2 VAKORINTO 6

1Se kota nga ti hi ku vavhuneteli va txona, ha mi khongotela kasiku mi si amukeli mahala kateko ya Txizimu. 2Nguko, txona txi womba tiya: Ni ku engisile ngu mbimo ya yinene, kambe ni ku vhuni ngu ditshiku da kuhanyiswa. Ayiya ngu yona mbimo ya yinene, adiya ngu dona ditshiku da kuhanyiswa. 3Kha hi lavi kukhuvekisa mthu ni wammweyo kufela ku mthumo wathu wu si solwi. 4Aniko, ka totshe hi dhunda kukombisa ti to hi sithumi sa Txizimu; ngu kutimisela ka hombe sikaratoni ni wusiwanani ni mu tiphangoni. 5Ni mu ka kukwapwa, ni mu kukhotelwani, ni mu ka mazolonga, ni mu kukaralani, ni mu kuwonelelani, ni mu kutitxonani ka sakudya, 6ni mu kubasani ka mbilu, ngu kuziva, ngu kutimisela, ngu ka wunene, ngu ka Moya wo Sawuleka, ngu lirando lo mbi kanganyisa, 7ngu dipswi da ditshuri, ngu mtamo wa Txizimu, ngu matxhari a kululama hi ma ñolako ngu manza a txinene ni a txibhabha, 8amu kudhundwani ni mu kunyenywani, ka nduma ya yinene ni ka nduma yo biha, hi wonwa hi di vakanganyisi, kasi hi va ditshuri. 9Hi woniswa ku nga kha hi ziwi, kuve ha ziwa. Hi wonwa hi txi nga ho lava kufa, kasi ha hanya, ha tsayiswa, kambe kha hi dawi. 10Ho nga ho xaniswa, kuve ha tsaka yotshe mbimo. Hi wonwa nga hi sisiwana, kasi hi fumisa vo tala. Hi wonwa nga kha hi na txilo, kasi hi ni sotshe. 11Hi wombawomba ni nanu, Vakorinto, hi di txhatxhekile, timbilu tathu ti tulekile khakwati. 12Anu kha ma kamana timbiluni kwathu, aniko mi kamanile timbiluni kwanu. 13Ani ni wombawomba kwanu nga mi vanana vangu; ni tuleleni nanu timbilu tanu. 14Mi nga sungweni ha dikangeni kumweko ni va va si kholwiko. Nguko wusengeli muni wu ku ho hagari ka kululama ni kubiha kani? Mwendo wusengeli muni wu ku ho hagari ka liwoningo ni txidema kani? 15Ngu pfanana muni ku ku ho hagari ka Kristu ni Sathane kani? Wusengeli muni wu ku ho hagari ka wu a kholwako ni wu a si kholwiko kani? 16Ngu sengela muni ku ku ho hagari ka dithepele da Txizimu ni sithombe sa sizimu sa makuhu kani? Nguko athu hi dithepele da Txizimu txi txi hanyako kota nga ti Txizimu txi nga kha txona: “Ni na zumba navo ni txi tsimbila hagari kwawe; ani ni na va Txizimu txawe; vona va na va i di vathu vangu.” 17Ngu toneto, “humani hagari kwawe, mi txi hambana navo. Mi nga gweseni txilo txo mbi basa, se ani ni na mi amukela, kuwomba Mkoma”, 18“Aniko ni na va Tate wanu, anu mi na va vanana vangu va mazambi ni va mahorana,” kuwomba Mkoma wa mtamo wotshe.


Copyright
Learn More

will be added

X\