2 VAKORINTO 9

1I di mhaka ya msengo wa kuvhunetela vasawuleki i nga va kuluza mbimo, ngako ni txi mi bhalela eto. 2Na ku ziva ku ti ningetela kwanu ka mhaka ya kuvhuna, se ngu toneto ni ti dhumisako ngu nganu masoni ka Vamakedhoniya ni txi va gela ku khani: “Va Akaya va ti lungisete kukhukhela hanyamwaka”, kukhutala kwanu ku wusile wungi wa mabanza, 3Hambi keto, ni mi rumela vanathu vava, kasiku ku ti dhumisa kwangu ngu nganu ku si mahi ka makuhu; ni ti to mi zumba mi di ti lungisete ngako ni nga womba ti to mi ti lungisete. 4Idiku Vamakedhoniya vo kari vo ta ni nani kheyo, va ta mi mana mi sa ti lungisela, ku mi themba kwangu ka hombe ku ndina hinduka ku maha tingana kwathu. Kha ni lavi kuwomba ti to ndingana kwanu. 5Ni woni ti di ni fanelo kuthangetisa vanathu kasiku ve ta kheyo, va ta lungisela msengo wanu mi nga wu thembisa, ngako wu di tshanganisilwe wu ndina maha msengo wa ditshuri, i singa wa kukurumetwa. 6Zivani tiya: “Awu a phayako sasidotho, a na elula sasidotho, awu a phayako sasingi a na elula sasingi nene.” 7Mthu a na ningele kota nga ti a xuvisako tona mbiluni kwakwe, a si karateki mwendo kukurumetwa, nguko Txizimu txi randa awu a ningelako ngu litsako. 8Txizimu txa si kota ku mi andisela otshe makatekwa, kasiku mi txi mana asi si lavekako yotshe mbimo ni ka sotshe simaha, ni kutshumela si txi sala kufela ku mi txi maha ngu sona yotshe mithumo ya yinene, 9kota nga ti ti nga bhalwa va txi: “A avete e ninga sisiwana, se kululama kwakwe ku na zumba ku singa ni magwito.” 10Txizimu txi ningako mbewu ka mphayi txi txi m'ninga ni sakudya, txona txi na mi lavela mbewu txi txi yi milisa, txi txi andisa mihando ya kululama kwanu. 11Mi na fumiswa ka sotshe simaha kasiku mi txi si kota ku ninga ngu nzila yihi ni yihi, ati ti no maha ku mmweyo ni mmweyo e ninga kubonga ka Txizimu ngu ngathu. 12Ngukusa, msengo wuwa hi wu humisako hi nga wo vhuna sisiwana dwe. Aniko mbwo andisa kubongwa ka Txizimu. 13Ngako va txi wona mthumo wuwa wu kombisako wunene wanu, vona va na dhumisa Txizimu ngu kota ya kuengisa kwanu ka timhaka ta Evhangeli ya Kristu. Kambe vona va na dhumisa Txizimu ngu msengo wa wunene awu anu mi va vhunako ngu wona, i singa vona vokha, aniko ni votshe vathu. 14Ngu ku mi khongelela, vona va na komba lirando la hombe kwanu, ngu kota ya kateko ya kuxamalisa mi nga ningwa ngu Txizimu. 15Txi na bongwe Txizimu ngu txihiwa txa txona txo mbi balwa.

will be added

X\