2 VAKORINTO 8

1Vanathu, konkuwa ha mi zivisa makatekwa awa Txizimu txi ma kombisako ka Mabanza a Makhedhoniya. 2Hagari ka mihumbo ya kuxaniseka ka hombe, ayi ma nga dukwa ngu yona, kambe kutsaka kwawe ku to engeteleka, se hagari ka wusiwana wawe wa hombe va to humisa msengo wawe ngu wuha wa kupindisa mpimo. 3Na fakaza ti to va humisile ngu kuranda kwawe, madingano ni mtamo wawe, futsi kambe ni kupinda mtamo wawe. 4Va hi kombete ngu mtamo, kateko ya kusengela ni nathu ka mthumo wa kuvhuna vasawuleki va Txizimu. 5Na hi sa ti verela, vona va thangile ngu ku ti ningela ka Mkoma, ngu msana ve ti ningela ni kwathu ngu kuranda ka Txizimu. 6Ngu toneto, hi kombete ka Titosi ti taku e hetisa hagari kwanu mthumo wuwa wa wunene, kota nga ku i ku ene a nga wu khata. 7Se, ngaku mi nga talelwa ngu sotshe: Likholo, kuwombawomba, wuzivi, kukhutala kotshe, ni lirando li mi hi randako ngu lona, zamani kuhumelela kambe ka mthumo wuwa wa lirando. 8Kha ni wombi tiya ngu ku mi kurumeta, aniko ni lava ku mi duka ngu wunene wa vamwane, kasi kuwona wunene wa lirando lanu. 9Ma wu ziva wunene wa Mkoma wathu Jesu Kristu. Ene hambiko i ku nyamne wa sotshe, a ti mahile txisiwana, kasiku anu mi txi mana sotshe ngu kota ya wusiwana wakwe. 10Ngu toneto, na mi komba mialakanyo yangu ka mhaka yiya: atiya ti fanela anu, nguko hanyamwaka mi thangete votshe ngu kuthuma ni kuranda mthumo wuwa. 11Konkuwa, hetisani mthumo wanu, ti to ngaku mi ku ngadi mi txi ti lava, mi wu thuma madingano ni mtamo wanu. 12Ngukusa, ngako ku di ho kuxuva kuhumisa misengo, sa amukeleka asi mthu a ku naso; kha ku nga ni mhaka ya si a ku singa naso. 13Kha hi wombi tiya ngu kulava ti to vamwane va txi mana kuhehukelwa, se anu mi sala mi txi nemelwa, 14aniko ni lava ti to motshe mi txi dingana: Ka mbimo ya nyamsi kulaveka ti to kutalelwa kwanu ku txi hehukisa kupwata kwawe, kasiku, ka timwane timbimo, kutalelwa kwawe nivona ku ta hehukisa kupwata kwanu nanu. 15Se ngu toneto, ku na va ho kudingana kota nga ti ti nga bhalwa va txi khona: “Ka wule a nga ti taletwe kha sa sala, ni ka wule a nga ti ni sasidotho kha sa pwateka.” 16Txi na bongwe Txizimu txi nga ninga Titosi mbilu yo mi khutalela kufana ni nathu. 17Athu hi m'kombete kuta kheyo kwanu, se ene a tumete. Kambe nene a ti ti emisete ngu kale kuta kheyo kwanu ngu kuranda kwakwe apune. 18Hi m'ruma kuta ni mmwane mwanathu awu a dhundwako mabanzani kotshe ngu kota ya mthumo wakwe wo txhumayela Evhangeli. 19Hinga tona tiya tokha: A sawutwe ngu Mabanza otshe, kasiku e maha mmweyo wathu ka mthumo wuwa wa wunene, i ku mthumo wu hi wu thumako wa kupfalisa Mkoma ni kukombisa ti taku ngu ditshuri hi navela kuvhuna 20Hi thuma ngu wutxhari wuwa kasiku hi si solwi ngu mthu ngu kota ya msengo wuwa wa hombe wu ku manzani kwathu. 21Nguko, hi thela kota ngu kumaha mithumo ya yinene i singa masoni ka Mkoma dwe, kambe ni masoni ka vathu. 22Kumweko navo, ha rumela mwanathu wu, kukhutala kwakwe hi nga ku duka ngu sikhati so tala ni tinzila to tala, awu ni konkuwa a kombako ku mi khatalela ngutu, nguko wa mi themba ngutu. 23I di Titosi, mpangalati wangu ni txithumi kulothu masoni kwanu; kasi vamwane vanathu nzithumi sa kurumwa ngu mabanza ni wudhumo wa Kristu. 24Ngu toneto, va kombeni, ti txi woneka ha kubasani, masoni ka mabanza, ti taku ma va randa ni ti taku hi womba ditshuri ngako hi txi ti dhumisa ngu nganu.

will be added

X\