2 VAKORINTO 5

1Athu hotshethu, ha ti ziva ti to mbimo yi wu no hasulwa mdhute wuwa hi hanyako ka wona ahawa ha mafuni, hi ni nyumba nzumani, yo akwa ngu manza a Txizimu, nyumba yo tsana ko mbi na magwito, ayi yi nga mbi mahwa ngu manza a mthu. 2Ngu toneto, ha vilela hi txi navela kuwulela ka nyumba yathu ya niya nzumani, 3kasiku hi di mndani ka yona hi si ti pfi hi sa ambala txilo. 4Nguko hi di ngadi mdhuteni muwa, i ku mmidi wathu, ha vilela ngu kunemelwa, na i singa ti to ho lava kuhuma ka mmidi wathu wa ha mafuni: Aniko hi lava ti to hi txi ambekwa mmidi wathu wa nzumani, kasiku asi si fako si na mitwa ngu kuhanya: 5Se awu a nga hi mahela tiya i Txizimu, i ku txona txi nga hi ninga txitsaniso txa Moya, txa si si tako. 6Ngu toneto, athu hi ni kuthemba yotshe mbimo. Ha ti ziva ti to yotshe mbimo yi hi hanyako wutomi wa mmidi, hi maneka hi di kule ni Mkoma. 7Nguko, hi hanya ngu likholo i singa ngu ku ti wona. 8Athu hi ku ni kuthemba, hi navela kuhuma ka mmidi wuwa hi txi ya zumba ni Mkoma. 9Ngu toneto, mwendo hi hafuhi, mwendo hi kule nayo, ha ti karata ngu kumaha mithumo ya ku m'tsakisa. 10Nguko hotshethu hi na ya ema hi txi thethiswa masoni ka Kristu, kasiku mmwane ni mmwane a txi amukela atxile txi m'fanelako, madingano ni wunene mwendo wubihi wu a nga wu maha, a di ngadi a txi hanya wutomi wa mmidi. 11Ngu konaho, ngako hi zivako kuthisa ka Mkoma, ha khongotela ti to vathu ve kholwa ka Txizimu, txona txa ti ziva khakwati ati hi nga zumbisa tona, kambe na kholwa ti to ha zivaneka khakwati ni kona livhaloni kwanu. 12Hi nga ti to ho tshumela hi txi ti dhumisa masoni kwanu, aniko hi lava ku mi ninga mbimo yo ti dhumisa anu ngu ngathu, kufela ku mi txi si kota kuangula ka vale va ti kulisako ngu sa hahanze i singa ngu sa mbiluni. 13Ngako hi di xangile, hi xangela Txizimu; ani hi di ni mapimo a manene, hi nawo ngu kota yanu. 14Lirando la Kristu la hi kurumeta, ngako hi txi pimisa ti to mthu wammweyo a fete votshe, se ti di ngeto, votshe va fite. 15Ene a fete votshe, kasiku votshe va va hanyako, va si swi va txi ti hanyela vona ngu txawe, aniko ve hanyela awule a nga va fela, a txi tshumela e wuka ka vakufa ngu kota yawe. 16Ngu toneto, kukhukhela konkuwa, a walo wu hi m'zivako ngu kuwona nyama yakwe. Hambi Kristu hi di m'zivisile toneto, kambe konkuwa hi nga tona ti hi m'zivisako tona. 17Awu a ku ka Kristu, njivangwa txa txiphya, mazumbelo akwe a kale ma pindile, ma hindukile ma txi maha a maphya. 18Totsheto ti ta ngu ka Txizimu, atxi txi nga hi tshanganisa natxo ngu Kristu; txona txi hi ningile mthumo wa kutshanganisa vathu kumweko natxo. 19Eto ti komba ti Txizimu txi mahisako tona kasi kutshanganisa ditiko kumweko natxo ngu Kristu, na txi si na mhaka ngu milandu ya vathu; se txi hi ningile mthumo wuwa wa kutshanganisa vathu kumweko natxo. 20Athu hi sirumwa sa Kristu, Txizimu ngu txona txi mi layako ngu ngathu. Ngu toneto, ha mi khongotela ngu ditina da Kristu: Kombelani divalelo ka Txizimu. 21Kristu kha ziva txiwonho, kambe Txizimu txi m'mahile txiwonho ngu kota yathu, kasiku athu hi txi maha volulama masoni ka Txizimu ngu kota yakwe.

will be added

X\