako. 9Votshe va va yako masoni ni tawe, va si londeteliko gondo ya Kristu, kha va na Txizimu. Kasi awu a simamelako gondo ya Kristu, eyo ngene a ku kumweko ni Tate ni Mwanana. 10Ngako mthu a txi ta kwanu, na a si nehi gondo yiya, mi nga mu amukeleni mitini kwanu, hambi ku m'losa mi nga m'loseni. 11Awu a m'losako a sengela nayo ka mithumo yakwe yo biha. 12Hambiko ni ku ni ta tingi ta ku mi bhalela, kha na ti lava ku mi rumela txona ngu kuthumisa dipapilo ni tinta. Kambe na themba ti to ni na ta kheyo kwanu ni ta wombawomba ni nanu ngu txisofu, na hi txi wonana khohe ni khohe, kasiku litsako lathu li txi hetiseka. 13Va ku dingula vanana va mnanda wako wo sawulwa ngu Txizimu.

will be added

X\